Read new_tumbuka_bible Milimo ya Ŵakutumika 2 Bible Online

Milimo ya Ŵakutumika 2 - new_tumbuka_bible bible

Milimo ya Ŵakutumika 2

¹Para zuŵa la Pentekosite likafika, wose ŵakupulikana ŵakawungana malo ghamoza.

²Kwa mabuchibuchi mphomo yikapulikikwa kufuma kuchanya, yeneiyo yikaŵa nga ndi kuputa kwa mphepo yikuru. Mphomo iyi yikazura mu nyumba yose umo ŵakakharanga.

³Ntheura ŵakawona ivyo vikawoneka nga ndi malulimi gha moto agho ghakagaŵikana na kukhara pa yumozayumoza wa iwo.

⁴Wose ŵakazuzgika na Mzimu Mutuŵa ndipo ŵakamba kuyowoya mazgu gha chilendo nga ndi umo Mzimu wakaŵapira nkhongono yakuyowoyera.

⁵Sono mu Yerusalemu mukakharanga ŵaYuda awo ŵakaŵa ŵasopisopi, ŵakufuma mu vyaru vyose vya pano pasi.

⁶Para ŵakapulika mphomo iyi, mzinda ukuru wa ŵanthu ukawungana, ndipo wose ŵakazizikika chifukwa waliyose mukati mwawo wakaŵapulikanga ŵakuyowoya mu mazgu gha kwakhe.

⁷Mu kuzizwa na kuzukuma kwawo, ŵakayowoya ŵakati, “Asi ŵanthu aŵa awo ŵakuyowoya ntheura, mba Galileya?

⁸Chifukwa uli waliyose wa ise tose tikuŵapulika ŵakuyowoya mu mazgu gha kwithu?

⁹Taŵanji ndise ŵaPariti, na ŵaMede, ŵaElamu, ŵanji ŵakukhara ku Mesopotamiya, ku Yudeya, na Kapadokiya, ŵanji ŵakukhara mu Pontu, na mu Asiya,

¹⁰ku Firigiya, ku Pamfiliya, ku Eguputo, na ku vigaŵa vya Libiya, kufupi na ku Kurene. Ŵanji ndi ŵalendo ŵakufuma ku Romu, tose ŵaYuda na wose awo ŵakurondezga chiYuda,

¹¹ŵanji ŵakufuma ku chirwa cha Kerete na ku Arabiya, tikuŵapulika ŵakuyowoya mu mazgu ghakwithu, vinthu vikuru ivyo Chiuta wachita!”

¹²Chifukwa cha kuzizwa na kuzukuma, ŵakamba kufumbana ŵakati, “Kasi ichi chikung'anamulachi?”

¹³Kweni ŵanji ŵakaŵasekanga waka ŵakati, “Ŵanthu aŵa ŵakhuta vinyo liphya.”

¹⁴Ntheura Petrosi wakimilira pamoza na ŵakutumika ŵanyakhe 11 wakakwezga mazgu na kuŵaphalira kuti, “Mwa ŵaYuda ŵa ku Yudeya na mose imwe mukukhara mu Yerusalemu, manyani makora ichi ndipo tegherezgani ku mazgu agho nditi ndiyowoyenge.

¹⁵Ŵanthu aŵa kuti ŵaloŵera chara nga ndi umo mukughanaghanira, pakuti iyi ndi nyengo ya 9 koloko ku mulenje.

¹⁶Kweni ichi ndicho nchimi Yoyele wakayowoya apo wakati,

¹⁷‘Chiuta wakuti, Mu mazuŵa gha umaliro, ndizamkupungulira Mzimu wane pa ŵanthu wose, ndipo ŵana ŵinu ŵanarume na ŵanakazi ŵizamkuchima. Ŵanyamata ŵinu ŵizamkuwona mboniwoni, ŵarume-ŵakuru ŵinu ŵizamkulota maloto.

¹⁸Nadi, mu mazuŵa agho ndizamkupungulira Mzimu wane pa ŵateŵeti ŵane ŵanarume na ŵanakazi, ndipo iwo ŵizamkuchima.

¹⁹Ndamkuchita vya minthondwe mu mlengalenga kuchanya, na vimanyikwiro kusi ku charu. Kwamkuŵako ndopa, na moto na kusunkha kwa josi.

²⁰Dazi lizamkufipirwa, ndipo mwezi nawo wamkuchesama nga ndi ndopa, pambere lindize zuŵa la Fumu leneilo ndikuru na lakofya.

²¹Penepapo yose uyo wamkuchema zina la Fumu, wamkuponoskeka.’

²²“Mwa madoda gha Israele, pulikani mazgu agha: Yesu wa ku Nazarete, wakaŵa munthu uyo Chiuta wakamutuma kwa imwe. Chiuta wakamupanikizgirani ichi mu milimo ya nkhongono na vyakuzizwiska na vimanyikwiro ivyo wakachitira mwa iyo mukati mwinu, nga ndi umo mwaŵene mukumanyira.

²³Yesu mweneyuyu uyu ndiyo wakaperekeka kwa imwe kwakuyana na unozgero wa Chiuta pamoza na dazgo lakhe. Ntheura imwe mukamukoma pakuzomerezga kuti ŵanthu ŵaheni ŵamupayike pa mphinjika.

²⁴Kweni Chiuta wakamuwuska ku ŵakufwa, na kumusutula ku urwirwi wa nyifwa, chifukwa kuti chikaŵa chamachitiko chara kuti nyifwa yimuthereske.

²⁵Pakuti Davide wakayowoya na vya iyo wakati, ‘Mazuŵa ghose nkhayiwonanga Fumu pakuti yili ku woko lane la maryero, mwakuti ndireke kusunkhunyika.

²⁶Ndicho chifukwa mtima wane ukasekerera. Ndipo ndiyowoyenge mwakukondwa. Nadi thupi lane likhalirirenge mu chigomezgo.

²⁷Chifukwa mwamkusida mzimu wane ku malo gha ŵakufwa chara, nanga nkhureka Mutuŵa winu Yura kuti wavunde.

²⁸Mwandirongora nthowa zakuya ku umoyo, ndipo uŵapo winu wamkundizuzga na chimwemwe panthazi pinu.’

²⁹“Mwa ŵanyane, nkhwenera kumuphalirani na chigomezgo chose vya Sekuru Davide. Iyo wakafwa ndipo wakasungika, na kuti dindi lakhe tili nalo na lero wuwo.

³⁰Kweni pakuti wakaŵa nchimi, wakamanya kuti Chiuta wakapangana nayo na kujirapizga kuti yumoza wa mphapu yakhe wamkukhara pa chizumbe chakhe.

³¹Davide wakawonerathu vya kunthazi ndipo wakaphara na kuwuka kwa Mesiya ku ŵakufwa wakati ‘Kuti wakasidika ku malo gha ŵakufwa chara, nanga ndi thupi lakhe kuti likavunda chara.’

³²Yesu mweneuyu, ndiyo Chiuta wali kumuwuska ku ŵakufwa. Ise tose tili ŵakaboni ŵa cheneichi.

³³Ntheura iyo wakati wakwezgeka na kukhara ku woko la maryero la Chiuta, na kupokera Mzimu Mutuŵa kwakuyana na phangano la Ŵawiske, ndiyo wapungulira pa ise icho mukuwona na kupulika.

³⁴Pakuti ndi Davide chara uyo wakakwerera kuchanya, kweni iyomwene wakati, ‘Fumu yikaphalira Fumu yane kuti, khara ku woko lane la maryero,

³⁵ndisuke ndiŵazgore ŵarwani ŵako kuŵa chitambaliro cha malundi ghako.’

³⁶“Ntheura wose ŵaIsraele ŵamanyiske nkhanirankhanira kuti, Yesu mweneuyo mukamupayika, ndiyo Chiuta wamuzgora kuŵa Fumu na Mesiya.”

³⁷Para ŵanthu ŵakapulika ichi, ŵakachontheka mu mtima, ndipo ŵakafumba Petrosi na ŵakutumika ŵanyakhe ŵakati, “Mwa ŵanyithu, kasi tichitechi?”

³⁸Petrosi wakaŵazgora wakati, “Ng'anamukani mu mtima, ndipo waliyose wa imwe wabapatizike mu zina la Yesu Khristu, mwakuti zakwananga zinu zigowokereke. Ndipo muti mupokere chawanangwa cha Mzimu Mutuŵa.

³⁹Pakuti phangano ili ndinu na ŵana ŵinu, ndiposo na wose awo ŵali kutali, na waliyose uyo Fumu Chiuta withu wakamuchemera kwa iyo.”

⁴⁰Petrosi wakayowoyaso mazgu ghanyakhe ghanandi na kuŵachenjezga wakati, “Jiponoskani mwekha ku chilango icho chikwiza pa muwiro ŵakubendera uwu.”

⁴¹Ntheura wose awo ŵakazomera mazgu ghakhe ŵakabapatizika, ndipo pa zuŵa lira ŵakasazgikirako kwa iwo ŵanthu pafupi vikwi vitatu.

⁴²Ŵanthu aŵa ŵakajipereka ku visambizgo vya ŵakutumika, ndipo ŵakaŵa mu wenenawene nawo pakumenya chingwa, na mu malurombo.

⁴³Ŵanthu wose ŵakaŵa na wofi ŵakati ŵawona vyakuzizwiska na vimanyikwiro vinandi ivyo ŵakutumika ŵakachitanga.

⁴⁴Wose awo ŵakapulikana ŵakaŵanga pamoza mu wenenawene, ndipo vinthu vyawo vikaŵa vya masanganaŵana.

⁴⁵Ŵakaguliska vinthu na vyuma vyawo, ndipo ndarama zakhe ŵakagaŵira munthu yose kwakuyana na ivyo wakakavukanga.

⁴⁶Zuŵa na zuŵa ŵakarutilira kuwungana mu Nyumba ya Chiuta, ŵakamenyanga chingwa pamoza mu nyumba zawo, ndipo ŵakaryanga chakurya na chimwemwe na mtima wa wanangwa.

⁴⁷Ŵakamurumbanga Chiuta ndipo ŵakatemweka na ŵanthu wose. Zuŵa na zuŵa Fumu yikasazgirako kwa iwo weneawo ŵakathaskikanga.