Read new_tumbuka_bible Milimo ya Ŵakutumika 20 Bible Online

Milimo ya Ŵakutumika 20 - new_tumbuka_bible bible

Milimo ya Ŵakutumika 20

¹Chivulupi chikati chamara, Paulosi wakachema ŵasambiri na kuŵachiska. Wakati walayirana nawo, wakaruta ku Makedoniya.

²Ndipo wakati wasorota mu vigaŵa ivi na kuŵachiska na mazgu ghanandi, wakiza ku charu cha Akaya.

³Uko wakakharako myezi yitatu. ŴaYuda ŵakamuchitira chiŵembu apo wakaŵa pafupi kuruta ku Siriya mu ngaraŵa. Ntheura wakadumula kusorota mu Makedoniya pakuwera.

⁴Awo ŵakarongozgana nayo ŵakaŵa Sopatere mwana wa Piro, wa ku Bereya, Arisitariko, na Sekundu ŵa ku Tesalonika, Gayo wa ku Derebe, na Timote, ndiposo Tikiko, na Trofimo wa ku Asiya.

⁵Ŵanthu aŵa ŵakadangirako ndipo ŵakatilindizganga pa dowoko la Turowa.

⁶Kweni tikalowoka kufuma ku Filipi, ghakati ghajumpha mazuŵa gha chiphikiro cha Chingwa chambula chirungo. Para ghakati ghajumphapo mazuŵa ghankhonde, tikakumana nawo pa dowoko la Turowa uko tikatandarako mazuŵa ghankhonde na ghaŵiri.

⁷Pa zuŵa lakudanga la mu sabata, tikawungana pamoza kuti tirye Chingwa. Paulosi wakasambizganga ŵanthu, ndipo wakarutilira kuŵasambizga mpaka usiku pakati. Pakuti wakakhumba kuruta zuŵa la machero ghakhe.

⁸Mu chipinda cha muchanya umo tikawungana mukaŵa nyali zinandi.

⁹Munyamata yunji zina lakhe Yutiko wakakhara pa chidangazi. Iyo wakamba kusiwa na kukoreka na tulo tunandi, apo Paulosi wakaŵa wachali kurutilira kusambizga ŵanthu. Pakuti Yutiko wakagona tulo tuzitu, wakapozomokera pasi kufuma pa chipinda cha muchanya cha chitatu ndipo wakanyamurika wakufwa.

¹⁰Paulosi wakakhilira pasi ndipo wakaya kamuwira Yutiko na kumufukatira, wakati, “Rekani kopa, ngwamoyo!”

¹¹Paulosi wakati waruta ku chipinda cha muchanya na kumenya chingwa na kurya, wakayowoya nyengo yitali kufikira na mulenje ndipo wakaruta.

¹²Munyamata yura ŵakamutora wamoyo, ndipo ŵakasanguruskika chomene.

¹³Ise tikadangira kuya kakwera ngaraŵa, tikalowokera ku Aso, kweneuko tikatenge tikamutore Paulosi. Pakuti ntheura ndimo wakayowoyera pakuti iyomwene wakanozgera kwenda pa mtunda.

¹⁴Paulosi wakati wakumana nase pa Aso, tikamutorera mu ngaraŵa ndipo tikafika pa Mitilene.

¹⁵Tikati tafuma para na ngaraŵa, na machero ghakhe tikiza na kudunjikana na Kiyo. Na machero ghakheso tikafika ku Samo, ndipo na machero ghanyakheso tikafika pa Mileto.

¹⁶Paulosi wakadumula kwenda za mu maji pera kujumpha Efeso, mwakuti wareke kutaya nyengo mu Asiya. Wakaŵa pa luŵiro pakuti ŵakachimbiliranga kuti wakaŵe mu Yerusalemu pa zuŵa la Pentekosite usange nchamachitiko.

¹⁷Kufuma ku Mileto, Paulosi wakatuma mazgu kuti wakumane na ŵarara ŵa mu mpingo wa mu Efeso.

¹⁸Ŵakati ŵiza kwa iyo, wakati kwa iwo, “Mukumanya umo nkhakhalira namwe nyengo yose kufuma pa zuŵa lakwamba ilo nkhafikira mu Asiya.

¹⁹Nkhayiteŵetera Fumu mwa kujiyuyura kose, mu masozi na mu viyezgo ivyo vikandiwira chifukwa cha chiŵembu cha ŵaYuda.

²⁰Mukumanya waka kuti nkhachizukako chara pakuchita chose icho nchakumovwirani. Nkhamusambizgani pakweru na mu nyumba zinu.

²¹Nkhapanikizgira ŵaYuda, na ŵaGriki wuwo, kuti ŵize kwa Chiuta, na kupulikana mwa Fumu yithu Yesu Khristu.

²²Ntheura sono, pakukhuŵirizgika na Mzimu, nkhuruta ku Yerusalemu kwambula kumanya icho chamkundiwira kwenekura.

²³Icho chekha nkhumanya nchakuti, Mzimu Mutuŵa wakundipanikizgira mu msumba uliwose kuti kukakika na visuzgo vikundilindirira.

²⁴Ndipouli, umoyo wane nkhuwupima wakuzirwa chara kwa ine usange ndingafiska nthowa yane na mlimo uwo Fumu Yesu wali kundipa, wakupanikizgira Uthenga Uweme wa uchizi wa Chiuta.

²⁵“Sono nkhumanya kuti mose imwe ndamwenderaninge kumupharazgirani Ufumu wa Chiuta kuti mwamkuwonaso chisko chane chara.

²⁶Ntheura nkhumupanikizgirani zuŵa la lero kuti, ndili wambula mrandu wa ndopa za imwe mose.

²⁷Chifukwa kuti nkhachizukako chara pakumuphalirani khumbo lose la Chiuta.

²⁸Ntheura mujichenjerere mwaŵene pamoza na mskambo wose mu weneuwo Mzimu Mutuŵa wamuŵikani kuŵa ŵaliska ŵa mpingo wa Chiuta, weneuwo iyo wali kugula na ndopa za Mwana wakhe.

²⁹Nkhumanya kuti para ine ndaruta, mphumphi zikari zamkunjira mukati mwinu, ndipo kuti zamkuwureka mskambo chara.

³⁰Ndipo mukati mwinu mwamkuwuka ŵanthu ŵeneawo ŵamkubendezga unenesko na kupuruska ŵakhristu kuti ŵaŵarondezge iwo.

³¹Ntheura muŵe ŵakunozgeka ndipo mukumbuke kuti ine, pa virimika vitatu, muhanya na usiku kuti nkhareka chara kuchenjezga waliyose wa imwe na masozi.

³²“Sono nkhumukorezgani kwa Chiuta na ku mazgu ghakhe gha uchizi, gheneagho ghakumanya kumuzengani imwe na kumupani chiharo mukati mu wose awo ŵali kutuŵiskika.

³³Ndilije kudokerapo siliva ya munthu panji golide panji vyakuvwara vyakhe.

³⁴Imwe mukumanya waka kuti mawoko agha ghakachitanga nchito kuti ndisange vyose ivyo ine na ŵanyane tikakavukanga.

³⁵Mu vinthu vyose ndamurongorani kuti pakuchita milimo ntheura, munthu wakwenera kovwira ŵakutomboroka, pakukumbuka mazgu agho Fumu Yesu wakayowoya ghakuti, ‘Nkhwakutumbikika kupereka kuruska kupokera.’ ”

³⁶Paulosi wakati wamara kuyowoya vyeneivi, wakajikama pasi na kuromba pamoza na iwo wose.

³⁷Ndipo wose ŵakalira uku ŵakumuvumbatira na kumufyofyontha.

³⁸Ŵakaŵa na chitima, chomene chifukwa cha mazgu agho wakayowoya ghakuti ŵawonengeso chisko chakhe chara. Ntheura ŵakamuperekezga ku ngaraŵa.