Read new_tumbuka_bible Milimo ya Ŵakutumika 21 Bible Online

Milimo ya Ŵakutumika 21 - new_tumbuka_bible bible

Milimo ya Ŵakutumika 21

¹Tikati tapatukana nawo, tikawuka na ngaraŵa ndipo tikenda nthowa yakunyoroka mpaka ku Kosi. Na machero ghakhe tikaruta ku Rodesi, kufuma apo tikarutilira kuya ku Patara.

²Tikati tasanga ngaraŵa yakwambukira ku Fonike, tikakweramo na kuruta.

³Apo tikati tayamba kuwona chirwa cha Kipuro, na kuchisida ku mazere, tikendera ku Siriya. Tikakwerera pa Ture, kwenekuko ngaraŵa yikakhizgiranga ŵakatundu.

⁴Tikati tasanga ŵakhristu tikakhara nawo kwenekura mazuŵa ghankhonde na ghaŵiri. Pakurongozgeka na Mzimu ŵakamuphalira Paulosi kuti wareke kuruta ku Yerusalemu.

⁵Kweni para mazuŵa ghithu ghakati ghamara, tikawukapo na kurutilira ulendo withu. Ŵanthu wose, pamoza na ŵawoli ŵawo na ŵana, ŵakatiperekezga mpaka kuwaro kwa msumba. Tikajikama pa mlima wa nyanja, na kuromba.

⁶Pamanyuma pakulayirana nawo, tikanjira mu ngaraŵa, ndipo iwo ŵakawerera ku kwawo.

⁷Tikati tamara ulendo withu wa pa nyanja kufuma pa Ture, tikafika pa Putolemayisi. Kwenekura tikaya kaŵatauzga ŵakhristu na kukhara nawo zuŵa limoza.

⁸Na machero ghakhe, tikawukako ndipo tikaya kafika pa Kesareya. Tikaya kanjira mu nyumba ya Filipu mupharazgi, uyo wakaŵa yumoza wa ŵankhonde na ŵaŵiri[7] ndipo tikakhara mu nyumba yakhe.

⁹Iyo wakaŵa na ŵana ŵanakazi ŵanayi ŵambula kutengwa, ŵeneawo ŵakachimanga.

¹⁰Tikati tagonapo mazuŵa ghanandi, kukafika nchimi zina lakhe Agabu kufuma ku Yudeya.

¹¹Wakati wiza kwa ise, wakatora lamba wa Paulosi, na kukaka malundi ghakhe na mawoko, ndipo wakati, “Mzimu Mutuŵa wakuti, ‘Ntheura ndimo ŵaYuda mu Yerusalemu ŵamkumukakira mwenecho wa lamba uyu, na kumupereka mu mawoko gha ŵamitundu.’ ”

¹²Para tikati tapulika ichi, ise pamoza na ŵanthu ŵa penepara, tikamuŵeya kuti wareke kuruta ku Yerusalemu.

¹³Kweni Paulosi wakazgora wakati, “Kasi mukuchitachi, mukulira ntheura na kuswa mtima wane? Ine ndili wakunozgeka kukakika pera chara, kweniso na kufwira mu Yerusalemu chifukwa cha zina la Fumu Yesu.”

¹⁴Para tikatondeka kumukhorweska, tikamureka waka ndipo tikati, “Khumbo la Fumu lichitike.”

¹⁵Ghakati gharutapo mazuŵa agha, tikanozga katundu withu na kukwerera ku Yerusalemu.

¹⁶Ŵasambiri ŵanji ŵa mu Kesareya ŵakaruta nase. Iwo ŵakaya katipereka ku nyumba ya Munashoni wa ku chirwa cha Kipuro. Iyo wakaŵa mukhristu wakudanga ndipo kwa mweneuyo tikeneranga kuya kakhara.

¹⁷Para tikati tafika mu Yerusalemu, ŵakhristu ŵanyithu ŵakatipokerera na chimwemwe.

¹⁸Na machero ghakhe, Paulosi wakaruta pamoza na ise kuya kawonana na Yakhobe.[8] Ŵarara ŵa mpingo wose ŵakaŵapo.

¹⁹Wakati waŵatauzga, wakaŵakonkhoskera vyose ivyo Chiuta wakaŵachitira ŵamitundu mu uteŵeti wakhe.

²⁰Ŵakati ŵapulika ichi, ŵakamuchindika Chiuta. Ntheura ŵakati kwa Paulosi, “Awona, wa mubali withu, vikwi vya ŵaYuda awo ŵapulikana. Wose aŵa mba phamphu pakusunga Dango la Mozesi,

²¹ndipo ŵaphalirika na vya iwe, kuti ukusambizga ŵaYuda wose awo ŵali mukati mu ŵamitundu kuti ŵapatukane na Dango la Mozesi, pakuŵaphalira kuti ŵareke kurondezga maluso gha chiYuda.

²²Sono kasi tite uli? Ŵanthu ŵati ŵapulike nadi kuti uli kwiza?

²³Ntheura uchite icho tikukuyowoyera. Tili nawo ŵanthu ŵanayi pano awo ŵali kuchita chirapo.

²⁴Urute nawo, ndipo ujitozge pamoza na iwo na kulipira ndarama zakuti ŵametere masisi ghawo. Ntheura ŵanthu wose ŵati ŵamanye kuti mulije unenesko mu vyose ivyo ŵali kuphalirika na vya iwe, kweni kuti iwe wamwene ukusunga Dango la Mozesi.

²⁵Kweni ŵamitundu awo ŵali kupulikana, tili kuŵatumira karata wa ivyo tili kuzomerezgana, vyakuti ŵareke kurya ivyo vyaperekeka ku vikozgo kuŵa sembe, nanga ndi ndopa, panji nyama yose iyo yayesa kunyongeka. Ŵarekeso uzaghali.”

²⁶Ntheura Paulosi wakaŵatora ŵanthu ŵara ndipo na machero ghakhe wakachita nawo kaluso kakujitozga. Ntheura ŵakanjira mu Nyumba ya Chiuta na kuŵamanyiska mazuŵa agho ŵakwenera kuchitira sembe yira kufika pa nyengo ya kutozgekera kwawo, apo ŵangamanya kupereka sembe ya waliyose mwa iwo.

²⁷Para mazuŵa ghankhonde na ghaŵiri ghakaŵa pafupi kufiskika, ŵaYuda ŵa ku Asiya, ŵakamuwona Paulosi mu Nyumba ya Chiuta, ndipo ŵakakhuŵirizga mzinda wose wa ŵanthu, na kumukora.

²⁸Ŵakachemerezga ŵakati, “Imwe ŵaIsraele, tovwirani! Uyu ndi munthu uyo wakusambizga ŵanthu kosekose kususka fuko lithu, na Dango la Mozesi ndiposo na malo agha. Pachanya pa ichi waŵanjizga ŵaGriki mu Nyumba ya Chiuta ndipo ŵakazuzga malo ghakupatulika agha.”

²⁹Pakuti ŵakadanga ŵamuwonapo Trofimo muEfeso wali na iyo mu msumba ndipo ŵakapima kuti Paulosi wakanjira nayo mu Nyumba ya Chiuta.

³⁰Ntheura msumba wose ukayaghayika, ŵanthu ŵakachimbilira pamoza. Ŵakamukora Paulosi na kumuguzira kuwaro kwa Nyumba ya Chiuta ndipo penepapo miryango yikajarika.

³¹Para ŵakakhumbanga kumukoma, murara wa ŵankhondo wa ŵaRoma wakapulika kuti msumba wose wa Yerusalemu uli mu nthimbanizgo.

³²Maluŵiro wakatora ŵankhondo na ŵarongozgi ŵa ŵankhondo ndipo wakachimbilira uko kukaŵa mzinda. Para ŵanthu ŵakamuwona murara wa ŵankhondo yura na ŵasilikari, ŵakareka kumutimba Paulosi.

³³Murara wa ŵankhondo wakafika kwa Paulosi na kumukora ndipo wakalangula kuti wakakike na maunyoro ghaŵiri. Penepapo wakafumba wakati, “Kasi uyu ndi njani, ndipo wachitachi?”

³⁴Ŵanthu ŵanyakhe mu wumba ŵakachemerezga chinthu chimoza, ŵanyakheso chinyakhe. Ndipo pakuti wakatondeka kumanya unenesko chifukwa cha chiwawa, wakalangula kuti Paulosi watorekere ku linga la ŵankhondo.

³⁵Wakati wafika pa makwerero ŵasilikari ŵakachita kumunyamura Paulosi, pakuti ŵanthu ŵa mu mzinda ŵakafuntha na ukari.

³⁶Ŵanthu ŵanandi ŵakaŵarondezga na kuchemerezga kuti, “Komani uyo!”

³⁷Apo ŵakatenge ŵamunjizge mu linga, Paulosi wakayowoya ku murara wa ŵankhondo wakati, “Kasi ndingayowoyapo namwe?” Murara wa ŵankhondo wakamufumba wakati, “Kasi ukumanya chiGriki?

³⁸Ipo kuti ndiwe muEguputo chara uyo kale wakawuska chivulupi na kurongozgera mu mapopa vigeŵenga vikwi vinayi?”

³⁹Paulosi wakazgora wakati, “Ine ndine muYuda, wa mu Taraso wa mu Kilikiya, mwenekaya wa msumba wakumanyikwa, ndaŵeya mundizomerezge kuti ndiyowoye na ŵanthu aŵa.”

⁴⁰Murara wa ŵankhondo wakamuzomerezga. Ntheura Paulosi wakimilira pa makwerero, wakaŵachetamiska ŵanthu na mawoko ghakhe ndipo ŵakati ŵachetama wakamba kuŵayowoyera mu chiHebere wakati,