Read new_tumbuka_bible Milimo ya Ŵakutumika 23 Bible Online

Milimo ya Ŵakutumika 23 - new_tumbuka_bible bible

Milimo ya Ŵakutumika 23

¹Paulosi wakaŵadodoliska ŵa mphara yikuru ya ŵaYuda ndipo wakati, “Mwa ŵanyane, ine ndakhara na njuŵi yiweme panthazi pa Chiuta kufikira muhanya uno.”

²Musofi Mukuru Hananiya wakaŵalangula awo ŵakimilira pafupi na Paulosi kuti ŵamutimbe pa mlomo.

³Ntheura Paulosi wakati kwa iyo, “Nadi Chiuta wati wakutimbe iwe, wa mweneiwe wati tuu nga nchimati cha utoto utuŵa! Wakhara apo na kunderuzga ine kwakuyana na dango, kweni ukuswaso dango pakulangula kuti ine nditimbike!”

⁴Ndipo ŵanthu awo ŵakimilira pafupi na Paulosi ŵakamuphalira ŵakati, “Ukutuka Musofi Mukuru wa Chiuta!”

⁵Ndipo Paulosi wakati “Mwa ŵanyane, ndangumanya chara kuti ndi Musofi Mukuru, pakuti Malembo ghakuti, ‘Ureke ungatukanga wakuwusa wa ŵanthu ŵa ku kwinu.’ ”

⁶Para Paulosi wakapanikizga kuti ŵanji ŵakaŵa ŵaSaduki, ndipo ŵanji ŵaFarisi, wakachemerezga mukati mu mphara wakati, “Mwa ŵanyane, ndine muFarisi, mwana wa muFarisi. Nkhweruzgika pano, chifukwa ndili na chigomezgo chakuti ŵakufwa ŵamkuwuka.”

⁷Ndipo wakati wayowoya ichi, ŵaFarisi na ŵaSaduki ŵakamba kususkana ndipo mzinda ukagaŵikana.

⁸(Pakuti ŵaSaduki ŵakuyowoya kuti, kulije chiwuka, kulije ŵangelo, kulijeso mizimu. Kweni ŵaFarisi ŵakupulikana mu vyose.)

⁹Ntheura kukaŵa chiwawa chikuru, ndipo ŵamanyi-marango ŵanji ŵa mu chipani cha ŵaFarisi ŵakimilira na kususka chomene, ŵakati, “Kuti tikusangamo kanthu kaheni mu munthu uyu chara. Tikumanya chara, panji ndi Mzimu, panji ndi mungelo wali kuyowoya nayo?”

¹⁰Apo kususkana kukarutilira chomene, murara wa ŵankhondo pakopa kuti Paulosi wangaparurika, wakaŵalangula ŵasilikari ŵakhe kuti ŵakhire na kuya kamukwapura mukati mu ŵanthu na kumunjizga mu linga lawo.

¹¹Usiku wenewura Fumu yikimilira pafupi na iyo yikati, “Khwima mtima!” Nga ndi umo wanguŵira kaboni wane muno mu Yerusalemu, ntheura ndimo ukaŵireso kaboni wane na mu Romu wuwo.

¹²Kukati kwacha, ŵaYuda ŵakachitira chiŵembu Paulosi, ndipo ŵakarapa kuti ŵati ŵaryenge chara nanga nkhumwa, ŵasuke ŵamukome.

¹³Awo ŵakanozgera chiŵembu ichi ŵakajumpha 40.

¹⁴Ŵanthu aŵa ŵakaruta ku ŵasofi ŵarara na ku ŵarara ŵa ŵaYuda ŵakati, “Tili kurapa kuti, tireke kucheta kanthu tisuke timukome Paulosi.

¹⁵Ntheura imwe pamoza na ŵa mphara yikuru, mutume mazgu ku murara wa ŵankhondo ya ŵaRoma kuti ŵakhilire nayo Paulosi kwa imwe. Imwe muŵe nga ndi para mukukhumba kusanda makora vya mrandu wakhe. Ndipo tili ŵakunozgeka kumukoma pambere wandafike kufupi.”

¹⁶Kweni muphwa wa Paulosi wakapulika kuti ŵamkumukhazga, ntheura wakaya kanjira mu linga na kumwandulira Paulosi.

¹⁷Penepapo Paulosi wakachema yumoza wa ŵarara wa ŵankhondo wakati, “Mwana uyu ukamupereke ku mukuru wa ŵankhondo, wali na kanthu kakumuphalira.”

¹⁸Ntheura murongozgi wa ŵankhondo yura wakamutora na kuruta nayo ku murara wa ŵankhondo, ndipo wakati, “Mukayidi yura, Paulosi, wangundichema, ndipo wangundiphalira kuti ndize na mwana uyu kwa imwe, pakuti wali na kanthu kakumuphalirani.”

¹⁹Penepapo mukuru wa ŵankhondo wakamukora pa kawoko na kuya kamilira nayo pa mphepete, wakamufumba wakati, “Nchichi icho ukukhumba kundiphalira?”

²⁰Muphwa wa Paulosi wakati, “Na machero, ŵaYuda ŵapangana kwiza kamurombani kuti Paulosi mumutorere ku mphara, kuti ŵaŵe nga ndi para ŵakukhumba kusanda makora vya mrandu wakhe.

²¹Mureke kuŵapulikira chifukwa pali ŵanthu ŵawo kujumpha 40, ŵeneawo ŵanozgera kuya kamukhazga. Ŵanthu aŵa wose ŵarapa kuti ŵaryenge chara nanga nkhumwa, ŵasuke ŵamukome Paulosi. Sono mbakunozgeka kuchifiska ichi, ndipo ŵakulindirira icho muti mudumure.”

²²Mukuru wa ŵankhondo yura wakamuwezga munyamata yura, wakati wamuchenjezga kuti, “Ureke kuphalirapo munthu nanga njumoza kuti wandiphalira ichi.”

²³Ntheura mukuru wa ŵankhondo wakachema ŵarara ŵaŵiri mwa ŵankhondo, wakaŵaphalira wakati, “9 koloko na usiku muŵe ŵakunozgeka na ŵankhondo 200, kuruta ku Kesareya pamoza na ŵankhondo ŵakukwera pa mahachi 70, ndiposo na ŵankhondo ŵakukorera mikondo 20.

²⁴Munozgerepo ŵakavalo ŵanji kuti Paulosi wakwerepo, ndipo mukamupereke makora kwa Felike, mukuru wa chigaŵa.”

²⁵Ndipo mukuru wa ŵankhondo wakalemba karata ntheura:

²⁶“Ndine Kilaudiyo Lusiyasi, kwa imwe ŵakutumbikika Felike, mukuru wa chigaŵa. Nkhumutauzgani.

²⁷Munthu uyu ŵaYuda ŵakamukora ndipo ŵakaŵa pafupi waka kumukoma. Nkhati ndamanya kuti ndi mwenekaya wa chiRoma, nkharuta na ŵasilikari ŵane kuya kamuthaska.

²⁸Nkhakhumba kumanya icho ŵakamupacha nacho, ntheura nkhiza nayo ku mphara yawo.

²⁹Nkhasanga kuti ŵakumupacha na chinthu icho chikukhwaska marango ghawo, kweni palije kanthu ako wangakomekerapo panji kukakikirapo.

³⁰Para nkhati ndaphalirika kuti ŵaYuda ŵakumuchitira chiŵembu munthu uyu, penepapo nkhamutuma kwa imwe. Nkhalangula awo ŵakumupacha kuti ŵize kayowoya ivyo ŵakumupacha navyo pa maso pinu.”

³¹Ntheura ŵasilikari, ŵakamutora Paulosi nga ndi umo wakalangulikira, na kuruta nayo na usiku ku Antipatiri.

³²Na machero ghakhe, ŵakawerera ku muzi wa ŵasilikari na kureka ŵasilikari ŵa pa mahachi kurutilira nayo.

³³Apo ŵakati ŵafika ku Kesareya na kupereka karata ku mukuru wa chigaŵa, ŵakamupereka Paulosi mu mawoko ghakhe.

³⁴Pakuŵazga karata, mukuru wa chigaŵa wakamufumba Paulosi, ku chigaŵa icho wakafumiranga. Apo wakati wamanya kuti wakafumiranga ku Kilikiya, wakati,

³⁵“Nditi ndikupulike para ŵafika awo ŵakukupacha.” Ntheura mukuru wa chigaŵa wakalangula kuti Paulosi ŵasungilirike mu nyumba ya ufumu Herode.