Read new_tumbuka_bible Milimo ya Ŵakutumika 24 Bible Online

Milimo ya Ŵakutumika 24 - new_tumbuka_bible bible

Milimo ya Ŵakutumika 24

¹Ghakati ghajumphapo mazuŵa ghankhonde, Musofi Mukuru Hananiya wakikha pamoza na ŵarara ŵanji ndiposo na mumanyi-marango yumoza zina lakhe Tereturo ndipo ŵakaphara ivyo ŵakamupacha navyo Paulosi panthazi pa nduna Felike.

²Para Paulosi wakati wachemeka, Tereturo wakamba kumupacha wakati, “Mwa ŵakuchindikika, Felike, urongozgi winu wa mahara watiŵika mu mutende kwa nyengo yitali, ndipo vinthu vinandi vyasinthikira ku uweme mu charu chithu.

³Mu nthowa yiliyose, na kosekose, ichi tikupokerera na kuwonga kose.

⁴Kweni kwambula kumutayirani nyengo nkhumuŵeyani kuti mu lusungu lwinu mupulike ivyo tili navyo mwakudumula.

⁵Munthu uyu tamusanga kuti ngwa kusuzga nadi. Mu charu chose, wakuwuska viwawa mukati mu ŵaYuda wose, ndipo ndi murongozgi wa kampingo ka mupatuko ka ŵaNazarete.

⁶Ndiposo wakakhumba kukazuzga Nyumba ya Chiuta, kweni tikamukora. [Tikatenge timweruzge kwakuyana na marango ghithu,

⁷kweni murara wa ŵankhondo Lusiyasi wakiza kamuwuskako kwa ise na nkhongono zikuru.

⁸Ndipo wakalangula kuti awo ŵakumupacha ŵize kwa imwe.] Usange mungamufumba munthu uyu, muti muvisange mwekha vinthu ivyo ise tikumupacha navyo.”

⁹ŴaYuda nawo ŵakazomerezgana nayo Tereturo pakukhozgera kuti ndimo vikaŵira nadi.

¹⁰Apo mukuru wa chigaŵa wakamusinizga kuti wayowoye, Paulosi wakati, “Pakumanya kuti mwaŵa mweruzgi wa fuko ili kwa virimika vinandi, nkhujivikirira mwakukondwa.

¹¹Mungapanikizga mwekha unenesko kuti palije kujumphapo mazuŵa 12 apo nkharuta ku Yerusalemu kuya kasopa.

¹²ŴaYuda kuti ŵakandisanga nkhususkana na munthu waliyose chara, nesi kundisanga kuti nkhukhuŵirizga chivulupi mukati mu ŵanthu, manyi ndi mu Nyumba ya Chiuta panji mu nyumba zawo zakusoperamo, panji mu msumba.

¹³Kuti ŵangamupanikizgirani chara pa chimoza cha ivyo ŵakundipacha navyo.

¹⁴Nanga ndi ntheura, icho nkhuzomera panthazi pinu nchakuti, nkhusopa Chiuta wa ŵasekuru pakurondezga Nthowa iyo iwo ŵakuti nkhampingo ka mpatuko. Kweniso nkhupulikana na vyose ivyo vili kulembeka mu Dango la Mozesi na nchimi,

¹⁵pakugomezga mwa Chiuta uyo iwo nawo ŵakumuzomera kuti ŵanthu wose ŵarunji na ŵaheni ŵamkuwuka ku ŵakufwa.

¹⁶Ntheura nyengo zose nkhuyezga chomene kuŵa na njuŵi yiweme panthazi pa Chiuta na panthazi pa ŵanthu.

¹⁷“Vikati vyajumphapo virimika vinyakhe nkhiza na kuyeghera ŵa fuko lane vya lusungu pamoza na vyakupereka.

¹⁸Apo nkhachitanga mlimo uwu, iwo ŵakiza kandisanga mu Nyumba ya Chiuta, para nkhati ndamarizga mlimo wakujitozga. Kukaŵa mzinda chara, nanga nchiwawa.

¹⁹Kweni ŵaYuda ŵakafumira ku Asiya, ndiwo mphanyi ŵiza panthazi pinu, kuti ŵandipache usange ŵali nako kanthu kakundisuska.

²⁰Panji ŵanthu awo ŵali pano ŵaphare uheni uwo ŵakasanga apo nkhimilira panthazi pa mphara yawo.

²¹Kupatulako chimoza pera para nkhachemerezga kuti, ‘Nkhweruzgika panthazi pinu muhanya uno, chifukwa ndili na chigomezgo chakuti ŵakufwa ŵamkuwuka,’ nkhayowoya na mazgu ghakukwera apo nkhimilira mukati mwawo.”

²²Ntheura Felike pakumanya makora na za Nthowa iyi, wakimika mrandu. Wakaŵaphalira kuti, “Ndizamkudumula mrandu uwu para Lusiyasi murara wa ŵankhondo wafika.”

²³Wakamulangula murara wa ŵankhondo kuti wamusungilire Paulosi mu gadi, kweni wamupengeko wanangwa ndiposo wareke kukanizga ŵabwezi ŵakhe kumuchitira ivyo wangakhumba.

²⁴Ghakati ghajumphapo mazuŵa ghanji, Felike wakiza pamoza na muwoli wakhe wa chiYuda zina lakhe Durusila. Wakamuchema Paulosi ndipo wakamupulika apo wakayowoyanga na za chipulikano mwa Khristu Yesu.

²⁵Apo Paulosi wakarutilira kuyowoya na vya urunji, kujikora na weruzgi uwo ukwiza, Felike wakatenthema, ndipo wakazgora kuti, “Kwa sono rutanga, para ndasanga nyengo ndizamkukuchema.”

²⁶Kweniso pa nyengo yeneyira, Felike wakagomezganga kuti Paulosi wati wamupenge ndarama, ndicho chifukwa wakamuchemanga kaŵirikaŵiri na kudumbiskana nayo.

²⁷Pakati pajumpha virimika viŵiri, Porokiyo Fesito wakahalira malo gha Felike kuŵa mukuru wa chigaŵa. Kweni Felike pakukhumba kukondweska ŵaYuda wakamureka Paulosi mu gadi.