Read new_tumbuka_bible Milimo ya Ŵakutumika 28 Bible Online

Milimo ya Ŵakutumika 28 - new_tumbuka_bible bible

Milimo ya Ŵakutumika 28

¹Tikati tafika makora ghene ku mlima, tikapulika kuti zina la chirwa chira ndi Melita.

²Ŵenecharu ŵakaŵa ŵanthu ŵa lusungu chomene mwakuti wakapemba moto na kutipokerera, pakuti vura yikarokwanga ndipo kukazizima.

³Paulosi wakaya kathenya mzigho wa nkhuni. Para wakaziŵikanga pa moto, njoka ya chipiri yikafuma mu mzigho pakuchimbira chithukivu, ndipo yikamudemerera pa woko.

⁴Para ŵenecharu ŵakawona njoka yira yikulendera pa woko la Paulosi, ŵakayowoyeskana ŵakati, “Munthu uyu wakwenera kuŵa chigeŵenga. Nangauli wapona ku nyanja, urunji kuti ukumuzomerezga chara kuŵa wamoyo.”

⁵Paulosi wakamijulira njoka yira pa moto kweni kuti wakapweteka chara.

⁶Kweni iwo ŵakalindiriranga na chigomezgo chakuti watupenge, panji kwa mabuchibuchi wati wawenge pasi na kufwa penepapo. Sono ŵakati ŵalindizga nyengo yitali kwambula kuwona kanthu kaheni kakumuwira, ŵakasintha maghanoghano ghawo ndipo ŵakayowoyeskana ŵakati, “Munthu uyu ndi chiuta.”

⁷Pafupi waka na malo ghara pakaŵa minda ya Pubuliyo, murongozgi wa chirwa chira. Iyo wakatipokerera makora chomene, ndipo wakatipwererera makora chomene kwa mazuŵa ghatatu.

⁸Wiske wa Pubuliyo wakagonanga pasi chifukwa wakaŵa murwari na kuthukira kwa mu thupi pamoza na nthenda ya pa moyo pa ndopa. Paulosi wakanjira mu chipinda chakhe na kuromba ndipo wakaŵika mawoko ghakhe pa iyo na kumuchizga.

⁹Chikati chachitika chinthu ichi, ŵarwari wose ŵa mu chirwa chira ŵakiza ndipo ŵakachizgika.

¹⁰Ŵakatipa vyawanangwa vinandi, ndipo para tikarutanga ŵakatiŵikiramo vyose ivyo tikakavukanga pa ulendo withu.

¹¹Yikati yajumphapo myezi yitatu, tikayamba ulendo withu mu ngaraŵa iyo yikatandara nyengo yose ya chiwuvi mu chirwa chira. Ngaraŵa iyi yikaŵa ya ku Alekizandiriya, yeneiyo chimanyikwiro chakhe chikaŵa cha, “Ŵachiuta ŵa maphaska.”

¹²Tikafika mu msumba wa Sirakusi, ndipo tikatandaramo mazuŵa ghatatu.

¹³Kufuma kura tikazingirira ndipo tikafika mu Regiyo. Likati lajumphapo zuŵa limoza, chimphupuru chikawuka kufumira ku mwera, ndipo pa zuŵa la chiŵiri lakhe, tikafika ku Puteyoli.

¹⁴Kwenekura tikaŵasanga ŵabali mu chipulikano, ndipo ŵakatiromba kuti tikharepo nawo mazuŵa ghankhonde na ghaŵiri. Ndipo Ntheura tikiza ku Romu.

¹⁵Ŵakhristu ŵanyithu kura ŵakati ŵapulika za ise, ŵakiza mpaka pa Musika wa Apiya, na pa Nyumba Zitatu za Ŵalendo kwiza kakumana nase. Para Paulosi wakaŵawona wakawonga Chiuta ndipo wakakhwima mtima.

¹⁶Tikati tafika mu msumba wa Romu, Paulosi wakazomerezgeka kukhara pa yekha na musilikari uyo wakamulondanga.

¹⁷Ghakati ghajumphapo mazuŵa ghatatu, Paulosi wakaŵachemera pamoza ŵarongozgi ŵa chiYuda ŵa kwenekura. Para ŵakati ŵawungana, wakaŵaphalira wakati, “Mwaŵanyane, ine ndili kuno wakukakika kufuma mu Yerusalemu, nangauli ine nkhaŵavye kuŵachitira kanthu kaheni ŵanthu ŵa kwithu, panji maluso gha ŵasekuru, kweni ŵakandikora, na kundipereka ku ŵaRoma

¹⁸Pamanyuma pakundifumbisiska, ŵakakhumba kundifumiska chifukwa ŵakasanga kuti ndilije kwananga kanthu kakuti ndikomekere.

¹⁹Kweni para ŵaYuda ŵakakana, nkhachichizgika kuti mrandu wane urute kwa karonga wa ku Romu, nangauli kuti nkhaŵa na chifukwa chakuŵapacha nacho ŵa fuko lane chara.

²⁰Ndicho chifukwa ndamuchemani kuti ndiwonane na kudumbiskana namwe. Pakuti mpha chifukwa cha chigomezgo cha ŵaIsraele apo ine nkhukakikira na unyoro uwu.”

²¹Ŵakamuzgora ŵakati, “Ise tindapokerepo makarata ghakufuma ku Yudeya, kuphara vya iwe. Palijeso mukhristu munyithu waliyose uyo wali kwizako kuno kuphara vya iwe, panji nesi kuyowoya uheni wa iwe.

²²Kweni takhumbanga kupulika maghanoghano ghako, pakuti tikumanya kuti kosekose ŵanthu ŵakususka kampingo aka ka mupatuko.”

²³Ntheura ŵakapangana zuŵa ilo ŵangakumana nayo Paulosi, ndipo ŵanthu ŵanandi ŵakiza zuŵa lira uko Paulosi wakakharanga. Kufuma ku mulenje mpaka ku mise, Paulosi wakaŵarongosorera na kuŵaphalira vya Ufumu wa Chiuta. Ntheura wakayezga kuŵakhorweska kuti ŵapulikane na Yesu kufuma mu Dango la Mozesi na mu malembo gha nchimi.

²⁴Ŵanji ŵakagomezga mazgu gha Paulosi, kweni ŵanyakhe kuti ŵakagomezga chara.

²⁵Ntheura ŵakawukapo kwambula kuzomerezgana. Kweni ŵachali ŵandawukepo, Paulosi wakayowoya mazgu ghachoko agha ghakuti, “Mzimu Mutuŵa wakaneneska para wakayowoya kwa ŵawiskemwekuru mwa nchimi Yesaya kuti,

²⁶‘Rutanga ku ŵanthu aŵa na kuyowoya kuti, Kupulika muti mupulikenge, kweni muti mupulikiskenge chara. Kulaŵiska muti mulaŵiskenge, kweni muti muwonenge kanthu chara.

²⁷Chifukwa mitima ya ŵanthu aŵa yili kudindiŵara, makutu ghawo ngazitu kupulika, ndipo ŵali kujara maso ghawo. Mzire ŵawone na maso ghawo, ŵapulike na makutu ghawo, ŵamanyiske na mitima yawo, na kuwerera kwa ine kuti ndiŵachizge.’ ”

²⁸“Ntheura manyani ichi, kuti chiponosko ichi cha Chiuta chaperekeka ku ŵamitundu. Iwo ŵati ŵapulikenge!” [

²⁹Para Paulosi wakayowoya mazgu agha, ŵaYuda ŵakawukapo, na kususkana chomene mukati mwawo.]

³⁰Paulosi wakakhara virimika viŵiri pa malo apo wakajilipiranga yekha ndipo wakapokerera wose awo ŵakizanga kwa iyo.

³¹Wakaŵapharazgira vya Ufumu wa Chiuta na kuŵasambizga vya Fumu Yesu Khristu pakweru kwambula kujandizgika na waliyose.