Read new_tumbuka_bible Milimo ya Ŵakutumika 3 Bible Online

Milimo ya Ŵakutumika 3 - new_tumbuka_bible bible

Milimo ya Ŵakutumika 3

¹Zuŵa limoza Petrosi na Yohane ŵakakwereranga ku Nyumba ya Chiuta pa nyengo ya kusopa, pa 3 koloko ku mise.

²Ŵanthu ŵanji ŵakanyamura munthu mweneuyo wakaŵa chiti kufuma pakubabika kwakhe. Munthu yura zuŵa na zuŵa ŵakamuŵikanga pa muryango wa Nyumba ya Chiuta uwo ukachemekanga “Muryango Wakutowa,” mwakuti wapemphenge vyawanangwa ku ŵanthu awo ŵakanjiranga mu Nyumba ya Chiuta.

³Iyo wakati wawona Petrosi na Yohane apo ŵakanjiranga waka mu Nyumba ya Chiuta, wakaŵapempha kuti ŵamupeko vyawanangwa.

⁴Petrosi na Yohane ŵakamudodoliska, ndipo Petrosi wakamuphalira wakati, “Laŵiska kwa ise!”

⁵Munthu yura wakaŵalaŵisiska na kugomezga kuti wapokengeko kanthu.

⁶Kweni Petrosi wakamuphalira kuti, “Ndarama za siliva na golide ndilije, kweni icho ndili nacho ndicho nkhukupa: mu zina la Yesu Khristu wa ku Nazarete, ‘Endanga.’ ”

⁷Ntheura Petrosi wakamukora pa woko la maryero na kumuwuska. Penepapo malundi ghakhe na tusinginini twakhe vikakhomeskeka.

⁸Wakadukira muchanya na kwimilira ndipo wakamba kwenda. Wakanjira mu Nyumba ya Chiuta pamoza nawo uku wakwenda na kudukaduka na kuchindika Chiuta.

⁹Ŵanthu wose ŵakamuwona wakwenda na kurumba Chiuta,

¹⁰ndipo ŵakamupanikizga kuti ndiyo yura nadi mweneuyo wakakharanga pa Muryango Wakutowa wa Nyumba ya Chiuta na kupempha vyawanangwa. Ŵanthu wose ŵakazizwa chomene na kuzukuma na icho chikamuchitikira.

¹¹Apo wa chiti yura wakademereranga Petrosi na Yohane, ŵanthu wose wakazukuma, ndipo ŵakachimbilira pamoza kwiza kwa iwo mu khonde ilo likachemekanga khonde la Solomoni.[1]

¹²Para Petrosi wakawona ichi, wakaŵaphalira ŵanthu wakati, Mwa madoda gha Israele, chifukwa uli mukuzukuma na ichi? Kasi mukutidodoliskirachi nga ndi para tamwendeska munthu uyu na nkhongono zithu panji na urunji withu?

¹³Ndi Chiuta wa Abrahamu, na wa Yisake, na wa Yakhobe, Chiuta wa ŵasekuru ŵithu, uyo wachindika muteŵeti wakhe Yesu, mweneuyo imwe mukamupereka na kumukana panthazi pa Pilato, nangauli iyo wakadumula kuti wamusutule.

¹⁴Mukakana Mutuŵa na Murunji Yura, kweni mukaromba chigeŵenga kuti ndicho chisutulike.

¹⁵Imwe mukakoma mweneuyo nchitopoko cha umoyo, kweni Chiuta wakamuwuska ku ŵakufwa. Ise tili ŵakaboni ŵa cheneichi.

¹⁶Ndipo zina lakhe, na chipulikano mu zina lakhe, vyapereka nkhongono ku munthu uyu mukumuwona na kumumanya. Ndipo chipulikano icho ncha mwa Yesu chapereka umoyo wakufikapo ku munthu uyu pa maso pa imwe mose.

¹⁷“Kweni sono mwa ŵabali, nkhumanya kuti mukachita ichi mu ulemwa, nga ndi umo ŵakachitira ŵarongozgi ŵinu.

¹⁸Kweni Chiuta wakayowoyera kale mu nchimi zose kuti, Mesiya wakhe wakwenera kukomwa ndipo ndicho wali kufiska ntheura.

¹⁹Ipo ng'anamukani na kuwereraso kuti zakwananga zinu zigowokereke,

²⁰mwakuti nyengo ya kuwezgeramo nkhongono yize kufuma kwa Fumu, na kuti yitume Mesiya uyo wali kwimikikira imwe.

²¹Ndiyo Yesu mweneuyo wakwenera kupokerereka kuchanya yisuke yize nyengo ya kukhazikiskira vyose, ivyo Chiuta wakayowoya na milomo ya nchimi zakhe zakupatulika kufuma papo kale.

²²Mozesi wakati, ‘Fumu Chiuta wati wamwimikirani nchimi kufuma mu ŵabali ŵinu nga ndi umo wakandimikira ine. Mwizakamupulikire mu vyose ivyo wizamkumuphalirani.

²³Kwizamkuŵa ntheura kuti yose uyo wakureka kuyipulikira nchimi yeneiyo, wizamkuwuskikamo mu ŵanthu na kukomeka.’

²⁴Nchimi zose kufuma pa Samuele na wose awo ŵakiza kunyuma zakhe, zikapharazga vya mazuŵa ghano.

²⁵Mapangano agho Chiuta wakachita mu nchimi nga imwe, ndipo imwe mukusangana mu phangano ilo Chiuta wakachita na ŵasekuru ŵinu, pakuyowoya kwa Abrahamu kuti, ‘Mu mphapu yako mafuko ghose gha pano pa charu ghizamkutumbikika.’

²⁶Chiuta wakati wawuska muteŵeti wakhe, wakadanga kumutuma kwa imwe kuti wamutumbikani, pakuwezga yose wa imwe kufuma ku nthowa zakhe ziheni.”