Read new_tumbuka_bible Milimo ya Ŵakutumika 4 Bible Online

Milimo ya Ŵakutumika 4 - new_tumbuka_bible bible

Milimo ya Ŵakutumika 4

¹Apo Petrosi na Yohane ŵakaŵa ŵachali kuyowoya ku ŵanthu, ŵasofi na murongozgi wa Nyumba ya Chiuta, na Ŵasaduki, ŵakiza kwa iwo,

²na kukwiya chifukwa ŵakasambizganga ŵanthu na kupharazga ku ŵanthu na kupanikizga mwa Yesu za kuwuka ku ŵakufwa.

³Ntheura ŵakaŵakora, kweni pakuti kukaŵa mise kale ŵakaŵaŵika mu gadi kufikira ku mulenje.

⁴Kweni ŵanandi ŵa iwo awo ŵakapulika Uthenga Uweme ŵakapulikana, ndipo unandi wawo ukaŵa ŵanarume pera vikwi vinkhonde.

⁵Na machero ghakhe ŵarongozgi ŵa ŵaYuda, ŵarara na ŵamanyi-marango ŵakawungana mu Yerusalemu.

⁶Kukaŵaso Anasi Musofi Mukuru na Kayafa, Yohane, Alekizandara na wose awo ŵakaŵa ŵa mu mbumba ya Musofi Mukuru.

⁷Ndipo ŵakati ŵaŵayimika mukati mwawo, ŵakaŵafumba ŵakati, “Kasi ndi nkhongono uli panji ndi mu zina la njani ilo mwachitira chinthu ichi?”

⁸Sono Petrosi pakuzuzgika na Mzimu Mutuŵa wakazgora wakati, “Imwe ŵarongozgi ŵa ŵanthu na mwa ŵarara,

⁹kasi mukutifumba ise muhanya uno na mlimo uweme uwo ukachitika pa munthu uyo wakaŵa chiti, mukuti, wakachizgika uli?

¹⁰Ntheura imwe mose na ŵanthu wose ŵaIsraele, mumanye kuti munthu uyu wakwimilira panthazi pinu wa msuma, ndi chifukwa cha zina la Yesu Khristu wa ku Nazarete uyo imwe mukamupayika pa mphinjika ndipo Chiuta wakamuwuska ku ŵakufwa.

¹¹Vya Yesu uyu, mazgu gha Chiuta ghakuti, ‘Libwe ilo imwe mwa ŵazengi mukalikana, ndilo lazgoka nkhorezgero ya chingodya.’

¹²Mwa iyo pera ndimo muli chiponosko, pakuti kulije zina linyakhe mu charu chose cha pasi ilo liri kuperekeka ku ta ŵanthu mwa leneilo tikwenera kuponoskekeramo.”

¹³Ŵa mphara ŵakati ŵawona chikanga cha Petrosi na Yohane, ŵakazizwa chifukwa ŵakamanya kuti ŵakaŵa ŵanthu ŵalemwa na ŵambula kusambira. Ntheura ŵakapanikizga kuti ŵakakharanga pamoza na Yesu.

¹⁴Kweni pakuwona munthu uyo wakachizgika wakwimilira, ŵakatondeka kuŵasuska.

¹⁵Ntheura ŵakaŵalangula kuti ŵafumemo mu mphara yawo, ndipo iwo ŵakamba kudumbiskana ŵekha,

¹⁶ŵakati, “Kasi tichitechi na ŵanthu aŵa? Chifukwa chamunthondwe icho chachitika na iwo ncha pakweru ku wose awo ŵakukhara mu Yerusalemu, ndipo ise tingachigwentha chara.

¹⁷Kweni kuti chinthu ichi chireke kutandazgika ku ŵanthu wose, tiŵachenjezge kuti ŵareke kuyowoyaso ku munthu waliyose mu zina ili.”

¹⁸Ntheura ŵakaŵachema na kuŵachinyinthizga kuti ŵareke kuyowoya, panji kusambizga mu zina la Yesu.

¹⁹Kweni Petrosi na Yohane ŵakazgora ŵakati, “Mweruzge mwekha usange nchakwenerera panthazi pa Chiuta kuti tipulikire imwe panji Chiuta.

²⁰Kweni ise kuti tingareka chara kuyowoya icho tikachiwona na kuchipulika.”

²¹Ŵa mphara ŵara ŵakati ŵarutilira kuŵachinyinthizga mwakuŵawofya chomene, ŵakaŵareka kuti ŵarutenge. Ŵakatondeka kusanga chifukwa chakuŵalangira, pakuti ŵanthu ŵanandi ŵakamuchindika Chiuta, pa icho chikachitika.

²²Munthu yura uyo chimanyikwiro cha munthondwe ichi chikachitikirapo, wakaŵa wa virimika vyakujumpha 40.

²³Petrosi na Yohane ŵakati ŵasutulika, ŵakaruta ku ŵanyawo na kuŵaphalira vyose ivyo ŵasofi ŵarara na ŵaYuda ŵakayowoya nawo.

²⁴Para ŵanyawo ŵakati ŵapulika, wose na mtima umoza ŵakaromba kwa Chiuta, ŵakati, “Imwe Fumu, ndimwe mukalenga kuchanya na pasi na nyanja, ndiposo na vyose ivyo vilimumo.

²⁵Mwa Mzimu Mutuŵa mukayowoya mwa muteŵeti winu Davide sekuru withu, apo wakati, ‘Chifukwa uli ŵamitundu ŵakukaripa? Kasi nchifukwa uli ŵanthu ŵakupangana vyawakawaka?

²⁶Ŵakaronga ŵa charu cha pasi ŵakanozgekera ndipo ŵakuwusa, ŵakapangana pamoza kwimikana na Fumu na Mesiya wakhe.’

²⁷Pakuti mbunenesko nadi kuti Herode na Pontiyo Pilato pamoza na ŵamitundu na ŵaIsraele ŵakawungana mu msumba uwu kuti ŵamuwukire Yesu, Muteŵeti winu Mutuŵa, uyo mukamuphakazga.

²⁸Ntheura ŵakachita vyose ivyo imwe na nkhongono yinu na khumbo linu mukadumula kale kuti vifiskike.

²⁹Sono Fumu, laŵiskani kofya kwawo, tovwirani ise ta ŵateŵeti ŵinu kuti tiyowoye mazgu ghinu na chikanga chose.

³⁰Nyoroskani woko linu kuti ŵanthu ŵachizgike, ndipo vimanyikwiro vya minthondwe na vyakuzukumiska vichitike mu zina la Yesu muteŵeti winu mutuŵa.”

³¹Para ŵakati ŵamara kuromba, nyumba iyo ŵakawunganamo yikasunkhunyika ndipo wose ŵakazuzgika na Mzimu Mutuŵa, ndipo ŵakarutilira kuyowoya mazgu gha Chiuta na chikanga.

³²Mpingo wose wa ŵakupulikana ukaŵa na mtima umoza, na maghanoghano ghamoza. Pakaŵavye na yumoza uyo wakati pa kalikose ka vinthu ivyo wakaŵa navyo kakaŵa kakhe na kakhe. Vinthu vyose vikaŵa vya masanganaŵana.

³³Ŵakutumika ŵara ŵakarutilira na nkhongono zikuru, kupanikizgira ŵanthu vya chiwuka cha Fumu Yesu. Ntheura uchizi wa Chiuta ukaŵa pa ŵanthu wose.

³⁴Kukaŵavye na yumoza mukati mwawo mweneuyo wakakavuka kanthu. Wose awo ŵakaŵa na minda panji zinyumba, ŵakaguliska, ndipo ndarama zakhe ŵakiza nazo ku ŵakutumika.

³⁵Ndipo iwo ŵakagaŵira munthu yose kwakuyana na umo iyo wakakavukira.

³⁶Ntheura Yosefe, wa fuko la Levi, wakubabikira mu Kipuro, uyo ŵakutumika ŵakamuthya zina lakuti Baranaba (ilo likung'anamula kuti, “Mwana wakukhwimiska”),

³⁷wakaguliska munda wakhe, ndipo ndarama wakiza nazo ku ŵakutumika.