Read new_tumbuka_bible Milimo ya Ŵakutumika 5 Bible Online

Milimo ya Ŵakutumika 5 - new_tumbuka_bible bible

Milimo ya Ŵakutumika 5

¹Kweni munthu munyakhe zina lakhe Hananiya pamoza na muwoli wakhe Safira ŵakaguliska munda wawo,

²ndipo wakati wazomerezgana na muwoli wakhe, wakatorapo ndarama zinyakhe kuti ziŵe zakhe ndipo ndarama zakukharako wakiza nazo ku ŵakutumika.

³Petrosi wakamufumba wakati, “Iwe Hananiya, chifukwa nchichi wazomerezgana na Satana kuti upusike Mzimu Mutuŵa pakutorapo ndarama zinyakhe za munda uwo ukaguliska?

⁴Uchali undawuguliske munda wako, asi ukaŵa wako na wako? Ndipo ukati wawuguliska, asi ndarama zikaŵa mu nkhongono zako? Kasi wazomerezga uli kuti ichi chiŵe mu mtima wako? Kuti wapusika ŵanthu chara, kweni wapusika Chiuta.”

⁵Hananiya wakati wapulika mazgu agha, wakawa pasi ndipo penepapo wakafwa. Ŵanthu wose awo ŵakapulika ichi ŵakaŵa na wofi ukuru chomene.

⁶Ntheura ŵanyamata ŵakiza na kuvungirizga thupi lakhe mu salu, ndipo ŵakamuyeghera kuwaro kuya kamusunga mu dindi.

⁷Ghakati ghajumphapo panji maora ghatatu, muwoli wakhe wakanjira, kwambula kumanya icho chachitika.

⁸Petrosi wakamufumba mwanakazi wakati, “Undiphalire, kasi ndarama izo mwaguliska munda winu, iwe na mufumu wako, nzenezizi?” Muwoli wakhe wakazgora wakati, “Inya tikaguliska pa mtengo weneuwu.”

⁹Petrosi wakamuzgora wakati, “Chifukwa uli mukazomerezgana kuyezga Mzimu wa Fumu? Wona ŵanyamata awo ŵasunganga mufumu wako ŵali pa muryango, ŵati ŵakuyeghere kuwaro na iwe wuwo!”

¹⁰Penepapo mwanakazi yura wakawa pasi panthazi pa Petrosi na kufwa. Para ŵanyamata ŵakanjira, ŵakasanga kuti wafwa kale. Ŵakamuyeghera kuwaro na kuya kamusunga pamoza na mufumu wakhe.

¹¹Ndipo mpingo na wose awo ŵakapulika makani agha, ŵakaŵa na wofi ukuru.

¹²Ŵakutumika ŵakachitanga vimanyikwiro na minthondwe yinandi mukati mu ŵanthu. Ndipo wose ŵakupulikana ŵakakumananga pamoza mu khonde la Solomoni.

¹³Pakaŵavye na yumoza uyo wakajikangarizga kubatikana nawo, ndipouli ŵanthu wose ŵakaŵachindikanga.

¹⁴Ndipo unandi wa awo ŵakapulikana na Fumu, ŵanarume na ŵanakazi ukakuranga chomene.

¹⁵Ntheura ŵarwari ŵakayeghekera mu misewu ya mu misumba, na kuŵagoneka pa vitara na pa mphasa, mwakuti para Petrosi wakujumphapo muzgezge wakhe pera ukhwaske ŵanji ŵa iwo.

¹⁶Ndipo ŵanthu ŵanandi ŵakiza kufuma mu mizi yakuzingirizga Yerusalemu. Ŵakayeghanga ŵarwari na awo ŵakasuzgikanga na mizimu yiheni ndipo wose ŵakachizgikanga.

¹⁷Ntheura Musofi Mukuru na awo ŵakaŵa pamoza nayo, awo mba chipani cha Ŵasaduki, ŵakazura na sanje.

¹⁸Ŵakakora ŵakutumika na kuŵaŵika mu gadi.

¹⁹Kweni na usiku pakati mungelo wa Fumu wakajula miryango ya gadi na kuŵarongozgera kuwaro ŵakutumika ŵara,

²⁰ndipo wakati, “Rutaninge, mukimilire mu Nyumba ya Chiuta na kuŵaphalira ŵanthu mazgu ghose gha umoyo uwu.”

²¹Ŵakati ŵapulika ichi, ŵakaya kanjira mu Nyumba ya Chiuta ku matandakucha, ndipo ŵakamba kusambizga. Para Musofi Mukuru wakiza pamoza na awo ŵakaŵa nayo, wakawunganya ŵa mu mphara yikuruya ŵaIsraele, ndipo ŵakalangula kuti ŵakutumika ŵize nawo kufuma ku gadi.

²²Kweni ŵalinda ŵa Nyumba ya Chiuta ŵakati ŵafika, kuti ŵakaŵasangamo chara mu gadi. Ŵakawerera kunyuma kuya kaphara, ŵakati,

²³“Gadi, tangusanga kuti ndakujarika makora ghene, ndipo ŵalinda ŵa gadi tanguŵasanga ŵakwimilira waka pa muryango. Kweni para tangujula vijaro kuti tangusangamo munthu chara.”

²⁴Pakupulika mazgu agha, murongozgi wa Nyumba ya Chiuta, na ŵasofi ŵarara ŵakazizikika na icho chikachitika ku ŵakutumika ŵara.

²⁵Penepapo munthu yumoza wakiza uyo wakaŵaphalira kuti, “Ŵanthu awo mukaŵika mu gadi ŵali mu Nyumba ya Chiuta ŵakusambizga ŵanthu.”

²⁶Ntheura murongozgi wa mu Nyumba ya Chiuta pamoza na ŵanthu ŵakhe ŵakaruta kuya kaŵatora, kwambula kulimbana nawo, na kwiza nawo ŵakutumika ŵara, chifukwa ŵakopanga kuti ŵanthu ŵangaŵadina na mawe.

²⁷Ŵakati ŵafika nawo, ŵakaŵimika panthazi pa mphara yikuruyira. Musofi Mukuru wakaŵaphalira wakati,

²⁸“Tikamuchinyinthizgani chomene kuti mureke kusambizgaso mu zina ili, kweni sono mwazuzga Yerusalemu na kusambizga kwinu, ndipo mukukhumba kuti mrandu wa ndopa za munthu uyu uŵe pa ise.”

²⁹Kweni Petrosi na ŵakutumika ŵanyakhe ŵakazgora ŵakati, “Tikwenera kupulikira Chiuta kuruska ŵanthu!

³⁰Chiuta wa ŵa sekuru ŵithu wakamuwuska Yesu mweneuyo imwe mukamukoma pakumupayika pa mphinjika.

³¹Chiuta wali kumukwezga ku woko lakhe la maryero kuti waŵe Murongozgi na Muponoski, mwakuti wapereke mwaŵi ku ŵaIsraele kuti ŵang'anamuke mu mtima na kutiso zakwananga zawo zigowokereke.

³²Ise tili ŵakaboni ŵa vyeneivi pamoza na Mzimu Mutuŵa mweneuyo Chiuta wali kuŵapa awo ŵakumupulikira.”

³³Para ŵakati ŵapulika ichi, ŵakakaripa, ndipo ŵakakhumba kukoma ŵakutumika.

³⁴Kweni muFarisi yumoza wa mu mphara ya ŵaYuda zina lakhe Gamaliyele, mumanyi-marango, mweneuyo wakaŵa wakurumbika na ŵanthu wose, wakimilira. Wakalangula kuti ŵakutumika ŵafumiskikire kuwaro pa kanyengo kachoko waka.

³⁵Ntheura wakaŵaphalira ŵa mphara wakati, “Mwa madoda gha Israele, chenjerani na icho mukukhumba kuŵachitira ŵanthu aŵa.

³⁶Pakuti kale, kukawuka Teyudasi uyo wakajiyowoya kuti ndi munthu wakuzirwa, ndipo ŵanarume pafupi 40, ŵakamurondezga. Kweni wakakomeka, ndipo wose awo ŵakamurondezga ŵakaparanyika na kumara waka.

³⁷Pamanyuma pakhe, Yudasi wa ku Galileya, wakawuka pa nyengo yira yakupenda ŵanthu, ndipo nayo, mzinda wa ŵanthu ukamurondezga. Kweni nayo wakakomeka, ndipo wose awo ŵakamurondezganga ŵakaparanyika waka.

³⁸Sono pa mrandu uwu nkhumuphalirani kuti ŵanthu aŵa mungachitanga nawo kanthu chara, muŵareke waka. Usange icho ŵakughanaghana na kuchita chikufumira ku ŵanthu, chiti chimarenge chekha.

³⁹Kweni usange nchakufumira kwa Chiuta, kuti muti muŵatondenge chara, musangike kuti mukulimbana na Chiuta.” Mphara yose yikazomerezga fundo ya Gamaliyele

⁴⁰Ndipo wakaŵachema ŵakutumika na kuŵanjizga mu mphara, ŵakaŵathyapula na kuŵaphalira kuti ŵareke kupharazgaso mu zina la Yesu. Ndipo ŵakaŵareka kuti ŵarutenge.

⁴¹Ŵakutumika ŵara ŵakafuma mu mphara na chimwemwe chikuru, pakuwona kuti Chiuta wakaŵapima kuŵa ŵakwenerera kulengeskeka chifukwa cha zina la Yesu.

⁴²Ndipo zuŵa na zuŵa mu Nyumba ya Chiuta, na mu nyumba za ŵanthu, ŵakutumika ŵakarutilira kusambizga na kupharazga Uthenga Uweme kuti Yesu ndi Mesiya.