Read new_tumbuka_bible Milimo ya Ŵakutumika 6 Bible Online

Milimo ya Ŵakutumika 6 - new_tumbuka_bible bible

Milimo ya Ŵakutumika 6

¹Mu mazuŵa ghara, para unandi wa ŵasambiri ukamba kukura, ŵaYuda awo ŵakayowoyanga chiGriki,[2] ŵakasinginikiranga ŵaYuda awo ŵakayowoyanga chiHebere kuti vyokoro vyawo ŵakavizerezganga pa ivyo vikagaŵikanga zuŵa na zuŵa.

²Ntheura ŵakutumika ŵara 12 ŵakachema mzinda wose wa ŵasambiri ndipo ŵakati, “Kuti kukwenerera chara kuti ise tireke kupharazga mazgu gha Chiuta chifukwa chakutangwanika na mlimo wakugaŵa vyakurya.

³Ntheura mwa ŵabali, sorani mukati mwinu ŵanarume ŵankhonde na ŵaŵiri, ŵeneawo mba lumbiri luweme, ndipo mbakuzura na Mzimu Mutuŵa na mahara, ndiwo tiŵimike pa mlimo uwu.

⁴Kweni ise nyengo yithu yiŵe yakujipereka mu kuromba na mu kupharazga mazgu gha Chiuta.”

⁵Fundo iyi yikakondweska mzinda wose. Ntheura ŵakasora Stefano, munthu wakuzura na chipulikano na Mzimu Mutuŵa, Filipu, Porokoro, Nikanora, Timoni, Paramena, na Nikolasi wa ku Antiyoke, uyo wakarondezga chiYuda.

⁶Ŵanthu aŵa ŵakiza nawo ku ŵakutumika awo ŵakaŵarombera na kuŵika mawoko pa iwo.

⁷Ntheura mazgu gha Chiuta ghakarutilira kutandazgika. Unandi wa ŵasambiri mu Yerusalemu ukakulirangakuliranga, ndipo ŵasofi ŵanandi ŵakapulikana.

⁸Sono Stefano pakuzura na uchizi na nkhongono, wakachitanga vya minthondwe vikuru na vimanyikwiro vyakuzizwiska mukati mu ŵanthu.

⁹Sono ŵaYuda ŵanji ŵa mu nyumba ya kusoperamo ya ŵanthu ŵakuwombokwa (nga ndi umo yikachemekeranga), awo ŵakafuma ku Kurene na Alekizandiriya pamoza na ŵanyakhe awo ŵakafuma ku Kilikiya na ku Asiya, ŵakasuskana nayo Stefano.

¹⁰Kweni ŵakatondeka kumuruska, chifukwa iyo wakayowoyanga na mahara agho Mzimu wakamupa.

¹¹Ntheura ŵakapangana na ŵanthu ku ubende kuti ŵayowoye kuti, “Tikamupulika uyu wakutuka Mozesi na Chiuta.”

¹²Ntheura ŵakakhuŵirizga ŵanthu, ŵarara na ŵamanyi-marango. Wose ŵakiza kwa Stefano, ŵakamukora na kumutorera ku mphara ya ŵaYuda.

¹³Ndipo ŵakamutorera ŵakaboni ŵa utesi ŵeneawo ŵakayowoya kuti, “Munthu uyu nyengo zose wakuyowoya mazgu gha kunyoza Nyumba ya Chiuta agha na Dango la Mozesi.”

¹⁴Tikamupulika wakuyowoya kuti Yesu wa ku Nazarete wizamkupankhura malo agha na kusintha maluso ghose agho Mozesi wali kutirekera!

¹⁵Wose awo ŵakaŵa mu mphara ŵakadodoliska Stefano, ndipo ŵakawona kuti chisko chakhe chikaŵa nga ncha mungelo.