Read new_tumbuka_bible Milimo ya Ŵakutumika 8 Bible Online

Milimo ya Ŵakutumika 8 - new_tumbuka_bible bible

Milimo ya Ŵakutumika 8

¹Sauli nayo wakazomerezga kukomeka kwa Stefano. Pa zuŵa lenelira mpingo wa Chiuta uwo ukaŵa mu Yerusalemu ukamba kuzikizgika chomene. Ŵakupulikana wose, kupatulako ŵakutumika ŵakaparanyikira kosekose mu vigaŵa vya Yudeya na Samariya.

²Ŵakhristu ŵakugomezgeka ŵakamusunga Stefano, na kumulira chomene.

³Kweni pa nyengo iyi Sauli wakaparanyanga chomene mpingo wa Chiuta. Wakanjiranga mu nyumba iyi na iyi na kuŵaguguza ŵanarume na ŵanakazi na kuya kaŵanjizga mu gadi.

⁴Ŵakupulikana wose ŵara awo ŵakaparanyika ŵakaruta kosekose na kupharazga Uthenga Uweme.

⁵Filipu wakakhilira ku msumba wa Samariya na kupharazgira ŵanthu vya Mesiya.

⁶Mizinda ya ŵanthu yikategherezga chomene na mtima umoza ivyo Filipu wakayowoyanga, apo ŵakamupulika na kuwona milimo ya minthondwe iyo wakachita.

⁷Pakuti mizimu yiheni yikafumanga na nchemerezgo yikuru chomene mu ŵanthu awo ŵakaŵa nayo. Ŵanthu ŵanandi awo ŵakaŵa na nthenda yakuphapa na ŵakupendera ŵakachizgikanga.

⁸Ntheura mukaŵa chimwemwe chikuru mu msumba ura.

⁹Mu msumba wa Samariya, mukaŵa munthu zina lakhe Simoni uyo kale wakazukumiskanga ŵanthu ŵanandi na kuwukwa uko wakachitanga. Wakajiyowoyanga kuti iyo ndi munthu mukuru.

¹⁰Ŵanthu wose ŵa mu msumba ura, ŵachoko na ŵarara, ŵakategherezganga chomene kwa iyo ndipo ŵakatenge, “Munthu uyu ndi nkhongono ya Chiuta iyo yikuchemeka kuti ‘Yikuru.’ ”

¹¹Ŵakategherezganga kwa iyo chifukwa pa nyengo yitali wakaŵazukumiskanga na kuwukwa kwakhe.

¹²Kweni para Filipu wakati waŵapharazgira Uthenga Uweme wa Ufumu wa Chiuta, na zina la Yesu Khristu, ŵakapulikana ndipo ŵakabapatizika, wose ŵanarume na ŵanakazi.

¹³Simoni nayo wakapulikana na kubapatizika, ndipo wakarondezganga Filipu kose uko wakarutanga. Para wakawonanga vimanyikwiro na minthondwe iyo yikachitikanga, wakazizwanga.

¹⁴Para ŵakutumika ŵa mu Yerusalemu ŵakapulika kuti ŵanthu ŵa ku Samariya ŵapokerera mazgu gha Chiuta, ŵakatumako Petrosi na Yohane.

¹⁵Iwo ŵakakhilira kwenekura na kuŵarombera kuti ŵapokere Mzimu Mutuŵa.

¹⁶Ŵanthu aŵa ŵakaŵa ŵandapokere Mzimu Mutuŵa, kweni ŵakabapatizika waka mu zina la Fumu Yesu.

¹⁷Ntheura ŵakaŵika mawoko ghawo pa iwo, ndipo ŵakapokera Mzimu Mutuŵa.

¹⁸Sono Simoni wakati wawona kuti Mzimu Mutuŵa ukapika ku ŵakupulikana, para ŵakutumika ŵakaŵika mawoko ghawo pa iwo, wakapereka ndarama kwa Petrosi na Yohane,

¹⁹na kuti, “Naneso mundipeko nkhongono iyi, mwakuti yose uyo ndamkuŵikapo mawoko ghane wakamanye kupokera Mzimu Mutuŵa.”

²⁰Kweni Petrosi wakati kwa iyo, “Ndarama zako zivundire pamoza nawe chifukwa ukughanaghana kuti ungagula chawanangwa cha Chiuta na ndarama!

²¹Iwe kuti uli na chigaŵa panji phande mu uteŵeti uwu chara, chifukwa mtima wako kuti ngwa kunyoroka chara panthazi pa Chiuta.

²²Ntheura zgokako ku uheni uwu na kuromba Fumu kuti, usange nchamachitiko, panji yingakugowokera maghanoghano gha ntheura gha mu mtima wako.

²³Pakuti nkhuwona kuti mtima wako uli kwanangika na kuŵaŵa kwa kutukutwa ndiposo ndiwe wakukakika na zakwananga.”

²⁴Penepapo Simoni wakazgora wakati, “Ndiromberani ndimwe kwa Fumu, mwakuti ivyo mwayowoya vireke kundiwira.”

²⁵Ŵakati ŵapereka ukaboni wawo, na kupharazga mazgu gha Fumu, ŵakawerera ku Yerusalemu, uku ŵakupharazga Uthenga Uweme mu vikaya vinandi vya ŵaSamariya.

²⁶Mungelo wa Fumu wakayowoya na Filipu wakati, “Wuka, urutenge kurazga ku mwera ku msewu uwo ukukhilira ku Gaza kufuma ku Yerusalemu.” Uwu ndi msewu uwo ukuporota mu chiparamba.

²⁷Filipu wakawuka na kuruta, ndipo wakawona muEtiyopiya, uyo wakaŵa nthunguli, wakwiza kufuma ku Yerusalemu uko wakaruta kuya kasopa. Iyo wakaŵa nduna yikuru ya Fumukazi Kandake ya charu cha Etiyopiya, ndipo ndiyo yikasungiliranga chuma chakhe chose.

²⁸Nthunguli yira yikakhara mu gareta lakhe, ndipo yikaŵazganga mazgu gha nchimi Yesaya.

²⁹Ndipo Mzimu wakamuphalira Filipu kuti, “Ruta ukakumane na gareta lira.”

³⁰Sono Filipu wakachimbilira kwa iyo ndipo wakayipulika yikuŵazga Buku la nchimi Yesaya. Ntheura wakayifumba wakati, “Kasi mukupulikiska ivyo mukuŵazga?”

³¹Iyo wakazgora wakati, “Ndingapulikiska uli kwambula kuti munthu yunji wandirongosorera?” Ntheura yikamuchema Filipu kuti wakwere mu gareta na kukhara nayo pamoza.

³²Malembo agho yikaŵazganga ghakaŵa agha: “Nga ndi mberere iyo yarongozgekera ku kukomeka. Nga ndi mwana-mberere uyo wakhara waka chete pakumusenga weya. Ntheura iyo kuti wakajula mlomo wakhe chara.

³³Wakayuyurika ndipo pakaŵavye wakumuchitira urunji. Ndi njani wati wakonkhoske za mphapu yakhe? Pakuti umoyo wakhe wawuskikako ku charu cha pasi?”

³⁴Nthunguli yira yikamufumba Filipu yikati, “Nkhumuŵeyani mundiphalire, kasi nchimi iyi yikuyowoya vya njani? Vya iyo yekha, panji munthu munyakhe?”

³⁵Ntheura Filipu wakayiphalira Uthenga Uweme wa Yesu kwamba pa malembo gheneagha.

³⁶Apo ŵakikhanga mu msewu ŵakafika pa malo apo pakaŵa maji. Nthunguli yira yikati, “Wonani, maji asi agha! Kasi nchichi icho chinganditondeska kuti ndibapatizike?” [

³⁷Filipu wakayizgora wakati, “Ungamanya kubapatizika usange ukupulikana na mtima wose.” Iyo wakati, “Nkhupulikana kuti Yesu Khristu ndi Mwana wa Chiuta.”]

³⁸Nthunguli yikalangula kuti gareta limilire. Ndipo wose ŵaŵiri wuwo, Filipu na nthunguli, ŵakanjira mu maji ndipo Filipu wakayibapatiza.

³⁹Para ŵakati ŵazuwuka mu maji, Mzimu wa Fumu ukamutora Filipu, ntheura nthunguli kuti yikamuwonaso chara, kweni yikarutilira pa ulendo wakhe na kukondwa kukuru.

⁴⁰Kweni Filipu wakaya kasangika kuti wali ku Azoto, wakwendakapharazga Uthenga Uweme mu mizi yose, mpaka wakaya kafika ku Kesareya.