Read new_tumbuka_bible Ŵaroma 1 Bible Online

Ŵaroma 1 - new_tumbuka_bible bible

Ŵaroma 1

¹Kufuma kwa ine Paulosi, muteŵeti wa Khristu Yesu, ndipo wakutumika na wakuchemeka na Chiuta kuti ndipharazge Uthenga wakhe Uweme,

²uwo Chiuta wakapangana kale mu nchimi zakhe nga ndi umo kuli kulembekera mu Malembo Ghatuŵa.

³Uthenga Uweme ngwa vya Mwana wakhe, Fumu yithu Yesu Khristu, uyo kwakuyana na unthu wakababika mu mphapu ya Davide.

⁴Kweni nga ndi utuŵa wa uChiuta wakhe, kukupanikizga na nkhongono za Mzimu kuti Yesu Khristu Fumu yithu ndi Mwana wa Chiuta pakuwuskika ku ŵakufwa.

⁵Mwa iyo Chiuta wakaŵa wa uchizi na ise kuti tiŵe ŵakutumika ŵakhe, mwakuti tirongozge ŵamitundu yose kuti ŵamugomezge na kumupulikira. Mwa ntheura zina lakhe lichindikike.

⁶Imwe namwe muli ŵamoza ŵa ŵamitundu, imwe Chiuta wali kumuchemani kuti muŵe ŵakhe ŵa Yesu Khristu.

⁷Nkhulembera mose imwe muli mu Romu, imwe Chiuta wakumutemwani, ndipo wali kumuchemani kuti muŵe ŵanthu ŵakhe na ŵakhe. Uchizi na mutende vyakufumira kwa Chiuta Ŵadada na kwa Fumu yithu Yesu Khristu, viŵenge namwe.

⁸Pakudanga, nkhumuwonga Chiuta wane mwa Yesu Khristu, chifukwa cha imwe mose, pakuti chipulikano chinu chikupharazgika mu charu chose cha pasi.

⁹Chiuta mweneuyo nkhumuteŵetera na mzimu wane, pakupharazga Uthenga Uweme wa Mwana wakhe ndiyo kaboni wane. Iyo wakumanya kuti nyengo zose, nkhumukumbukani mu malurombo ghane.

¹⁰Nkhuromba kuti Chiuta mu khumbo lakhe, sono pa umaliro wandizomerezge kuti ndiŵe na mwaŵi wakumuchezgerani.

¹¹Nkhunweka chomene kumuwonani mwakuti ndimugaŵiraniko vyawanangwa vya uzimu kuti muŵe ŵankhongono,

¹²uko ndiko kuti tikhomeskanenge yumoza na munyakhe mu chipulikano icho tili nacho.

¹³Nkhukhumba kuti mumanye mwa ŵabali ŵane, kuti nyengo zinandi ndakhumbanga kwiza kwa imwe. Kweni vinthu vinyakhe vyandikanizganga kuti ndize. Nkhukhumba kuti kwa imwe nako ndizakasangeko vipambi vya ŵakupulikana nga ndi umo ndasangira vipambi vya ŵakupulikana mu ŵamitundu ŵanyakhe.

¹⁴Pakuti nkhuchichizgika kupharazga ku ŵanthu wose, ku ŵakuwuka na ku ŵanthu ŵa pasi, ku ŵakusambira na ku ŵambula kusambira.

¹⁵Ntheura nkhunwekera kupharazga Uthenga Uweme na kwa imwe wuwo, imwe mukukhara mu msumba wa Romu.

¹⁶Ine kuti ndili na soni na Uthenga Uweme chara chifukwa ndi nkhongono ya Chiuta yakuponoska wose awo ŵakupulikana, pakudanga ŵaYuda, pamanyuma ku ŵamitundu.

¹⁷Pakuti Uthenga Uweme ukuvumbula umo Chiuta wakurunjiskira ŵanthu na iyomwene. Ndi mu chipulikano kufuma ku mutendeko kuya kafika ku umaliro. Nga ndi umo kuli kulembekera kuti, “Murunji wati waŵenge wamoyo kwizira mu chipulikano.”

¹⁸Ukari wa Chiuta ukuvumbukwa kufuma kuchanya pa uheni wose na ubendezi wose wa ŵanthu, ŵeneawo mauheni ghawo ghakatindiŵizga kuti unenesko umanyikwe.

¹⁹Chiuta wamkuŵalanga chifukwa vyose ivyo munthu wangavimanya vya Chiuta, vili pakweru.

²⁰Pakuti kwamba pa nyengo iyo Chiuta wakalengera charu, kaŵiro kakhe kambula kuwoneka, nga ndi nkhongono yakhe ya muyirayira na uChiuta wakhe, kakuwoneka pakweru mu vinthu ivyo Chiuta wali kulenga. Ntheura ŵanthu aŵa kuti ŵamkuŵa na mpandira chara.

²¹Pakuti nangauli ŵakamumanya Chiuta, kweni kuti ŵakamupa nchindi zakumwenerera chara, nanga nkhumuwonga, kweni ŵakaŵa ŵawakawaka mu kaghanaghaniro kawo ndipo mitima yawo yakupusa yili kuzura na mdima.

²²Nanga ŵakajichema kuti mbamahara, ŵakazgoka vindere.

²³Mu malo mwakusopa Chiuta wa uchindami na wa muyirayira, iwo ŵakusopa vikozgo vyakukozgana na munthu uyo ngwa kumara panji vikozgo vya viyuni, panji vinyama, panji vyakukhwaŵa.

²⁴Ntheura Chiuta wakaŵalegherezga waka kuti ŵachite vya ukazuzi kwakuyana na maulamphalampha gha mitima yawo kuti mpaka ŵakazuzge mathupi ghawo,

²⁵chifukwa ŵakasinthiska unenesko wa vya Chiuta na kutora utesi, ndipo ŵakasopa na kuteŵetera vinthu ivyo Chiuta wali kulenga mu malo mwakusopa na kuteŵetera Mlengi, mweneuyo ngwa kuchindikika kwa muyirayira. Ameni.

²⁶Chifukwa cha vyeneivi Chiuta wakaŵalegherezga waka ku maulamphalampha ghachikhozga soni, ghakuchita vya ukazuzi. Nanga mbanakazi nawo kuti ŵakukhumba kukumana pakati pa mwanarume na mwanakazi chara umo kaliri kaŵiro. Kweni mukurakaraka kwawo, ŵakukhumbirana kukumana mwanakazi na mwanakazi munyakhe.

²⁷Ntheura pera na ŵanarume nawo, mu malo mwakuti ŵakumane pakati pa mwanakazi na mwanarume, ŵakulakalaka kukumana mwanarume na mwanarume munyakhe. Ŵanarume awo ŵakuchitirana vya ukazuzi ivi na ŵanarume ŵanyawo, ŵakujichemera chilango chakuŵenerera pa machitiro ghawo ghaheni.

²⁸Chifukwa ŵanthu ŵa ntheura ŵakapima kuti nchambula kwenerera kumumanya Chiuta, rekani Chiuta wakaŵajowola waka ku maghanoghano ghawo gha kupusa. Wakaŵareka kuti ŵachite vinthu ivyo kuti ŵakwenera kuchita chara.

²⁹Ŵali kuzura na maubendezi gha mitundumitundu, nga ndi uheni, udokezi, maulamphalampha. Ŵali kuzura na sanje, chigoro, uchigeŵenga, zawe, kunjirirwa, kusesa,

³⁰kunenana, kutinkha Chiuta, msinjiro, kujikuzga na kujirumba. Ŵakwata nthowa zinandi zakuchitira uheni na ŵambula kupulikira ŵapapi.

³¹Ndiposo nvindere, ŵambula chipulikano pakuswa mapangano, pakureka kutemwa ŵanyawo, ndiposo pakuŵa na nkhaza na ŵanyawo.

³²Ŵakumanya dango la Chiuta lakuti ŵanthu awo ŵakuchita vyeneivi ŵakwenera kufwa, ndipouli kuti ŵakuvichita pera chara, kweniso ŵakuzomerezgana na awo ŵakuvichita.