Read new_tumbuka_bible Ŵaroma 11 Bible Online

Ŵaroma 11 - new_tumbuka_bible bible

Ŵaroma 11

¹Ntheura nkhufumba nkhuti, “Kasi Chiuta wakana ŵanthu ŵakhe?” Chara nadi! Chifukwa ine naneso ndili muIsraele, wa mphapu ya Abrahamu, yumoza wa fuko la Benjamini.

²Chiuta kuti wakana ŵanthu ŵakhe chara ŵeneawo wakaŵasora kufuma papo kale. Kasi mukumanya chara icho malembo ghakuyowoya pa makani agho nchimi Eliya wakadandaula kwa Chiuta na vya ŵaIsraele? Iyo wakayowoya wakati,

³“Fumu, ŵanthu aŵa ŵakoma nchimi zinu, ŵabwangandula majochero ghinu gha sembe. Ine pera ndine ndakharako ndipo ŵakukhumba kukoma na ine wuwo.”

⁴Ndipo kasi Chiuta wakamuzgora uli? Chiuta wakati, “Ndajisidira ŵanthu vikwi vinkhonde na viŵiri, ŵeneawo ŵalije kumulambira chiuta Baala.”

⁵Na lero wuwo ndimo kuliri, kuti ŵalipo ŵachoko waka ŵeneawo Chiuta wali kuŵasora na uchizi wakhe.

⁶Usange kuli kwima pa uchizi wakhe, ipo kuti uli kwima pa milimo iyo ŵakuchita ŵanthu chara. Usange ngwa kusangikira chifukwa cha uchizi ipo ngwa kupokekera chifukwa cha milimo chara. Usange ndi ntheura, ipo uchizi ungaŵaso uchizi chara.

⁷Kasi sono tiyowoyechi? ŴaIsraele ŵakatondeka kusanga icho ŵakapenjanga. Kweni ŵachoko waka awo Chiuta wakaŵasora ndiwo ŵakasanga. Ŵanyakhe awo ŵakakharapo, ŵakanonofya mitima yawo ku nchemo ya Chiuta.

⁸Nga ndi umo kuli kulembeka kuti, “Chiuta wakaŵapa mitima yakudindiŵara, maso ghambula kuwona, ndiposo na makutu ghambula kupulika, mpaka muhanya uno.”

⁹Ndipo Davide wakuti, “Viphikiro vyawo viŵe chipingo na diŵa. Vyakuŵakora viŵe vikhuŵazgo vyawo na chilango.

¹⁰Maso ghawo ghaburumutizgike kuti ŵareke kuwona, ndipo miwongo yawo yikotame kwa muyirayira swii.”

¹¹Sono nkhufumba kuti, para ŵaYuda ŵakakhuŵara, kasi ŵakawirathu? Chara nadi! Kweni chifukwa cha zakwananga zawo chiponosko chili kuŵafika ŵamitundu, kuti ŵaIsraele ŵaŵe na sanje.

¹²Usange kwananga kwa ŵaYuda kukaŵatorera usambazi wa vitumbiko vikuru ŵanthu mu charu chose cha pasi, ndiposo usange ukavu wawo wa mzimu ukuŵatorera usambazi ukuru ŵamitundu, asi kwakuruska ŵati ŵaŵenge na vitumbiko vikuru para ŵaIsraele wose ŵanjira?

¹³Sono nkhuyowoya kwa imwe mwa ŵamitundu. Ntheura nditi ndithumbwirenge uteŵeti wane nyengo yose apo ndili wakutumika ku ŵamitundu.

¹⁴Nkhugomezga mu uteŵeti wane kuti mu nthowa iyi panji ŵaYuda ŵanyane ŵangaŵa na sanje, kuti ŵanji mwa iwo ndiŵaponoske.

¹⁵Usange kutayika kwawo kukuzgoka kuŵa chiphemanisko cha ŵanthu wose ŵa mu charu, kasi kupokerereka kwawo kutiŵenge uli? Kuti kuŵenge nga ndi ŵanthu awo ŵawuka ku ŵakufwa!

¹⁶Usange nthimphwa yakuperekeka nga nchipambi chakudanga njakupatulika, ndiko kuti burunga yose ndakupatulika. Usange musisi wa khuni ngwa kupatulika, minthavi nayo njakupatulika.

¹⁷Kweni usange minthavi yinyakhe ya khuni la olive yadumurikako ndipo imwe ŵamitundu nga munthavi wa khuni la olive la mu thondo mukubamphikikamo mwa ilo, mukusangana nawo ŵaYuda nkhongono na usambazi wawo wa umoyo.

¹⁸Ntheura mureke kujikuzga na ŵeneawo ŵakudumurikako nga ndi minthavi yira. Chifukwa uli mukujikuzga? Imwe ndimwe minthavi waka. Imwe kuti ndimwe muli kukorera musisi chara, kweni musisi ndiwo ulikukorerera imwe.

¹⁹Kweni muti muyowoyenge kuti, “Minthavi yikadumukako kuti ine ndibamphikikeko.”

²⁰Uwu mbunenesko, ŵanthu ŵara ŵakadumurikako chifukwa ŵakawura kupulikana apo imwe mukakhalirira mu malo ghawo chifukwa mukapulikana. Ntheura mureke kujikuzga na ichi, kweni mopenge.

²¹Usange Chiuta wakaŵareka chara ŵaYuda awo ŵakaŵa nga ndi minthavi yenecho, kasi imwe mukughanaghana kuti wati wamurekani?

²²Sono apa manyani kuti Chiuta ngwa lusungu ndiposo ndi mukari. Ku ŵanthu awo ŵali kuwa ndi mukari, kweni kwa imwe ngwa lusungu, usange mukukhalirira mu lusungu lwakhe. Usange mukukhalirira mu lusungu lwakhe chara, namweso muti mudumurikengeko.

²³Usange ŵaYuda ŵareka kuwura kupulikana kwawo, Chiuta waŵabamphikengeso ku khuni. Pakuti Chiuta wali na nkhongono kuŵabamphikaso.

²⁴Imwe mwa ŵamitundu muli nga munthavi wa khuni la olive la mu thondo, ilo laphajurika na kubamphikika ku khuni la olive la kupandika. Chinthu cheneicho kuti chingachitika chara kwakuyana na kaŵiro kawo. ŴaYuda ŵali nga ndi khuni ili la mu munda. Ntheura chamkuŵa chipusu chomene kuti Chiuta wabamphikeso minthavi yakuphajuka iyi ku khuni lawo na kale.

²⁵Mwa ŵabali, nkhukhumba chara kuti muŵe ŵalemwa na cha muchindindi ichi mzire mujipime kuti muli wa vinjeru. Chamuchindindi chakhe nchakuti ŵaIsraele ŵali kunonofyeka mitima yawo mpaka unandi wa ŵamitundu wakukwana wize kwa Chiuta.

²⁶Umo ndimo ŵaIsraele ŵaponoskekerenge nga ndi umo kuli kulembekera kuti, “Muthaski wati wafumenge mu Ziyoni wizamkuwuskako maubendezi ghose gha ŵa mphapu ya Yakhobe.

²⁷Ili ndilo phangano leneilo ndamkupangana nawo, para ndizamkuwuskako zakwananga zawo.”

²⁸Chifukwa cha kukana Uthenga Uweme, ŵaYuda ŵakazgoka kuŵa ŵarwani ŵa Chiuta kuti Uthenga Uweme wize kwa imwe ŵamitundu. Kweni chifukwa chakuŵa mtundu wakusoreka, Chiuta wakaŵatemwa ndipera chifukwa cha ŵawiskewokuru.

²⁹Pakuti vyawanangwa na nchemo ya Chiuta pa munthu vikupokekaso chara.

³⁰Imwe mwa ŵamitundu kale mukaŵa ŵambula kupulikira Chiuta, kweni sono Chiuta wakumuchitirani lusungu chifukwa chakuwura kupulikira kwa ŵaYuda.

³¹Ntheura pera chifukwa cha lusungu ulo mwapokerera, sono ŵaYuda ŵaŵa ŵambula kupulikira Chiuta, mwakuti nawoso ŵapokerere lusungu lwa Chiuta.

³²Pakuti Chiuta wali kuŵazgora ŵanthu wose kuŵa ŵakayidi ku kuwura kupulikira, mwakuti warongore lusungu lwakhe ku wose.

³³Nawo mbukuru wa usambazi wa Chiuta! Vinjeru na umanyi wakhe vyakuzonthoka nadi! Ndi njani wangakonkhoska weruzgi wa Chiuta? Ndi njani uyo wangamanya nthowa za Chiuta?

³⁴Nga ndi umo kuli kulembekera kuti, “Ndi njani uyo wakughamanya maghanoghano gha Fumu. Ndi njani wangamanya kuyipa Fumu pa urongozgi wakhe?

³⁵Panji ndi njani uyo wali kumupako chawanangwa Chiuta kuti iyo wizakamuwerezgerapo?”

³⁶Pakuti vinthu vyose vikalengeka na iyo ndipo vyose vikuŵa na umoyo mwa iyo, ndipo vikurazga kwa iyo. Kwa Chiuta ndiko kuŵenge uchindami kwa muyirayira swii! Ameni.