Read new_tumbuka_bible Ŵaroma 12 Bible Online

Ŵaroma 12 - new_tumbuka_bible bible

Ŵaroma 12

¹Ntheura mwa ŵabali, chifukwa cha lusungu lwa Chiuta kwa ise, nkhumuŵeyani kuti mupereke mathupi ghinu kuŵa sembe yamoyo, yituŵa na ya mapokerereko kwa Chiuta. Uku ndiko nkhusopa kwenecho kwa uzimu.

²Mungatoreranga makhaliro gha ŵanthu ŵa charu ichi, kweni rekani Chiuta wasinthe umoyo winu wose pakumupani mitima yiphya. Ntheura muti mumanyenge icho Chiuta wakukhumba na kumanyiska icho nchiweme icho nchakukondweska Chiuta na chakufikapo.

³Chifukwa cha uchizi uwo Chiuta wakandipa ine nkhumuphalirani imwe mose kuti mureke kujighanaghanira mwekha kwakuruska umo mukwenera kughanaghanira. Kweni muŵe ŵakuziza mu kaghanaghaniro kinu, waliyose wa imwe wajipimirenge mu chipulikano icho Chiuta wali kumupa.

⁴Nga ndi umo tiliri na viŵaro vinandi mu thupi limoza, ndipo viŵaro vyose vili na milimo yakupambanapambana,

⁵ntheura pera nanga tili ŵanandi, tili thupi limoza pakubatikana na Khristu. Tose tili kugumaniskika yumoza ku munyakhe nga ndi viŵaro vyakupambanapambana vya thupi limoza.

⁶Tili navyo vyawanangwa vya mitundumitundu kwakuyana na umo Chiuta wali kutipira mu uchizi wakhe. Usange tili na chawanangwa cha kupharazga mazgu gha Chiuta, tikwenera kuchita nacho kwakuyana na chipulikano chithu.

⁷Usange chawanangwa chithu ndi uteŵeti, tikwenera kuteŵeta. Usange ncha kusambizga, tikwenera kusambizga.

⁸Usange chawanangwa chithu ncha kuchiska, tikwenera kuchita ntheura. Uyo wakupereka wovwiri ku ŵanyakhe, wakwenera kuchita mwa wanangwa. Uyo wakurongozga, wakwenera kurongozga na phamphu. Uyo wakuŵachitira lusungu ŵanyakhe, wakwenera kuchita na mtima wakusangwa.

⁹Kutemwa kuŵe kwambula kupusikizga. Nyanyarani icho nchiheni, demererani ku icho nchiweme.

¹⁰Mutemwanenge na mtima wose nga mbabali mwa Khristu, munwekeranenge pakuchindikana yumoza na munyakhe.

¹¹Pakuchita mlimo, muchite na chitatata mureke kuŵa ŵakata. Muteŵetere Fumu na mtima wa kujipereka nkhanira.

¹²Chigomezgo chinu chimupani kukondwa ndipo muzizipizge mu visuzgo vyinu, ndipo nyengo zose mufwirirenge pakuromba.

¹³Muperekenge vyawanangwa vyakovwira ŵakhristu ŵanyinu awo ŵali mu usokwano, ndipo muzgoŵere kupokerera ŵalendo.

¹⁴Ŵatumbikani awo ŵakumuzikizgani. Inya muŵatumbike, ndipo mungaŵatembanga chara.

¹⁵Sekererani na awo ŵakusekerera. Lirani na awo ŵakulira.

¹⁶Kharani na umoyo wakupulikana na ŵanyinu wose. Mureke kujikuzga, kweni yenderananinge na awo mbakujiyuyura, mureke kujipima kuti muli ŵavinjeru.

¹⁷Usange munthu wakumuchitirani uheni, mureke kumuwezgera nduzga. Yezgani kuchita icho ŵanthu ŵakuchiwona kuti nchiweme.

¹⁸Usange ncha machitiko, kharani na mutende na munthu waliyose, kwakuyana na umo mukughanaghanira.

¹⁹Mwa ŵakutemweka ŵane, rekani kuwezgera nduzga, kweni mumurekere Chiuta kuti ndiyo wawezgerenge nduzga chifukwa kuli kulembeka kuti, “Kuwezgera nduzga nkhwane. Ine ndine ndizamkulipirapo,” ndimo yikuyowoyera Fumu.

²⁰Kweni chomene kuli kulembeka kuti, “Usange murwani wako wali na njara, umupe chakurya warye. Usange womirwa, umupe maji wamwe. Pakuchita ntheura uti urunde makara gha moto pa mutu wakhe.”

²¹Ureke kuwuzomerezga uheni kukutonda, kweni iwe uwutonde uheni na uweme.