Read new_tumbuka_bible Ŵaroma 13 Bible Online

Ŵaroma 13 - new_tumbuka_bible bible

Ŵaroma 13

¹Munthu yose waŵalambire ŵamazaza awo ŵakuwusa, pakuti kulije ŵamazaza awo ŵali kwimikika, kweni kufumira kwa Chiuta pera. Ipo ŵamazaza ŵali kusoreka na Chiuta.

²Yose uyo wakwimikana na ŵamazaza wakwimikana na icho Chiuta wali kwimika. Ndipo yose uyo wakuchita ntheura wakujitorera chilango pa iyomwene.

³Pakuti awo ŵakuwusa kuti mbakofya chara ku ŵanthu awo ŵakuchita milimo yiweme, kweni ku awo ŵakuchita milimo yiheni. Kasi ukukhumba kuŵa wambula kumopa uyo wali na mazaza? Ntheura chita icho nchiweme ndipo wati wakurumbe.

⁴Pakuti iyo ndi muteŵeti wa Chiuta uyo wali kwimikika kuti iwe usange uweme. Kweni para ukuchita icho nchiheni wopenge, chifukwa wakuyegha lupanga pa waka chara. Iyo ndi muteŵeti wa Chiuta kulanga awo ŵakuchita uheni.

⁵Ntheura mukwenera kuŵapulikira ŵamazaza, kuti ndi chifukwa cha kukanizga ukari wa Chiuta pera chara, kweniso na chifukwa cha njuŵi.

⁶Ndicho chifukwa mukusonkheraso msonkho. Pakuti ŵamazaza ŵakuteŵetera Chiuta. Nawo ndi nchito yawo yeneyiyi iyi.

⁷Ntheura perekani ku ŵamazaza chose icho mukwenerera kupereka. Perekani msonkho wa thupi uko ukukhumbikwa na wa katundu kwa awo ukuŵayenerera. Wopani awo mukwenera kuwopa. Perekani nchindi kwa awo mukwenera kuŵachindika.

⁸Mureke kuŵa na ngongole ku ŵanthu, kweni muŵenge ŵa ngongole pakutemwa. Chifukwa uyo wakutemwa ŵanyakhe ndiyo wakufiska marango.

⁹Pakuti marango ghakuti, “Ungaleŵanga, Ungakomanga, Ungibanga, Ungadokeranga.” Marango ghose ghanyakhe ghali kulungana mu dango limoza pera lakuti, “Utemwenge muzengezgani wako nga ndi umo ukujitemwera wamwene.”

¹⁰Uyo wakutemwa muzengezgani wakhe, kuti wangamuchitira kanthu kaheni chara. Ntheura kutemwa muzengezgani wakhe nkhufiska marango.

¹¹Muchite ichi, pakumanya kuti ora lafika kale kuti muwuke mu tulo. Pakuti sono chiponosko chili pafupi kuruska apo tikambiranga kupulikana.

¹²Usiku uli pafupi kumara, ndipo muhanya waneng'enera. Tiyeni sono tireke milimo ya mdima, tivware mahomwa gha mu ungweru.

¹³Nkharo yithu yiŵenge yakwenerera nga ndi ŵanthu awo ŵakwenda mu ungweru wa muhanya. Umo kuti muli vitimbaheti, panji uloŵevu chara, panji nkharo za waka na za mauleŵe, panji maukwakwa chara, zawe panji sanje chara.

¹⁴Kweni vwarani Fumu Yesu Khristu, nga ndi homwa linu, mureke kughanaghanira thupi la kwananga panji kulikhutiska na ivyo likukhumba.