Read new_tumbuka_bible Ŵaroma 14 Bible Online

Ŵaroma 14 - new_tumbuka_bible bible

Ŵaroma 14

¹Munthu uyo ngwa kutomboroka mu chipulikano mumupokerere ndipo mumukore makora, mureke kukwesana nayo pa ivyo wakukayika navyo.

²Munthu yunji chipulikano chakhe chikumuzomerezga kurya chilichose. Kweni yunji uyo chipulikano chakhe nchakutomboroka, wakurya mphangwe pera.

³Munthu uyo wakurya chilichose wareke kumuyuyura uyo wakuziŵizga kurya. Uyo wakurya mphangwe pera wareke kumweruzga uyo wakurya chilichose, pakuti Chiuta wali kumupokerera.

⁴Kasi ndiwe njani kuti umweruzge muteŵeti wamwene? Ndi mwenecho uyo wamkumweruzga usange wakuchita makora panji wakutondeka. Wati wachinthe pakuti Fumu yakhe ndiyo yili na nkhongono kumwimika.

⁵Munthu yunji wangapima kuti zuŵa limoza ndakuzirwa kuruska zuŵa linyakhe, penepapo yunji wangapima kuti mazuŵa ghose ghakuyana waka. Waliyose wakhorwe mu mtima wakhe na icho wakughanaghana.

⁶Uyo wakupima zuŵa limoza kuŵa lakuzirwa walisungilire kuŵa lakuchindikiramo Fumu. Uyo wakurya chilichose nayo wakuchindika Fumu pakuchita ntheura, pakuti wakuwonga Chiuta pa chakurya chira. Uyo wakuziŵizga kurya vyakurya vinyakhe wakuchita ntheura pakuchindika Fumu, ndipo wakumuwonga Chiuta.

⁷Palije yumoza mwa ise uyo wakukhara wamoyo chifukwa cha iyo yekha, panji kufwa chifukwa cha iyo yekha.

⁸Usange tili ŵamoyo, umoyo uwu ngwa Fumu, usange tikufwa, tikufwira mwa Fumu. Ntheura para tili ŵamoyo panji tikufwa tili ŵakhe ŵa Fumu.

⁹Mphakufiska ichi, rekani Khristu wakafwa, ndipo wakawuka ku ŵakufwa na kuŵaso na umoyo, kuti waŵe Fumu ya ŵamoyo na ŵakufwa.

¹⁰Kweni iwe, chifukwa uli ukweruzga mubali wako? Iwe nawe, chifukwa uli ukuyuyura mubali wako? Chifukwa tose tamukwima panthazi pa chitengo cha kweruzgirapo cha Chiuta.

¹¹Pakuti kuli kulembeka kuti, “Fumu yikuti, nkhurapa nadi, ŵanthu wose ŵamkundilambira ine, ndipo ŵanthu wose ŵamkurumba Chiuta.”

¹²Ntheura ise tose yumozayumoza tizamkujipatawulira panthazi pa Chiuta ivyo tikachita.

¹³Ntheura tireke kweruzgana, icho tikwenera kuchita nchakuti, paŵavye munthu waŵikire chikhuŵazgo munthu munyakhe, panji kanthu kakumwanangiska.

¹⁴Nkhumanya ndipo ndakhorwa nadi mwa Fumu Yesu kuti, palije chakurya icho ncha ukazuzi mwa icho chekha. Ncha ukazuzi kwa munthu uyo wakupima kuti ncha ukazuzi.

¹⁵Usange ukwanangiska munyako na chakurya icho ukurya, ipo kuti ukumutemwa munyako chara. Ureke kurya icho chinganangiska munthu uyo Khristu wakafwira.

¹⁶Ntheura ureke kuzomerezga icho iwe ukuti nchiweme kuti chiŵe na zina liheni.

¹⁷Pakuti Ufumu wa Chiuta kuti ngwa kurya na kumwa chara, kweni ndi urunji na mutende ndiposo na chimwemwe mu Mzimu Mutuŵa.

¹⁸Chifukwa yose uyo wakuteŵetera Khristu mu nthowa iyi, wakukondweska Chiuta na kurumbika na ŵanthu.

¹⁹Ntheura nyengo zose tiŵike mtima pakuchita ivyo nvya mutende na ivyo vikuzenga umoyo wa yumoza na munyakhe.

²⁰Ureke kubwangandula mlimo wa Chiuta chifukwa cha vyakurya. Vyakurya vyose vingamanya kuryeka, kweni nkhwananga kurya ivyo vingamanya kumwanangiska munyako.

²¹Nkhuweme kureka kurya nyama, panji kureka kumwa vinyo, panji kuchita kalikose ako kangamunangiska munyako.

²²Ntheura chipulikano icho uli nacho, uchisunge pakati pa iwe wamwene na Chiuta. Ngwakutumbikika munthu uyo wakureka kujisuska apo wakuchita ichi wakugomezga kuti ncha urunji.

²³Kweni munthu uyo wakukayika na icho wakurya, Chiuta wakumususka para wakuchirya. Pakuti wakurya kwambula chipulikano. Pakuti chinthu chose icho chikuchitika kwambula chipulikano, nkhwananga.