Read new_tumbuka_bible Ŵaroma 15 Bible Online

Ŵaroma 15 - new_tumbuka_bible bible

Ŵaroma 15

¹Ise tili na nkhongono mu chipulikano tikwenera kuŵazizipizgira awo mbatechitechi mu chipulikano. Tireke kujikondweska ise tekha.

²Waliyose wa ise waghanaghanire kukondweska munyakhe na icho nchiweme, mwakuti wamuzenge mu chipulikano.

³Chifukwa Khristu kuti wakajikondweska iyo yekha chara. Nga ndi umo kuli kulembekera kuti, “Visunjizgo vya awo ŵakamunyozani vyandigundizga ine.”

⁴Chifukwa vyose ivyo vikalembeka kale mu malembo, vikalembeka kuti vitisambizge ise mwakuti mu chisangurusko icho tikusanga, tiŵe na chigomezgo.

⁵Chiuta uyo wakupereka chizizipizgo na chikhwimisko, wamovwirani kuti muŵe na kaghanaghaniro kamoza mukati mwinu pakurondezga bambiro la Khristu Yesu.

⁶Mwakuti imwe mose pamoza muchindike Chiuta, Wiske wa Fumu yithu Yesu Khristu.

⁷Ntheura mupokereranenge nga ndi umo Khristu nayo wakamupokererani imwe mwakuti Chiuta wachindikike.

⁸Chifukwa nkhumuphalirani kuti Khristu wakazgoka muteŵeti wa ŵakukotoreka kurongora unenesko wa Chiuta, mwakuti wakhozge mapangano ghakhe ku ŵasekuru ŵithu,

⁹mwakuti ŵamitundu nawo ŵamuchindike Chiuta chifukwa cha lusungu lwakhe, nga ndi umo kuli kulembekera kuti, “Pa chifukwa ichi nditi ndimuchindikani imwe Fumu, mukati mu ŵamitundu, na kwimba sumu zakurumba zina linu.”

¹⁰Ndipo ghakutiso, “Imwe mwa ŵamitundu, sekererani pamoza na ŵanthu ŵa Chiuta.”

¹¹Ndiposo ghakuti, “Rumbani Fumu, imwe mose ŵamitundu, muchindikani imwe mose, mwa ŵanthu.”

¹²Yesaya nayo wakutiso, “Yumoza wa mphapu ya Yese wamkwiza. Iyo wamkuwuka kuti wawuse ŵamitundu ndipo iwo ŵamkuŵika chigomezgo chawo mwa iyo.”

¹³Chiuta wachigomezgo, wamuzuzgani na chimwemwe chose, na mutende pakupulikana mwa iyo, mwakuti muzare mu chipulikano na nkhongono za Mzimu Mutuŵa.

¹⁴Mwa ŵanyane ine ndakhorwa nadi kuti muli kuzura na uweme, na umanyi wose ndipo mungasambizgana yumoza na munyakhe.

¹⁵Ndamulemberani karata uyu na chikanga kuti pa vinthu vinyakhe ndimukumbuskani imwe. Ndachita ntheura chifukwa cha uchizi uwo Chiuta wali kundipa ine,

¹⁶uchizi uwo uli kundizgora kuŵa muteŵeti wa Khristu Yesu ku ŵamitundu. Ndi mlimo wane wa usofi kupharazga Uthenga Uweme wa Chiuta kuti ŵamitundu ŵaŵe nga sembe yamapokerereko kwa Chiuta na kutuŵiskika na Mzimu Mutuŵa.

¹⁷Ntheura pakuŵa mwa Khristu Yesu, nkhujikuzga pa nchito iyo nkhumuteŵetera Chiuta wane.

¹⁸Pakuti nditi ndiŵe na chikanga pakuyowoya ivyo Khristu wali kuchita mwa ine, kuti ndiŵarongozge ŵamitundu kuti ŵapulikire Chiuta na mazgu, na milimo, na nkhongono za

¹⁹vimanyikwiro na minthondwe, vyakuchitika na nkhongono za Mzimu Mutuŵa. Ntheura nkhapharazga Uthenga Uweme wose wa Yesu Khristu ku Yerusalemu, mpaka nkhaya kafika ku Ilirikumu.

²⁰Nyengo zose khumbo lane likaŵa kupharazga Uthenga Uweme kose uko zina la Khristu likaŵa lindamanyikwe na kale, mwakuti ndireke kuzenga pa lufura lwa munthu yunji.

²¹Nga ndi umo kuli kulembekera kuti, “Ŵizamkuwona uyo ŵandaphalirikepo vya iyo, ndipo ŵizamkumanyiska uyo ŵandapulikepo vya iyo.”

²²Ndicho chifukwa kaŵirikaŵiri nkhatondekeranga kufika kwa imwe.

²³Pakuti sono ndamarizga mlimo wane mu vigaŵa ivi, ndiposo nga ndi umo mu virimika vinandi ndanwekanga kwiza kamuwonani imwe.

²⁴Nkhugomezga kwiza kamuwonani para nkhuruta ku charu cha Sipeni, ndizamkukondwa pakuchezga namwe pa mazuŵa ghachoko waka, ndipo pa umaliro ndizamkukhumba kuti mundovwire kurutirizga ulendo wane.

²⁵Kweni sono nkhuruta ku Yerusalemu na wovwiri ku ŵanthu ŵa Chiuta.

²⁶Chifukwa ŵanthu ŵa Chiuta ŵa mipingo ya mu chigaŵa cha Makedoniya na cha Akaya, ŵali kupereka vyawanangwa vyawo na mtima wose, kovwira ŵakavu mukati mu ŵanthu ŵa Chiuta ŵa ku Yerusalemu.

²⁷Ŵakaŵa ŵakukondwa kupereka wovwiri, kweni na unenesko wose, mbakuchichizgika kovwira ŵakavu. Pakuti usange ŵaYuda ŵali kusangana na ŵamitundu vitumbiko vya Mzimu, ipo nawoso ŵamitundu ŵakwenera kusangana nawo ŵaYuda vya thupi ivyo ŵakukavuka.

²⁸Ntheura para ndamara mlimo uwu, na kuŵapa ivyo ŵanthu ŵakapereka, ndamkuruta ku charu cha Sipeni, pakwendera kwa imwe.

²⁹Nkhumanya kuti para nkhwiza kwa imwe, ndizenge na vitumbiko vinandi vya Khristu.

³⁰Mwa ŵanyane nkhumuŵeyani mwa Fumu yithu Yesu Khristu na kutemwa uko nkhwa Mzimu kuti, musangane nane pakulimbalimba mumalurombo ghinu mu malo mwane kwa Chiuta,

³¹kuti ndithaskike ku ŵanthu ŵambula kupulikana ŵa mu charu cha Yudeya. Mundirombereso kuti ŵanthu ŵa Chiuta ŵa ku Yerusalemu ŵakapokere vyakupereka na mawoko ghaŵiri ivyo ndatumika kuti nkhaŵape.

³²Mwakuti mu khumbo la Chiuta ndize kwa imwe na chimwemwe, na kupumula pakuchezga namwe.

³³Chiuta wa mutende waŵenge na imwe mose. Ameni.