Read new_tumbuka_bible Ŵaroma 16 Bible Online

Ŵaroma 16 - new_tumbuka_bible bible

Ŵaroma 16

¹Nkhumupereka kwa imwe mudumbu withu Febe, muteŵeti wa mu mpingo wa Chiuta wa mu Kenkereya.

²Nkhumurombani kuti mumupokerere mu zina la Fumu nga ndi umo kukuŵenerera ŵanthu ŵa Chiuta. Movwirani pa kanthu kalikose ako wakavuka, pakuti iyo wovwira ŵanthu ŵanandi pamoza na ine wuwo.

³Tauzgani Prisira na Akwila ŵateŵeti ŵanyane mwa Khristu Yesu.

⁴Iwo ŵakanozgeka kutaya umoyo wawo kuti ŵathaske ine, nkhuŵawonga chomene, kuti ndine pera chara kweni na mipingo yose iyo yili mu ŵamitundu.

⁵Tauzgani na mpingo wa Chiuta uwo ukuwungana mu nyumba yawo. Tauzgani mubwezi wane wakutemweka Epeneto, uyo wakaŵa mukhristu wakudanga, mu chigaŵa cha Asiya.

⁶Tauzgani Mariya, uyo wamuteŵeterani imwe chomene.

⁷Tauzgani Androniko na Yuniya ŵaYuda ŵanyane awo ŵakaŵa mu gadi pamoza nane. Ŵanthu aŵa mba lumbiri luweme mukati mu ŵakutumika ndipo ŵakamba ndiwo kuŵa ŵakhristu pambere ine.

⁸Tauzgani Ampiliyato, wakutemweka wane mwa Fumu.

⁹Tauzgani Urubano, muteŵeti munyithu mwa Khristu, na Staki wakutemweka wane.

¹⁰Tauzgani Apele, mweneuyo ngwa kurumbika mu mlimo wa Khristu. Tauzgani ŵa mu mbumba ya Arisitobulo.

¹¹Tauzgani Herodiyoni, mu Yuda munyane. Tauzgani ŵakhristu ŵa mu mbumba ya Narikiso.

¹²Tauzgani Trifena na Trifosa ŵanakazi awo ŵakuteŵetera Fumu mwa nkhongono chomene. Tauzgani wakutemweka wane Peresisi, mwanakazi yunji uyo wateŵetera Fumu mwa nkhongono chomene.

¹³Tauzgani Rufu, muteŵeti ŵakusoreka wa Fumu, na ŵanyina awo nyengo zose wakandilera nga ndi mwana wawo.

¹⁴Tauzgani Asinikrito, Felegone, Heremesi, Patirobasi, Herimasi, na ŵakhristu ŵanyakhe awo ŵali nawo pamoza.

¹⁵Tauzgani Filologo, Yuliya, Nereya, na mudumbu wakhe na Olimpasi, na ŵanthu wose ŵa Chiuta awo ŵali nawo pamoza.

¹⁶Tauzganani na chasa cha wenenawene wa mwa Khristu. Mipingo yose ya chikhristu yikumutauzgani.

¹⁷Nkhumuchiskani mwa ŵabali, kuti muŵe maso na ŵanthu awo ŵakuwuska mphatukano na kutimbanizga chipulikano cha ŵanthu awo ŵakwimikana na visambizgo ivyo muli kupokerera, patukaniko kwa iwo.

¹⁸Chifukwa awo ŵakuchita vya ntheura kuti ŵakuteŵetera Khristu Fumu yithu chara. Kweni ŵakuteŵetera makhumbiro ghawo na mazgu ghawo gha utesitesi na gha kupepeka kuti ŵapusike ŵanthu ŵa maghanoghano ghafupi.

¹⁹Ŵanthu wose ŵali kupulika kuti mukupulikira Uthenga Uweme, ndipo pa chifukwa ichi ndili wakukondwa chomene na imwe. Nkhukhumba kuti muŵe na vinjeru pa icho nchiweme, kweni wambula kalema pa icho nchiheni.

²⁰Ndipo Chiuta wa mutende mwa luŵiro wati wang'anyire pasi Satana, kusi ku malundi ghinu. Uchizi wa Fumu yithu Yesu Khristu uŵenge namwe.

²¹Timote, muteŵeti munyane, wakumutauzgani pamoza na Lusiya, Yasoni, na Sosipatere, na ŵaYuda ŵanyithu.

²²Ine, Teretiyo, mulembi wa karata uyu nkhumutauzgani mwa Fumu.

²³Wakumutauzgani Gayo uyo wakundisunga ine ndiposo mweneuyo mu nyumba yakhe mpingo wose ukuwungana. Erasito, msungiliri wa ndarama wa msumba, pamoza na munyithu Kwarato ŵakumutauzgani. [

²⁴Uchizi wa Fumu yithu Yesu Khristu uŵenge na imwe mose. Ameni.]

²⁵Sono kwa iyo, mweneuyo wangamukhozgani kwakuyana na Uthenga Uweme na upharazgi wa Yesu Khristu, kwakuyana na uvumbuzi wa chamunthondwe icho chikasungika muchindindi kwa nyengo zitali.

²⁶Kweni sono chili kuvumbukwa ndipo kwizira mu malembo gha nchimi, chili kumanyikwa ku mafuko ghose kwakuyana na languro la Chiuta wa muyirayira mwakuti wose ŵagomezge na kupulikira.

²⁷Kwa Chiuta yekha na yekha, wa vinjeru, kuŵenge uchindami mwa Yesu Khristu kwa muyirayira swii! Ameni.