Read new_tumbuka_bible Ŵaroma 2 Bible Online

Ŵaroma 2 - new_tumbuka_bible bible

Ŵaroma 2

¹Ntheura iwe ukweruzga ŵanyako, manyi ndiwe njani manya kuti uli na mupandira chara. Para ukweruzga ŵanyako ukujisuska wekha, pakuti iwe ukweruzga nawe, vinthu ivyo ŵakuchita ŵanyako ndivyo ukuchitaso na iwe.

²Kweni tikumanya kuti weruzgi wa Chiuta pa awo ŵakuchita vyeneivi, ngwa unenesko.

³Ntheura iwe wa munyane iwe ukweruzga ŵanyako awo ŵakuchita vyeneivi, apo nawe ukuchita vyeneivi, kasi ukupima kuti wamkupona ku weruzgi wa Chiuta?

⁴Panji ukughanaghana kuti kwamkuŵavye kanthu chifukwa cha lusungu lukuru lwa Chiuta, kuzika na kuzizipizga kwakhe? Kasi ukumanya chara kuti Chiuta wali na lusungu na iwe chifukwa wakukhumba kuti ung'anamuke mu mtima?

⁵Kweni chifukwa cha unonono wa mtima wako na kukana kurapa ukujilundikira waka chilango chikuru cha Chiuta. Chilango ichi chizamkuwoneka pa zuŵa ilo ukari wa Chiuta na weruzgi wakhe wa urunji vyamkuvumbukwira.

⁶Chiuta wamkumupa njombe munthu yose yakuyana na ivyo wali kuchita.

⁷Ŵanthu awo ŵakupenja uchindami, nchindi na umoyo, pakuchita milimo yiweme, Chiuta wamkuŵapa umoyo wa muyirayira.

⁸Kweni Chiuta wamkucherukira na kurongora ukari wakhe pa awo ŵakususka na kuchita uheni.

⁹Kwamkuŵa visuzgo na vyakuŵinya ku wose awo ŵakuchita uheni, pakudanga ŵaYuda, ndipo pamanyuma ŵamitundu.

¹⁰Kweni Chiuta wamkuŵachindika, kuŵatumbika na kuŵapa mutende wose awo ŵakuchita uweme, pakudanga ŵaYuda ndipo pamanyuma ŵamitundu.

¹¹Pakuti Chiuta walije sankho.

¹²Wose awo ŵakwananga kwambula kumanya Dango la Mozesi ŵamkulangika, nangauli ŵalije kumanya marango. Wose awo ŵakwananga kweni ŵakumanya marango, ŵamkulangika na marango.

¹³Chifukwa kuti ndi awo ŵakupulika marango awo mbarunji pa maso pa Chiuta chara, kweni awo ŵakuchita icho marango ghakuyowoya, ndiwo ŵamkuchemeka ŵarunji pa maso gha Chiuta.

¹⁴Kweni para ŵamitundu awo ŵalije marango mu unthu wawo, ŵakuchita vinthu vyakukhumbikwa na marango, ŵakujizgora kuŵa marango mwa iwo ŵenecho, nangauli kuti ŵali na marango chara.

¹⁵Pakuti makhaliro ghawo ghakurongora kuti marango ghali kulembeka mu mitima yawo. Njuŵi zawo nazo zikuŵakhalira ukaboni ndipo maghanoghano ghawo ghakuŵapacha na kuŵavikirira.

¹⁶Kwakuyana na Uthenga Uweme uwo nkhupharazga, kwamkuŵa ntheura pa zuŵa ilo Chiuta wamkweruzga mwa Khristu Yesu vyakubisika vyose ivyo ŵanthu ŵakuchita.

¹⁷Kweni iwe ukujichema kuti ndiwe muYuda, ukugomezga mu marango ndiposo ukuthumbwira mwa Chiuta.

¹⁸Ndipo ukumanya icho Chiuta wakukhumba kuti uchite, ndipouli kusambira kufuma ku marango, kusankha icho nchiweme na chiheni pakuti uli kunjirikizgika mu dango.

¹⁹Usange iwe ukufikapo kuti uli murongozgi wa ŵachiburumutira na ungweru wa awo ŵali mu mdima,

²⁰munjirikizgi wa ŵakupusa, musambizgi wa ŵanthu ŵambula kumanya ndipouli kukhorwa kuti pakuŵa na marango uli na unenesko na umanyi wose,

²¹na kuti iwe ukusambizga ŵanthu ŵanji, kasi ungajisambizga wekha chara? Iwe ukupharazga kuti ŵanthu wareke kwiba, kweni asi iwe wamwene ukwiba?

²²Iwe ukuyowoya kuti ŵanthu ŵareke kuleŵa, kasi iwe wamwene ukuleŵa chara? Iwe ukuvitinkha vikozgo, asi iwe wamwene ukwiba ivyo ŵakupereka mu nyumba zakusoperamo?

²³Iwe ukujikuzga kuti uli kusunga marango gha Chiuta, asi ndiwe ukumukhozga soni Chiuta pakuswa marango ghakhe chara?

²⁴Nga ndi umo kuli kulembekera kuti, “Ŵamitundu ŵakutuka Chiuta chifukwa cha imwe ŵaYuda.”

²⁵Kukotoreka nkhwa kuzirwa usange munthu wakusungilira marango gha Chiuta. Kweni usange munthu wakuswa marango, wakuŵa nga ndi para wandakotoreke.

²⁶Ndipo usange wa mtundu uyo ngwambula kukotoreka wakusungilira marango, asi Chiuta wati wapime kuwura kukotoreka kwakhe nga nkhukotoreka?

²⁷Chifukwa uyo ngwambula kukotoreka, usange wakusunga marango, wamkukususka iwe uli kukotoreka, apo uli nagho marango agho ghali kulembeka, kweni ukuswa.

²⁸Pakuti muYuda mwenecho kuti ndi uyo wali na kawonekero kakuwaro chara, panji kukotoreka kwenecho kuti ndi uko kukuchitika mu thupi na kuwoneka kuwaro chara.

²⁹Kweni muYuda mwenecho ndi uyo ndi muYuda mukati mu mtima wakhe. Ukotori wenecho ngwa mu mtima uwo ukuchitika na Mzimu Mutuŵa. Kuti ngwa marango agho ghali kulembeka chara. Munthu wa ntheura kuti wakurumbika na ŵanthu chara, kweni na Chiuta.