Read new_tumbuka_bible Ŵaroma 3 Bible Online

Ŵaroma 3 - new_tumbuka_bible bible

Ŵaroma 3

¹Kasi ŵaYuda ŵakuŵaruska uli ŵamitundu? Panji muli chandulo uli mu ukotori?

²Ŵakuŵaruska mu nthowa zinandi nkhanira! Pakwamba ŵaYuda ŵakuŵaruska chomene ŵamitundu mu nthowa yiliyose chifukwa pakudanga Chiuta wakapereka mazgu ghakhe ku ŵaYuda.

³Usange ŵanji ŵakaŵa ŵambula kugomezga, kasi kuwura kugomezgeka kwawo kukuwuskapo kugomezga kwa Chiuta?

⁴Chara nadi! Rekani Chiuta waŵe wakuneneska nanga munthu yose wangaŵa mutesi. Nga ndi umo kuli kulembekekera kuti, “Imwe Chiuta, murongoreke kuŵa ŵakuneneska para mukuyowoya, mukwenera kuruska para mukweruzgika.”

⁵Kweni usange ubendezi withu ndiwo ukurongora pakweru urunji wa Chiuta, kasi tingayowoyachi? Kasi tingayowoya kuti Chiuta wakwananga para wakutilanga? (Nkhuyowoya mu unthu.)

⁶Na pachoko pose! Chiuta waŵenge wambula urunji kasi mphanyi wakweruzga uli ŵanthu ŵa mu charu?

⁷Kweni usange utesi wane ukusazgirako uchindami wa Chiuta pakurongora unenesko wakhe wose pakweru, chifukwa uli ndichali kupika mrandu wakuti ndili kwananga?

⁸Kasi tirekerechi kuyowoya kuti, “Zaninge tichite uheni mwakuti uweme wize? Ŵanthu ŵanji ŵandijokola ine kuti ndimo nkhuyowoyera?” Ŵanthu aŵa ŵamkulangika nga ndi umo ŵakwenerera.

⁹Ntheura sono, kasi ise ta ŵaYuda tikuŵaruska ŵamitundu? Na pachoko pose! Ndarongora kale kuti ŵanthu wose mbakwananga, ŵaYuda na ŵamitundu wuwo.

¹⁰Nga ndi umo kuli kulembekera kuti, “Kulije munthu murunji, nadi kulije nanga njumoza.

¹¹Kulije munthu uyo wakupulikiska, kulije munthu uyo wakusopa Chiuta.

¹²Wose ŵapuruka, wose pamoza ŵananga. Palije uyo wakuchita uweme. Nadi, palije nanga njumoza.

¹³Chigoromiro chawo chili nga ndi dindi la mwazi, ndipo malulimi ghawo ghakuyowoya upusikizgi pera. Mu milomo yawo mukufuma mazgu gha urwirwi, urwirwi nga wa njoka ya chipiri.

¹⁴Milomo yawo yazura na nthembo, ndipo mukufuma mazgu ghakuŵaŵa

¹⁵Malundi ghawo ngapusu kuchimbilira ku kupweteka na kukoma ŵanyawo.

¹⁶Kose uko ŵakwenda, ŵakuya kaparanya na kukoma.

¹⁷Nthowa ya mutende kuti ŵakuyimanya chara.

¹⁸Chiuta kuti ŵakumopa chara, na pachoko pose.”

¹⁹Sono tikumanya kuti vyose ivyo marango ghakuyowoya vikukhwaska awo ŵali pasi pa marango. Mwakuti ŵanthu wose ŵareke kuŵa na mupandira na kuŵatorera wose ku weruzgi wa Chiuta.

²⁰Ntheura panthazi pa Chiuta, kulije munthu uyo ndi murunji chifukwa cha kurondezga marango. Icho marango ghakuchita, nkhutirongora kwananga kwithu.

²¹Kweni sono nthowa iyo Chiuta wakurunjiskira ŵanthu wayivumbula. Nthowa iyi yili na nchito na dango chara, nangauli Dango la Mozesi na nchimi vikuyipanikizgira.

²²Nthowa yakhe njakuti Chiuta warunjiske ŵanthu kwizira mu chipulikano chawo mwa Yesu Khristu. Chiuta wakuchichita ichi ku ŵanthu wose awo ŵakupulikana na Yesu Khristu, pakuti palije mphambano pakati pa ŵanthu wose.

²³Pakuti ŵanthu wose mbakwananga ndipo ŵalije kufikapo pa uchindami wa Chiuta.

²⁴Ŵanthu wose ŵakurunjiskika na chawanangwa cha uchizi wa Chiuta, ŵakuwoneka kuti mbarunji pa maso pa Chiuta chifukwa cha Khristu Yesu uyo wakaŵawombola.

²⁵Chiuta wakamupereka Yesu mwakuti na nyifwa yakhe waŵe sembe yakugowokera zakwananga za wose awo ŵakupulikana nayo. Chiuta wakachita vyeneivi kuti warongore umo urunji wakhe. Chifukwa kale Chiuta wakazerezga zakwananga za ŵanthu mwakujizizipizgira waka.

²⁶Kweni sono Chiuta wakamupereka Yesu kuti warongore urunji wakhe kuti yose wakupulikana na Yesu, Chiuta iyomwene wamurunjiske.

²⁷Kasi sono munthu wangajikuzgaso? Chara, kuti wangachita chara. Chifukwa uli? Kasi nchifukwa cha kusunga marango? Chara! Kweni na chipulikano.

²⁸Ntheura tikuwona kuti Chiuta wakurunjiska munthu na chipulikano, kuti wakurunjiska munthu pakuchita icho marango ghakumuphalira chara.

²⁹Panji, kasi Chiuta ndi Chiuta wa ŵaYuda pera? Asi ŵamitundu nawo ndi Chiuta wawo? Inya nawo ngwawo.

³⁰Pakuti Chiuta njumoza pera ndipo wati warunjiskenge awo mbakukotoreka na awo mbambula kukotoreka kwizira mu chipulikano.

³¹Kasi sono tikughazgora gha waka marango kuti tiŵe na chipulikano? Chara nadi! Kweni tikughakhozga marango.