Read new_tumbuka_bible Ŵaroma 4 Bible Online

Ŵaroma 4 - new_tumbuka_bible bible

Ŵaroma 4

¹Kasi sono tingayowoyachi na za Abrahamu sekuru withu kwakuyana na unthu? Kasi wakawonachi?

²Nadi usange Chiuta wakarunjiska Abrahamu chifukwa cha milimo yakhe, ipo Abrahamu wali nacho chifukwa cha kujikuzgira, kweni kuti kuli ntheura panthazi pa Chiuta chara.

³Pakuti kasi malembo ghakuyowoya vichi? Ghakuti, “Abrahamu wakapulikana na Chiuta, ndipo Chiuta wakamupima kuti ndi murunji.”

⁴Sono para munthu wakuchita nchito, wakupoka njombe, kweni njombe yakhe kuti yikupimika nga nchawanangwa chara, kweni nga nchinthu icho wapoka kwakuyana na mlimo uwo wachita.

⁵Kweni kulije munthu uyo Chiuta wakumuwona kuti ndi murunji chifukwa cha milimo yakhe, kweni uyo wakupulikana na Chiuta, uyo wakarunjiska ŵakwananga, ndiyo chipulikano chakhe chikupimika kuŵa urunji.

⁶Davide wakuyowoya cheneichi para wakuyowoya na vitumbiko vya munthu pa uyo Chiuta wakumupima kuŵa murunji pa dera pa mlimo wose uwo wachita. Iyo wakayowoya wakati,

⁷“Mbakutumbikika awo maubendezi ghawo ghagowokereka, awo zakwananga zawo zawundika.

⁸Ngwakutumbikika munthu uyo FUMU yikumukonthora kwananga kwakhe chara.”

⁹Kasi kutumbikika uko Davide wakayowoya, kasi nkhwa ŵakukotoreka pera, panji na awo ŵalije kukotoreka? Chifukwa tayowoya kale kuti malembo ghakuti, “Abrahamu wakapulikana na Chiuta, ndipo Chiuta wakamupima kuti ndi murunji.”

¹⁰Kasi chikamuchitikira nyengo nji? Kasi mphambere Abrahamu wandakotoreke panji pamanyuma pakukotoreka? Pakaŵa pamanyuma chara kweni pambere wandakotoreke.

¹¹Ukotori ukachitika pamanyuma, kuti chiŵe chimanyikwiro chakurongora kuti pambere wandakotoreke, Chiuta wakamurunjiska kale Abrahamu kwizira mu chipulikano. Ntheura Abrahamu ndi dada wa wose awo ŵakupulikana na Chiuta, ndipo Chiuta wakuŵawona kuti mbarunji nangauli mbambula kukotoreka.

¹²Ndiposo Abrahamu ndi dada wa wose awo ŵali kukotoreka. Kuti ngwa awo ŵali kukotoreka kwa thupi pera chara, kweni wa wose awo ŵali na chipulikano nga ncha Abrahamu pambere ŵandakotoreke.

¹³Para Chiuta wakapangana na Abrahamu na mphapu yakhe kuti ŵizamkuhara charu ichi, kuti wakapangana nawo chifukwa cha kusunga marango chara, kweni chifukwa cha urunji wa chipulikano.

¹⁴Usange awo ŵakusunga marango ndiwo ŵamkuŵa ŵahariri, ipo chipulikano ncha waka ndipo phangano ndambula nchito.

¹⁵Chifukwa nadi marango ghakwiza na ukari wa Chiuta, kweni pose apo palije marango kulije kuswaso marango.

¹⁶Ntheura phangano liri kwima pa chipulikano mwakuti liperekeke waka nga nchawanangwa cha Chiuta ku wose awo mba mu mphapu ya Abrahamu. Kuti likaperekeka kwa awo ŵakusunga marango pera chara, kweniso na kwa awo ŵakupulikana nga ndi umo wakachitira Abrahamu. Pakuti Abrahamu ndiyo dada wa ise tose mu chipulikano.

¹⁷Nga ndi umo kuli kulembekera kuti, “Ndakuŵika iwe kuti uŵe wiskewokuru wa mafuko ghanandinandi.” Abrahamu wakalipokera phangano ili kwa Chiuta mwenecho uyo wakapulikana nayo. Ndi Chiuta uyo wakuwuska ŵakufwa na kulangula kuti viŵeko vyeneivyo kuti vikaŵako chara.

¹⁸Abrahamu wakakhazga ndipo wakapulikana nangauli pakaŵavye chifukwa cha chipulikano, kweni iyo wakakhazga pa chipulikano. Ntheura wakazgoka kuŵa wiskewokuru wa mafuko ghanandinandi. Nga ndi umo wakaphalirikira kuti, “Ndimo ŵamkuŵira ŵa mphapu yako.”

¹⁹Abrahamu wakaŵa na virimika pafupi 100. Ndipouli chipulikano chakhe kuti chikasunkhunyika chara, nanga wakaghanaghana na za thupi lakhe leneilo likaŵa nga ndakufwa kale, nanga ndi maghanoghano ghakuti Sara wangaŵa na mwana chara.

²⁰Kuti wakakayikapo na phangano la Chiuta chara, kweni wakakhomeskeka mu chipulikano na kumuchindika Chiuta.

²¹Abrahamu wakakhorwa nadi, kuti Chiuta wali na nkhongono kufiska icho wakapangana.

²²Ichi ndicho chifukwa, “Abrahamu wakapulikana na Chiuta, ndipo Chiuta wakamupima kuti ndi murunji.”

²³Kweni mazgu ghakuti, “Chiuta wakapima kuti ndi murunji,” kuti ghakalembekera iyo pera chara,

²⁴kweni ghakalembekeraso na ise wuwo, taŵeneise tikupimika ŵarunji pakupulikana na Chiuta uyo wakamuwuska Yesu, Fumu yithu, ku ŵakufwa.

²⁵Yesu wakaperekeka ku nyifwa chifukwa cha zakwananga zithu, ndipo wakawuskika ku ŵakufwa kuti ise tirunjiskike pa Chiuta.