Read new_tumbuka_bible Ŵaroma 5 Bible Online

Ŵaroma 5 - new_tumbuka_bible bible

Ŵaroma 5

¹Ntheura sono pakuti Chiuta watirunjiska kwizira mu chipulikano, tili na mutende na Chiuta mwa Fumu Yesu Khristu.

²Na chipulikano Yesu watitorera ise mu uchizi wa Chiuta uwo sono tikwimamo, ndipo tikusekerera mu chigomezgo icho tili nacho chakusangana mu uchindami wa Chiuta.

³Kweni kuti mphenepapo pera chara, ise tikusekereraso na mu visuzgo vyithu wuwo, chifukwa tikumanya kuti visuzgo vikutisambizga kuzizipizga.

⁴Kuzizipizga kukuzenga nkharo yiweme mwa Chiuta ndipo nkharo yiweme yikuzenga chigomezgo.

⁵Chigomezgo ichi kuti chikutigongoweska chara, chifukwa Chiuta, mwa Mzimu Mutuŵa uyo wali kutipa, wali kupungulira kutemwa kwakhe mu mitima yithu.

⁶Pakuti apo tikaŵa tichali ŵambula nkhongono, Khristu wakatifwira ise ŵabendezi pa nyengo iyo Chiuta wakasora.

⁷Ndi chinthu chinonono kuti munthu wamufwire murunji. Inya, panji chingaŵako kuti munthu munyakhe wafwire murunji.

⁸Kweni Chiuta watirongora umo iyomwene watitemwera, pakuti apo tikaŵa tichali ŵakwananga, Khristu wakatifwira.

⁹Sono pakuti ndopa zakhe zatirunjiska ise, tili na chigomezgo chakuti iyo watiponoskenge ku ukari wa Chiuta.

¹⁰Pakuti apo tikaŵa tichali ŵarwani ŵa Chiuta, tikaphemaniskika kwa iyo na nyifwa ya Mwana wakhe. Sono pakuti taphemaniskika na nyifwa ya Khristu, tili na chigomezgo chakuti na umoyo wakhe taponoskeka.

¹¹Kuti ndipenepapa pera chara, kweni tikukondwa mwa Chiuta kwizira mwa Fumu yithu Yesu Khristu, mweneuyo sono wakutiphemaniska na Chiuta.

¹²Kwananga kukanjira mu charu cha pasi na munthu yumoza, ndipo nyifwa yikiza na kwananga. Ntheura nyifwa yikatandazgika mu ŵanthu wose, pakuti ŵanthu wose ŵakananga.

¹³Ndipo kwananga kukaŵamo mu charu pambere Chiuta wandapereke marango. Kweni para kulije marango, ŵanthu kuti wakususkika kuti mbakwananga chara.

¹⁴Kweni kwamba pa nyengo ya Adamu kufika pa nyengo ya Mozesi, nyifwa yikawusanga ŵanthu wose. Yikawusanga nanga mpha awo kwananga kwawo kuti kukayana na kwananga kwa Adamu chara uyo wakaswa dango ilo Chiuta wakamupa. Adamu wakaŵa chithuzithuzi cha uyo Chiuta wakati wamkwiza kunthazi.

¹⁵Kweni kuti tingalinganizga chawanangwa cha Chiuta na kwananga kwa Adamu chara. Pakuti usange ŵanthu ŵanandi ŵakafwa chifukwa cha kwananga kwa munthu yumoza, ipo uchizi wa Chiuta na chawanangwa cha uchizi wa munthu yumoza uyo ndi Yesu Khristu vikupika ku ŵanthu ŵanandi.

¹⁶Ndipo chawanangwa cha Chiuta kuti chikuyana na vyakurondezgapo vya kwananga kwa munthu yumoza chara. Wakati wananga munthu yumoza, kukiza weruzgi na kususkika. Uchizi wa Chiuta uwo ukwiza pamanyuma pa zakwananga zinandinandi ukurunjiska ŵanthu.

¹⁷Usange mu chifukwa cha kwananga kwa munthu yumoza yura nyifwa yikamba kuwusa, ipo kwakuruska uchizi wa chawanangwa cha urunji viti viwuse mu munthu yumoza Yesu. Pakuti wose awo ŵakapokera uchizi wa Chiuta unandinandi na urunji nga nchawanangwa, ŵati ŵakharenge na umoyo na kuwusa mwa Yesu Khristu.

¹⁸Ntheura, nga ndi umo kwananga kwa munthu yumoza kukaŵatorera weruzgi na kususkika ŵanthu wose, ntheura ndimo urunji wa munthu yumoza wamkuŵasutulira ŵanthu wose na kuŵapa umoyo.

¹⁹Ntheura nga ndi mukuwura kupulikira kwa munthu yumoza ŵanandi ŵakazgoka kuŵa ŵakwananga, ntheuraso ndimo mukupulikira kwa munthu yumoza ŵanandi ŵati ŵazgokerenge kuŵa ŵarunji.

²⁰Chiuta wakapereka marango kuti ŵanthu ŵamanye unandi wa zakwananga zawo. Kweni apo kwananga kukaŵanga kunandi, uchizi wa Chiuta ukaŵanga unandi kwakuruska.

²¹Ntheura nga ndi umo kwananga kukaŵira na nkhongono kwizira mu nyifwa, ntheuraso uchizi wa Chiuta ngwa nkhongono pakurongora umo Chiuta wakurunjiskira ŵanthu pa maso pakhe na kuŵarongozgera ku umoyo wa muyirayira mwa Yesu Khristu, Fumu yithu.