Read new_tumbuka_bible Ŵaroma 6 Bible Online

Ŵaroma 6 - new_tumbuka_bible bible

Ŵaroma 6

¹Kasi sono tiyowoye vichi? Kasi tiyowoye kuti tirutilire kukhara mu kwananga, mwakuti uchizi wa Chiuta wandane?

²Chara nadi! Ise tili kufwa ku kwananga, kasi tingarutilira uli kukhara mu kwananga?

³Kasi mukumanya chara kuti tose ise tili kubapatizika mwa Khristu Yesu tikabapatizikiraso mu nyifwa yakhe?

⁴Ntheura para tikabapatizikanga, tikasungika pamoza nayo na kusangana nayo mu nyifwa, mwakuti nga ndi umo Khristu wakawuskikira ku nyifwa na nkhongono ya uchindami wa Ŵadada, ntheuraso ise nase tikharenge na umoyo uphya.

⁵Usange tikabatikana na Khristu mu nyifwa yakhe, ntheuraso tamkuŵa nayo pakuwuka, nga ndi umo iyo wakawukira.

⁶Tikumanya kuti unthu withu wakale ukapayikika pa mphinjika pamoza nayo mwakuti khumbo la kutemwa uheni limarizgike, kuti tireke kuŵaso ŵazga ŵa kwananga.

⁷Pakuti para munthu wafwa, ndiko kuti wasutukako ku kwananga.

⁸Sono pakuti tili kufwira lumoza na Khristu, tikupulikana kuti tamkuŵa ŵamoyo pamoza nayo.

⁹Chifukwa tikumanya kuti Khristu wakawuka ku ŵakufwa ndipo wati wafwengeso chara. Nyifwa kuti yiliso na mazaza pa iyo chara.

¹⁰Nyifwa iyo wakafwa, wakafwa ku kwananga kamoza pera kufwira wose. Ndipo umoyo uwo wakukhara nawo, wakukhalira mu kusangana na Chiuta.

¹¹Ntheura namwe mu nthowa yeneiyi mujipime kuti muli ŵakufwa ku kwananga kweni muli ŵamoyo kwa Chiuta pakubatikana pamoza na Khristu Yesu.

¹²Ntheura rekani kuzomerezga kwananga kuti kuwuse mu mathupi ghinu ghakufwa, ndipo mureke kupulikira maulamphalampha gha mathupi.

¹³Mureke kupereka viŵaro vya mathupi ghinu ku kwananga kuti viteŵetere mlimo wakususkana na urunji. Kweni mujipereke kwa Chiuta nga ŵanthu awo ŵawuka ku nyifwa kweni sono muli ŵamoyo. Ndipo viŵaro vyinu vyose muvipereke kwa Chiuta kuti viteŵetere mlimo uwo Chiuta wakukhumba.

¹⁴Pakuti kwananga kuti kuwuseso pa imwe chara, chifukwa kuti muli pasi pa marango chara, kweni pasi pa uchizi wa Chiuta.

¹⁵Kasi sono kwakharachi? Kasi tinangenge chifukwa kuti tili pasi pa marango chara, kweni pasi pa uchizi wa Chiuta? Chara nadi!

¹⁶Mukumanya makora ghene kuti, para mukujipereka kuti muŵe ŵazga ŵa munthu uyo mukupulikira ndiko kuti ndimwe ŵazga ŵa munthu uyo mukupulikira. Sono usange ndimwe ŵazga ŵa kwananga, mufwenge. Kweni usange ndimwe ŵazga ŵa Chiuta, muŵenge ŵarunji pa maso pakhe.

¹⁷Tiwonge Chiuta! Chifukwa imwe kale mukaŵa ŵazga ŵa kwananga, kweni sono mukupulikira na mtima winu wose, unenesko uwo uli mu visambizgo ivyo mukapokerera.

¹⁸Sono mukafwaturika ku zakwananga na kuzgoka kuŵa ŵazga ŵa urunji.

¹⁹Nkhuyowoya kwakuyana na unthu, chifukwa cha kupereŵera kwa kaŵiro kinu. Pa nyengo yimoza mukajipereka nkhanira kuŵa ŵazga ŵakuchita ukazuzi na ubendezi, ntheuraso ndimo mukwenera kujiperekera nkhanira kuŵa ŵazga ŵa urunji kuti muŵe ŵatuŵa mu mtima.

²⁰Para mukaŵa ŵazga ŵa kwananga, kuti mukaghanaghanako na vya urunji wa Chiuta chara.

²¹Kasi mukaŵa na chandulo uli pakuchita vinthu ivyo sono vikumukhozgani soni? Pakuti umaliro wakuchita vinthu vira ndi nyifwa.

²²Kweni sono mwasutulika ku kwananga, ndipo ndimwe ŵazga ŵa Chiuta. Chandulo chakhe nkhutozgeka mu mtima, ndipo pa umaliro mwamkupokera umoyo wa muyirayira.

²³Pakuti njombe ya kwananga ndi nyifwa. Kweni chawanangwa cha Chiuta mbumoyo wa muyirayira mwa Khristu Yesu Fumu yithu.