Read new_tumbuka_bible Ŵaroma 7 Bible Online

Ŵaroma 7 - new_tumbuka_bible bible

Ŵaroma 7

¹Mwa ŵabali, kasi mukumanya chara? Ine nkhuyowoya kwa imwe mukumanya marango. Mukumanya kuti marango ghali na mazaza pa munthu para wachali wamoyo.

²Nga nchiyerezgero, marango ghakukaka mwanakazi wakutengwa apo mufumu wakhe wali wamoyo. Kweni usange mufumu wakhe wafwa, mwanakazi ngwa kusutuka ku marango agho ghakamukakanga ku mufumu wakhe.

³Ntheura, usange wakutengwa ku mwanarume munyakhe apo mufumu wakhe wachali wamoyo, wati wachemekenge kuti ndi muleŵe. Kweni usange mufumu wakhe wafwa, wakusutuka ku marango gha mufumu wakhe ndipo kuti wakuchita uleŵe chara usange wakutengwa ku mwanarume munyakhe.

⁴Ntheura pera na imwe namwe mwa ŵabali ŵane, muli ŵakufwa ku marango mwakuti muŵe viŵaro vya thupi la Khristu mweneuyo wali kuwuskika ku ŵakufwa, mwakuti timupambikire vipambi Chiuta.

⁵Para tikakharanga kwakuyana na kaŵiro ka unthu withu, maulamphalampha gha kwananga agho ghakawuskika na marango, ghakachita nchito mu mathupi ghithu, kupambika vipambi vya nyifwa.

⁶Kweni sono tili ŵakusutuka ku marango, pakuti tili kufwa ku icho kale chikatikakanga. Ipo tikuteŵeteraso marango gha kale ghakulembeka chara, kweni tikuteŵetera Chiuta mu nthowa yiphya ya Mzimu Mutuŵa.

⁷Kasi sono tiyowoye vichi? Kasi tiyowoye kuti Dango nkhwananga? Chara nadi! Ndipouli, ndi Dango ilo likandirongora umo kwananga kuliri. Pakuti mphanyi ndilije kumanya uheni wa kudokera usange Dango lirekenge kundiphalira kuti, “Ungadokeranga.”

⁸Kweni kwananga kukati kwasanga mwaŵi mu marango kukawuska makhumbiro gha kudokera gha mtundumtundu mwa ine. Pakuti pa dera pa marango, kwananga nkhwakufwa.

⁹Ine kale nkhaŵa wamoyo pa dera pa Dango. Kweni Dango ghakati ghiza, kwananga kukawukaso, ndipo nkhafwa.

¹⁰Marango gheneagho ghakaŵa ghakundipa umoyo, nkhawona kuti ghakunditorera ku nyifwa.

¹¹Pakuti kwananga kukati kwasanga mwaŵi mu marango, kukandipusika na kundikoma.

¹²Ntheura dango ndakupatulika, ndipo languro ndakupatulika, lakurunjika na liweme.

¹³Kasi ndiko kuti icho nchiweme ndicho chikandikoma? Chara nadi! Ndi kwananga uko kukandikoma pakuteŵetera pa icho nchiweme. Kwananga kukandikoma mwakuti kaŵiro kakwananga kenecho kavumbukwe kuti nkhwananga nadi. Ntheura kufumira mu marango, kwananga kukuzgoka kuŵa kukuru chomene kwakuruska.

¹⁴Tikumanya kuti marango nga uzimu. Kweni ine ndine munthu wakutomboroka na wakuguliskika kuŵa muzga wa kwananga.

¹⁵Kuti nkhupulikiska chara machitiro ghane. Chifukwa icho nkhukhumba kuchita kuti ndicho nkhuchita chara, kweni icho nkhuchitinkha ndicho nkhuchita.

¹⁶Sono usange nkhuchita icho nkhukhumba kuchita chara, ipo nkhuzomera kuti marango ngaweme.

¹⁷Ntheura kuti ndine nkhuchita chinthu ichi chara, kweni ndi kwananga uko kukukhara mwa ine.

¹⁸Nkhumanya kuti mwa ine mukukhara kanthu kaweme chara, umo ndi mu thupi lane la kwananga. Chifukwa ndili na khumbo la kuchita icho nchiweme, kweni nkhuchita chara.

¹⁹Kuti nkhuchita chiweme icho nkhukhumba kuchita chara. Kweni nkhuchita chiheni icho kuti nkhukhumba kuchita chara.

²⁰Sono usange nkhuchita icho nkhukhumba kuchita chara, ipo kuti ndineso nkhuchita chara, kweni ndi kwananga uko kukukhara mwa ine.

²¹Ntheura nkhusanga kuti ndi dango likugwira nchito mwa ine kuti para nkhukhumba kuchita icho nchiweme, kwananga kuli pafupi nane.

²²Chifukwa mtima wane ukukondwera na Dango la Chiuta.

²³Kweni nkhuwona kuti muli dango linyakhe mu viŵaro vya thupi lane, ilo likulimbana na dango ilo liri mu mtima wane. Dango ili likundizgora ine kuŵa muzga wa dango la kwananga, ilo liri mu thupi mwane.

²⁴Nda munthu wakusokwa ine! Ndi njani wati wandithaske ku thupi ili la nyifwa?

²⁵Tiwonge Chiuta uyo wakuchita ichi mwa Yesu Khristu Fumu yithu! Ntheura ine ndamwene na mtima wane wose nkhuteŵetera marango gha Chiuta, kweni na thupi lane, nkhuteŵetera dango la kwananga.