Read new_tumbuka_bible Ŵaroma 8 Bible Online

Ŵaroma 8 - new_tumbuka_bible bible

Ŵaroma 8

¹Ntheura sono, kulije munthu uyo wangaŵasuska awo ŵali mwa Khristu Yesu.

²Pakuti dango la Mzimu ilo likutipa umoyo mwa Khristu Yesu, liri kundisutula ku dango la kwananga na la nyifwa.

³Chifukwa icho dango likatondeka kuchita, chifukwa cha kutomboroka kwa kaŵiro ka unthu, Chiuta wakachita. Wakatuma Mwana wakhe na wakhe mu kaŵiro ka munthu wakwananga, ndiposo nga ndi sembe ya zakwananga kuti wizakalange kwananga uko kukaŵa mu munthu.

⁴Chiuta wakachita ichi mwakuti vyakukhumbikwa vyenecho vyakukwaniriska dango, vifiskike mwa ise tikukhara kwakuyana na unthu chara, kweni na Mzimu.

⁵Ŵanthu awo ŵakukhara kwakuyana na unthu, maghanoghano ghawo ghakurongozgeka na icho mathupi ghawo ghakukhumba. Kweni awo ŵakukhara na makhumbiro gha Mzimu maghanoghano ghawo ghakurongozgeka na icho Mzimu ukukhumba.

⁶Chifukwa kuŵika mtima pa vya thupi ndi nyifwa, kweni kuŵika mtima pa vya Mzimu ndi umoyo na mutende.

⁷Pakuti kuŵika mtima pa makhumbiro gha thupi, nkhujizgora murwani wa Chiuta. Ŵanthu ŵa ntheura kuti ŵangapulikira Chiuta chara, ndipo nadi kuti ŵangamukondweska chara.

⁸Awo ŵakupulikira makhumbiro gha mathupi ghawo, kuti ŵakumanya kumukondweska Chiuta chara.

⁹Kweni imwe kuti mukurongozgeka na makhumbiro gha mathupi ghinu chara. Mukurongozgeka na Mzimu, usange nadi Mzimu wa Chiuta ukukhara mwa imwe. Kweni usange munthu walije Mzimu wa Khristu, kuti ngwa Khristu chara.

¹⁰Kweni usange Khristu wakukhara mwa imwe, nanga mathupi ghinu ngakufwa chifukwa cha zakwananga, mizimu yinu nja moyo chifukwa Chiuta wali kumurunjiskani.

¹¹Usange Mzimu wa Chiuta uyo wakamuwuska Yesu ku ŵakufwa wakukhara mwa imwe, Chiuta uyo wakamuwuska Khristu Yesu ku ŵakufwa wamkughapaso umoyo mathupi ghinu ghakufwa na Mzimu wakhe mweneuyo wakukhara mwa imwe.

¹²Ntheura mwa ŵabali, tili na ngongole, kweni ngongole yakhe kuti njakuti tikharenge kwakuyana na unthu chara.

¹³Chifukwa usange mukukhara kwakuyana na unthu, muti mufwenge. Kweni usange mukukhara kwakuyana na Mzimu, mukukoma milimo yiheni ya mathupi ghinu, ndipo muti muŵenge ŵamoyo.

¹⁴Wose awo ŵakurongozgeka na Mzimu wa Chiuta mbana ŵa Chiuta.

¹⁵Pakuti mzimu uwo Chiuta wali kumupani kuti ngwa kumuzgorani ŵazga na kumutorerani ku wofi chara. Kweni ndi Mzimu mweneuyo wakumuzgorani kuŵa ŵana ŵa Chiuta, ndipo na nkhongono ya Mzimu weneuwo tikuchemerezga kuti “Abba, Ŵadada.”

¹⁶Mzimu wa Chiuta pamoza na mzimu withu, ŵakutipanikizgira kuti tili ŵana ŵa Chiuta.

¹⁷Sono usange tili ŵana ŵa Chiuta, ipo tiliso ŵahariri ŵa Chiuta ndiposo ŵahariri ŵamoza na Khristu para tikusangana nayo mu visuzgo vyakhe, mwakuti nase tichindikike nayo pamoza.

¹⁸Ine nkhupima kuti visuzgo vyithu vya nyengo yino kuti vikulinganizgika na uchindami uwo Chiuta wizamkutivumbulira ise chara.

¹⁹Chifukwa vyakulengeka vikulindizga na kunweka kukuru kuti Chiuta wavumbule ŵana ŵakhe.

²⁰Pakuti vyakulengeka kuti vikazgoreka kuŵa vya waka na khumbo lakhe chara, kweni na khumbo la Chiuta uyo wakakhumba kuti viŵe ntheura mu chigomezgo,

²¹chakuti zuŵa linyakhe chilengiwa nacho chamkusutulika ku uzga wakhe wa kuvunda, kuti chipokereko wanangwa na uchindami wa ŵana ŵa Chiuta.

²²Chifukwa tikumanya kuti chilengiwa chose chikutampha mpaka sono nga ndi mwanakazi uyo wakupulika vyakuŵinya pa nyengo ya kubabira.

²³Kuti chikutampha nchakulengeka pera chara, kweni na ise wuwo ise tili na chawanangwa chakudanga cha Mzimu, tikutampha cha mukatikati apo tikulindirira kuti Chiuta watipokerere nga ŵana ŵakhe na kuwombola mathupi ghithu.

²⁴Nadi Chiuta wali kutiponoska na chigomezgo. Kweni usange tikugomezga icho tikuchiwona, kuti nchigomezgo chara. Kasi ndi njani uyo wangagomezga icho wakuchiwona.

²⁵Kweni usange tikugomezga chara icho tikuchiwona na maso, tikuchilindirira na kuzizipizga.

²⁶Ntheura pera Mzimu wakutovwira ise mu kutomboroka kwithu. Chifukwa tikumanya chara umo tingarombera, Mzimu iyomwene ndiyo wakutiŵeyerera ise na mitampho yambula mayowoyeko.

²⁷Kweni Chiuta uyo wakusanda mitima ya ŵanthu, wakumanya icho Mzimu wakughanaghana, pakuti ndi Mzimu uyo wakuŵaŵeyerera ŵanthu ŵa Chiuta kwakuyana na khumbo la Chiuta.

²⁸Chifukwa tikumanya kuti mu vinthu vyose Chiuta wakuŵachitira makora awo ŵakumutemwa, ŵeneawo wali kuŵachema kwakuyana na urato wakhe.

²⁹Pakuti awo Chiuta wakaŵamanya kale wali kuŵamikirathu na kuŵazgora kuti ŵaŵe nga ndi Mwana wakhe, mwakuti iyo waŵenge mukuru mu ŵabali ŵanandi.

³⁰Ntheura wose awo Chiuta wakaŵasora kale, ndiwo wali kuŵachema. Ndipo awo wakaŵachema wali kuŵarunjiskaso. Ndiposo awo wali kuŵarunjiska, wakasangana nawo uchindami wakhe.

³¹Kasi sono tingayowoya vichi pa vyose ivi? Usange Chiuta wali pamoza nase, ndi njani wangimikana nase?

³²Chiuta kuti wakakanilira Mwana wakhe chara, kweni wakamupereka chifukwa cha ise tose. Iyo wakatipa Mwana wakhe, kasi wangarekaso uli kutipa vinthu vyose kwa wanangwa pamoza na iyo?

³³Kasi ndi njani wati wachombolenge ŵakusoreka ŵa Chiuta? Ndi Chiuta mwenecho uyo wakurunjiska.

³⁴Kasi ndi njani uyo wangasuska? Kasi ndi Khristu Yesu uyo wakafwa? Inya, mweneuyo wakawuka ku ŵakufwa, uyo wali ku woko la maryero la Chiuta, mweneuyo nadi wakutiŵeyerera?

³⁵Ndi njani wati watipatulenge ku kutemwa kwa Khristu? Kasi ndi suzgo, panji vyakuŵinya, panji kuzikizgika, panji njara, panji kwenda nkhule, panji urwari, panji kukomeka na lupanga?

³⁶Nga ndi umo kuli kulembekera kuti, “Chifukwa cha imwe, tikukomeka zuŵa na zuŵa, tili nga ndi mberere izo zapimikira kukomeka.”

³⁷Chara, mu vyose vyeneivi tikuviruskira mwa mweneuyo wakatitemwa.

³⁸Chifukwa ine ndakhorwa kuti palije kanthu ako kangatipatula ku kutemwa kwakhe, kwali ndi nyifwa, panji umoyo, nesi ŵangelo, panji ŵakuwusa, nesi ivyo viliko, nesi ivyo vikwiza, nesi vya nkhongono,

³⁹kunyang'amira, nesi kuzonthoka panji kanthu kanyakhe kose mu vilengiwa vyose kuti kangatipatula ise chara ku kutemwa kwa Chiuta uko tili nako mwa Khristu Yesu Fumu yithu.