Read new_tumbuka_bible Ŵaroma 9 Bible Online

Ŵaroma 9 - new_tumbuka_bible bible

Ŵaroma 9

¹Ine nkhuyowoya unenesko, mwa Khristu, ndipo nkhuteta chara. Njuŵi yane, pakurongozgeka na Mzimu Mutuŵa yikukhozgera kuti nkhuteta chara.

²Ndili na chitima chikuru chomene, na kuŵinya kwambula kurekezga mu mtima wane.

³Ndakhumba kuti mphanyi ine ndaŵa wakutembeka kwa Chiuta na kuwuskikako kwa Khristu chifukwa cha ŵabali ŵane awo mba mtundu wane.

⁴Iwo aŵa mbaIsraele ŵeneawo Chiuta wali kuŵazgora kuŵa ŵana ŵakhe, ndipo wali kuŵavumbulira uchindami wakhe. Wakaŵa na mapangano na iwo, ndipo wakaŵapa marango ghakhe. Ŵanthu aŵa ŵakusopa mu unenesko ndipo ŵali kupokera malayizgano gha Chiuta.

⁵Ŵanthu aŵa ndi mphapu ya ŵasekuru ŵithu ndipo Khristu wakafuma ku fuko lawo, kwakuyana na unthu. Chiuta mweneuyo wakuwusa vyose wachindikike kwa muyirayira, Ameni.

⁶Kweni kuti chili nga ndi para Chiuta watondeka kufiska phangano lakhe chara. Chifukwa kuti ndi wose ŵaIsraele chara awo mbanthu ŵa Chiuta.

⁷Ndipo kuti ndi yose mphapu ya Abrahamu chara iyo mbana ŵa Chiuta. Chifukwa Chiuta wakati kwa Abrahamu, “Ndi mwa Yisake umo mphapu yako yichemekerenge.”

⁸Ichi chikung'anamula kuti, ŵana ŵakubabika na thupi kuti ndiwo ŵana ŵa Chiuta chara, kweni awo ŵali kubabika chifukwa cha phangano la Chiuta ndiwo mba mphapu ya Abrahamu nadi.

⁹Pakuti Chiuta wakapangana na mazgu ghakuti, “Pa nyengo ya nga ndi iyi ndamkuwera, ndipo Sara wizamkuŵa na mwana mwanarume.”

¹⁰Kuti mphenepapo pera chara. Rebeka wakaŵa na ŵana awo ŵakababika na wiskewo yumoza, ndiyo Yisake, sekuru withu.

¹¹Ŵana ŵachali ŵandababike ndiposo ŵandachite kanthu kaweme panji kaheni, wakakhumba chakurata chakusankhira munthu waliyose chirutilire. Chiuta wakachita ichi chifukwa cha nchito zakhe chara, kweni chifukwa chakuti Chiuta wakamuchema.

¹²Ntheura Chiuta wakamuphalira Rebeka kuti, “Mukuru wakhe wamkuteŵetera munung'una wakhe.”

¹³Nga ndi umo malembo ghakuyowoyera kuti, “Nkhamutemwa Yakhobe, kweni Esau nkhamutinkha.”

¹⁴Kasi sono tiyowoye vichi? Kasi tiyowoye kuti Chiuta ndi murunji chara? Na pachoko pose!

¹⁵Chifukwa Chiuta wakuti kwa Mozesi, “Ndamkuŵa wa lusungu, kwa uyo nkhukhumba kumuchitira lusungu. Ndamkuŵa na chiwuravi, kwa uyo nkhukhumba kuŵa nayo na chiwuravi.”

¹⁶Ntheura kuti ndi chifukwa cha khumbo la munthu panji milimo yakhe chara, kweni ndi lusungu lwa Chiuta pera.

¹⁷Pakuti malembo ghakayowoya kwa Faro kuti, “Nkhakwimika kuŵa karonga kuti mwa iwe ndirongore nkhongono yane, ndipo kuti zina lane lithuwuskike mu charu chose.”

¹⁸Ntheura Chiuta wakuchita lusungu pa uyo wakukhumba kumuchitira lusungu, kweniso wakunonofya mtima wa uyo wakukhumba.

¹⁹Yumoza mwa imwe wangandifumba kuti, “Usange umu ndimo viliri, kasi chifukwa uli Chiuta wachali kusanga vifukwa ku ŵanthu? Kasi ndi njani wangimikana na khumbo la Chiuta?”

²⁰Kasi iwe wa munthu, ndiwe njani kuti ususkane na Chiuta? Kasi chiŵiya chingayowoya kwa uyo wakuchiwumba kuti, “Chifukwa uli ukandiwumba ntheura?”

²¹Kasi muwuvi walije mazaza pa dongo lakhe kuwumbira viŵiya viŵiri na burunga la dongo limoza pera chiŵiya chimoza cha kuzirwa na chinyakhe chambula kuzirwa?

²²Ndipo ndi ntheura pera na umo Chiuta wakuchitira. Iyo wakakhumba kurongora ukari wakhe na nkhongono zakhe kuti ŵanthu ŵavimanye. Kweni wakaŵazizipizgira chomene ŵanthu awo wakaŵakaripira ŵeneawo ŵakatenge waŵamare petu.

²³Chiuta wakakhumbaso kuti usambazi ukuru wa uchindami wakhe umanyikwe kwa ise, weneuwo wakatipa ise tili chakurata cha lusungu lwakhe, taŵeneise wali kutichema kuti tipokere uchindami wakhe.

²⁴Chifukwa ndise ŵanthu awo Chiuta wali kuchema, kufuma mu ŵaYuda pera chara, kweni na mu ŵamitundu wuwo.

²⁵Nga ndi umo Chiuta wakuyowoyera mu Buku la nchimi Hoseya kuti, “Awo kuti ŵakaŵa ŵanthu ŵane chara, ndiŵachemenge ŵanthu ŵane. Ndipo mtundu wa ŵanthu uwo ukawura kutemweka, nditi ndiwucheme ‘Wakutemweka wane.’ ”

²⁶“Ndipo ku malo gheneagha ŵakaphalirika kuti, ‘Ndimwe ŵanthu ŵane chara.’ Kwenekura ŵamkuchemeka ‘Ŵana ŵa Chiuta wamoyo.’ ”

²⁷Nchimi Yesaya wakachemerezga vya ŵaIsraele wakati, “Nanga ŵaIsraele ŵangaŵa ŵanandi nga ndi muchenga wa mu nyanja, kweni ŵakukharapo ŵachoko waka ndiwo ŵamkuponoskeka.

²⁸Pakuti Fumu mwaluŵiro yamkweruzga mirandu ya ŵanthu mu charu. Ndipo yamkuchita ichi luŵiro na mwakudumula.”

²⁹Ichi chili nga ndi umo nchimi Yesaya wakayowoyera kuti, “Fumu Mwenenkhongono zose, yirekenge kutisidira ŵana, mphanyi ise tili nga ndi Sodomu, na kuŵa nga ndi Gomora.”

³⁰Kasi sono tiyowoye vichi? Tiyowoye kuti ŵamitundu awo kuti ŵakawupenjanga urunji wa Chiuta chara ŵali kuwusanga urunji uwu mu chipulikano.

³¹Kweni ŵaIsraele ŵakatondeka kuwusanga urunji wa Chiuta weneuwo ŵakayezga chomene kuwurondezga pakusungilira marango.

³²Chifukwa nchichi? Chifukwa ŵakakhumba kuŵa ŵarunji pa maso pa Chiuta pakupulikana chara, kweni pakugomezga milimo yawo. Ŵakakhuŵara pa libwe la chikhuŵazgo.

³³Nga ndi umo kuli kulembekera kuti, “Wona nkhuŵika libwe mu Ziyoni ilo ŵanthu ŵamkukhuŵarapo. Jarawe ilo lamkuŵaphizga, ndipo yose uyo wakupulikana na iyo, kuti waŵenge na soni chara.”