Read new_tumbuka_bible 1 ŴaKorinte 1 Bible Online

1 ŴaKorinte 1 - new_tumbuka_bible bible

1 ŴaKorinte 1

¹Kufuma kwa ine Paulosi, wakuchemeka kuŵa wakutumika wa Khristu Yesu, na khumbo la Chiuta, na mubali withu Sositene.

²Ku mpingo wa Chiuta uwo uli mu Korinte weneuwo Chiuta wali kuwutuŵiska mwa Khristu Yesu, imwe muli kuchemeka kuti muŵe ŵatuŵa pamoza na wose awo ŵakusopa Fumu yithu Yesu Khristu, mu malo ghose. Iyo ndiyo Fumu yawo na Fumu yithu wuwo.

³Uchizi na mutende vyakufumira kwa Chiuta Ŵadada na kwa Fumu yithu Yesu Khristu viŵenge namwe.

⁴Mazuŵa ghose nkhuwonga Chiuta wane chifukwa cha imwe, pakuti wamupani uchizi wakhe mwa Khristu Yesu.

⁵Pakuti mwa Khristu mwasambazga mu vyose, mu kayowoyero kose na mu umanyi wose.

⁶Chifukwa mazgu gha ukaboni wa Khristu ghakhozgeka mwa imwe,

⁷mwakuti mukukavuka chawanangwa chilichose cha uzimu chara, apo mukulindirira kwizaso kwa Fumu yithu Yesu Khristu.

⁸Iyo wizamkumukhozgani mpaka pa umaliro, kuti mwizakaŵavye kalema pa zuŵa la Fumu yithu Yesu Khristu.

⁹Chiuta ngwa kugomezgeka ndipo wali kumuchemerani ku wenenawene wa Mwana wakhe Yesu Khristu Fumu yithu.

¹⁰Mwa ŵabali, nkhumuŵeyani mu zina la Fumu yithu Yesu Khristu kuti mose muŵenge ŵakupulikana pa icho mukuyowoya. Kureke kuŵamo mphatukano mukati mwinu, kweni muŵe pamoza nadi mu kaghanaghaniro na mu keruzgiro yumoza na munyakhe na mtima umoza na urato umoza.

¹¹Chifukwa ŵanji ŵa mu mbumba ya Kolowe ŵandiphalira kuti mphindano zilimo mukati mwinu, mwa ŵabali ŵane.

¹²Icho nkhung'anamula nchakuti waliyose wa imwe wakuyowoya vyakhe na vyakhe kuti, “Ine ndili wa Paulosi,” munyakhe wakuti, “Ine ndili wa Apolo,” munyakhe wakuti, “Ine ndili wa Kefase,” ndipo munyakhe wakuti, “Ine ndili wa Khristu.”

¹³Kasi Khristu wali kugaŵikana? Kasi ndi Paulosi uyo wakamufwirani pa mphinjika? Kasi mukabapatizikira mu zina la Paulosi?

¹⁴Nkhumuwonga Chiuta chifukwa ine kuti nkhabapatizapo yumoza wa imwe chara, kweni Krisipo na Gayo pera.

¹⁵Ntheura palije na yumoza mukati mwinu uyo wangayowoya kuti wakabapatizika mu zina lane.

¹⁶Inya nadi, nkhabapatizaposo mbumba ya Stefanasi, kweni kuti nkhumanya chara kuti nkhabapatiza munyakheso.

¹⁷Chifukwa Khristu kuti wakandituma kubapatiza chara, kweni kupharazga Uthenga Uweme. Ndipo nkhwenera kuwupharazga mu mahara gha mayowoyero gha unthu chara, mzire mphinjika ya Khristu yizgoke kuŵa yambula nkhongono.

¹⁸Pakuti kupharazga mazgu gha vya nyifwa ya Yesu pa mphinjika, mbuchindere kwa awo mbakutayika, kweni kwa ise tikuponoskeka, ndi nkhongono ya Chiuta.

¹⁹Pakuti kuli kulembeka kuti, “Ŵanthu ŵa vinjeru nditi ndimare vinjeru vyawo, ndipo nditi nditimbanizge uchenjezi wa ŵakuchenjera.”

²⁰Kasi walinkhu munthu wa mahara? Walinkhu mumanyi-marango? Kasi walinkhu wakumanya mphindano za mu charu? Asi Chiuta wali kuzgora kuŵa uchindere mahara gha mu charu?

²¹Pakuti Chiuta mu mahara ghakhe wakatondeska kuti ŵanthu ŵareke kumumanya iyo na mahara ghawo. Kweni na mazgu agho ŵanthu ŵakuti mbuchindere gheneagho ise tikughapharazga, chikamukondweska Chiuta kuponoska ŵanthu awo ŵakupulikana.

²²Pakuti ŵaYuda ŵakupenja vimanyikwiro, ndipo ŵaGriki nawo ŵakupenja mahara.

²³Kweni ise tikupharazga Khristu uyo wakapayikika pa mphinjika. Ku ŵaYuda nchikhuŵazgo ndipo ku ŵamitundu mbuchindere.

²⁴Kweni ku wose awo Chiuta wali kuŵachema, manyi mbaYuda manyi mbaGriki, Khristu ndi nkhongono za Chiuta na mahara gha Chiuta.

²⁵Chifukwa icho chikuwoneka kuti mbuchindere wa Chiuta, ncha mahara kuruska mahara gha ŵanthu. Icho chikuwoneka kuti nkhutomboroka kwa Chiuta, ncha nkhongono kuruska nkhongono za ŵanthu.

²⁶Mwa ŵabali, ghanaghanani na za nchemo yinu. Ŵanandi ŵa imwe kuti mukaŵa ŵamahara nga ndi umo ŵanthu ŵa mu charu ŵakupimira chara. Pakaŵavye ŵanandi ŵankhongono panji ŵakubabiwira mu wanangwa.

²⁷Kweni Chiuta wakasora icho ŵanthu ŵakuti mbuchindere mu charu kuti walengeske ŵamahara. Chiuta wakasora icho ŵanthu ŵakuti mbutechitechi mu charu kuti walengeske awo mbankhongono.

²⁸Chiuta wakasora ivyo nvichwapi mu charu na ivyo nvyakuyuyuka, ndiposo na ivyo vikupimika kuti nkhanthu chara, kuti wavizgore vyawaka ivyo ŵakuti ndi vyanadi.

²⁹Chiuta wakachita ivi kuti munthu wareke kujikuzga panthazi pakhe.

³⁰Chiuta ndiyo chitopoko cha umoyo winu mwa Khristu Yesu, ndipo wali kumuzgora Khristu kuŵa mahara ghithu, urunji withu, utuŵa withu na kuwombokwa kwithu.

³¹Nga ndi umo kuli kulembekera kuti, “Uyo wakuthumbwa, wathumbwire mwa Fumu.”