Read new_tumbuka_bible 1 ŴaKorinte 10 Bible Online

1 ŴaKorinte 10 - new_tumbuka_bible bible

1 ŴaKorinte 10

¹Mwa ŵabali, nkhukhumba kumumanyiskani, kuti ŵasekuru ŵithu wose ŵakarongozgeka na bingu ilo likaŵa pachanya pawo, ndipo wose ŵakambuka nyanja.

²Mu bingu ili na nyanja iyi ndimo wose ŵakabapatizikira mwa Mozesi.

³Wose ŵakarya chakurya cha uzimu chakuyana waka

⁴ndipo wose ŵakamwa chakumwa cha uzimu chakuyana waka. Chifukwa ŵakamwa kufuma mu jarawe la uzimu, ilo likaŵarondezganga, ndipo jarawe lira wakaŵa Khristu.

⁵Kweni Chiuta kuti wakakondwa na ŵanandi ŵa iwo chara, ntheura ŵanandi ŵakamalira mu mapopa.

⁶Vinthu vyose ivi vikaŵa virongorero kwa ise na nchenjezgo kuti tireke kuŵa na mtima wa kukhumba viheni nga ndi umo iwo ŵakachitira.

⁷Mureke kuŵa ŵakusopa vikozgo nga ndi umo ŵakaŵira ŵanji mwa iwo; nga ndi umo kuli kulembekera kuti, “Ŵanthu ŵakakhara pasi kuti ŵarye na kumwa ndipo ŵakawuka na kwamba kuvina mwa ukazuzi.”

⁸Tireke kuchita mauzaghali nga ndi umo ŵakachitira ŵanji mwa iwo, ndipo ŵanthu vikwi 23,000 ŵakafwa mu zuŵa limoza.

⁹Tireke kuyezga Fumu nga ndi umo ŵanji ŵakachitira ndipo ŵakakomeka na zinjoka,

¹⁰Nesi kusinginika nga ndi umo ŵakachitira ŵanyakhe ŵa iwo, ndipo ŵakakomeka na Mungelo wakuparanya yura.

¹¹Vinthu ivi vikaŵachitikira iwo nga ndi nchenjezgo. Ndipo vili kulembeka nga nchisambizgo kwa taŵeneise umaliro wa mgonezi waneng'enera.

¹²Ntheura uyo wakughanaghana kuti ngwa kukhora, wachenjere mzire wawe.

¹³Chiyezgo chose icho chamuwirani chikupambana chara na icho chikuwira ŵanthu wose, kweni Chiuta ngwa kugomezgeka ndipo wati wamurekaninge kuti muyezgeke kuruska nkhongono zinu chara, ndipo para chiyezgo chikwiza, panyengo yeneiyo wati wamunozgerani nthowa ya kuthaskikira, mwakuti mumanye kuŵa ŵakuzizipizga.

¹⁴Ntheura mwa ŵabali ŵakutemweka, rekani kusopa vikozgo.

¹⁵Nkhuyowoya kwa imwe nga mbanthu ŵamahara. Yeruzgani mwekha ivyo nkhuyowoya.

¹⁶Nkhombo ya vitumbiko iyo ise tikuyitumbika, asi ndi nkhombo ya wenenawene mu ndopa za Khristu? Ndiposo chingwa icho tikumenya, asi ndi wenenawene withu mu thupi la Khristu?

¹⁷Chifukwa kuli chingwa chimoza, ndipo ise nanga tili ŵanandi, tili thupi limoza, pakuti tose tikusangana mu chingwa ichi chimoza pera.

¹⁸Wonani ŵaIsraele umo ŵakuchitira. Asi awo ŵakurya vya sembe mbakuteŵetera lumoza pa jochero?

¹⁹Kasi nkhurongorachi pa ichi? Kasi chakurya chakuperekeka ku vikozgo, nkhanthu kene-kene? Panji chikozgo ichochene, nkhanthu kene-kene?

²⁰Chara, kweni nkhurongora kuti icho ŵanthu ŵakuwaro ŵakupereka nga ndi sembe, ŵakupereka ku viŵanda kuti nkhwa Chiuta chara. Ndipo nkhukhumba chara kuti musanganenge na viŵanda.

²¹Kuti mungamwera mu nkhombo ya Fumu na kumweraso mu nkhombo ya viŵanda chara. Ndipo kuti mungaryera pa thebulu la Fumu, na kuryeraso pa thebulu la viŵanda chara.

²²Kasi tikukhumba kwavya Fumu kuti yiŵe na sanje? Kasi tili na nkhongono kuruska iyo?

²³Iwo ŵakuti, “Vinthu vyose nvyakuzomerezgeka,” kweni vyose kuti nvyakovwira chara, “Vinthu vyose nvyakuzomerezgeka,” kweni vyose kuti vikuzenga chara.

²⁴Kuŵavye munthu wakupenja viweme vyakhe pera, kweni wapenjere viweme na ŵazengezgani ŵakhe wuwo.

²⁵Muryenge chose icho chikuguliskika pa msika wa nyama kwambula kufumbapo kanthu chifukwa cha njuŵi.

²⁶Chifukwa, “Charu ncha Fumu na vyose ivyo vilimo.”

²⁷Usange wambula kupulikana wakukuchema kuti ukarye nayo chakurya, para wazomera kuruta, ukaryenge waka chose icho ŵakukharikira kwambula kufumbapo kanthu chifukwa cha njuŵi.

²⁸Kweni usange munthu munyakhe wakuti kwa iwe, “Ichi chaperekeka kuŵa sembe ku vikozgo,” chifukwa cha uyo wangukuphalira mazgu agha, ndiposo chifukwa cha njuŵi, ureke kurya.

²⁹Ndipo pa chifukwa cha njuŵi, nkhung'anamula njuŵi zako chara, kweni chifukwa cha njuŵi zakhe, ureke kurya.

³⁰Usange ine nkhurya na kuwonga, chifukwa uli nkhususkika pa icho ine nkhuperekapo viwongo?

³¹Ntheura manyi mukurya panji mukumwa, panji chose icho mukuchita, chitani chose mu uchindami wa Chiuta.

³²Mureke kukhuŵazga ŵaYuda, panji ŵamitundu, panji ŵa mpingo wa Chiuta.

³³Nga ndi umo nkhuyezgera kukondweska munthu yose mu vyose, kuti nkhupenja uweme wane chara, kweni uweme wa ŵanandi, mwakuti ŵaponoskeke.