Read new_tumbuka_bible 1 ŴaKorinte 11 Bible Online

1 ŴaKorinte 11 - new_tumbuka_bible bible

1 ŴaKorinte 11

¹Muŵe ŵakuchita nga ndi umo ine nkhuchitira pakurondezga Khristu.

²Nkhumurumbani chifukwa mukundikumbuka mu vyose, ndiposo mukusungilira maluso nga ndi umo nkhaghaperekera kwa imwe.

³Sono nkhukhumba kuti mumanye kuti mutu wa mwanarume waliyose ndi Khristu, mutu wa mwanakazi ndi mufumu wakhe, ndipo mutu wa Khristu ndi Chiuta.

⁴Mwanarume yose uyo wakuromba panji wakupharazga uku wavwarako ku mutu wakhe wakuyuyura Khristu uyo ndi mutu wakhe.

⁵Mwanakazi yose uyo wakuromba panji wakupharazga uku walije kuvwara chidiko ku mutu, wakuyuyura mufumu wakhe uyo ndi mutu wakhe. Vikuyana waka nga ndi para wameta mupara ku mutu wakhe.

⁶Pakuti usange mwanakazi wati wareke kuvwara chidiko ku mutu wakhe, wakwenera kumeta sisi lakhe. Kweni usange nchasoni kuti mwanakazi wamete mupara panji wamete sisi lakhe lose, wakwenera kuvwara chidiko.

⁷Mwanarume wakwenera chara kuvwarako ku mutu wakhe, chifukwa iyo nchikozgo na uchindami wa Chiuta. Kweni mwanakazi ndi uchindami wa mwanarume.

⁸Chifukwa mwanarume kuti wakapangika kufuma ku mwanakazi chara, kweni mwanakazi ndiyo wakapangika kufuma ku mwanarume.

⁹Nesi mwanarume kuti wakalengekera mwanakazi chara, kweni mwanakazi wakalengekera mwanarume.

¹⁰Pa chifukwa ichi, ndiposo pa chifukwa cha ŵangelo, mwanakazi wakwenera kuvwara chidiko ku mutu wakhe kurongora kuti wali pasi pa mazaza gha mufumu wakhe.

¹¹Ndipouli panthazi pa Fumu, mwanakazi kuti wangawusa ku mwanarume chara, nanga ndi mwanarume kuti wangawusa ku mwanakazi chara.

¹²Pakuti nga ndi umo mwanakazi wakafumira ku mwanarume, ntheuraso mwanarume wali kubabika kufuma ku mwanakazi, ndipo vinthu vyose vikafuma kwa Chiuta.

¹³Mweruzge mwekha, kasi nchakwenerera kuti mwanakazi wasope Chiuta kwambula kuvwarako ku mutu?

¹⁴Kasi kaŵiro ikokene kakumusambizgani chara kuti usange mwanarume wali na sisi litali, ndi chinthu cha soni kwa iyo.

¹⁵Kweni usange mwanakazi wali na sisi litali, ndiwo uchindami wakhe. Chifukwa sisi litali, liri kupika kwa iyo nga ndi chidiko.

¹⁶Usange munthu munyakhe wakususka udumuliro uwu, nkhumuphalirani kuti kulije kaluso kanyakhe mukati mwithu panji mu mpingo wose wa Chiuta.

¹⁷Kweni pa chisambizgo ichi kuti nditi ndimurumbani chara. Chifukwa mu maungano ghinu mukuchita uweme chara, kweni uheni pera.

¹⁸Kakudanga nkhakuti, para imwe mukuwungana nga ndi mpingo, nkhupulika kuti mukuŵa na zimphatukano mukati mwinu, ndipo nyengo zinyakhe nkhugomezga kuti mbunenesko.

¹⁹Zingaŵamo nadi zimphatukano mukati mwinu kuti awo mbaneneska ŵawoneke pakweru.

²⁰Para mukuwungana pamoza mwa ntheura, kuti ndi Monesko wa Fumu chara,

²¹chifukwa para mukurya, waliyose wakujiryera chakurya chakhe, ndipo yunji wali na njara apo munyakhe waloŵera.

²²Kasi mulije nyumba zinu kuti ndimo muryerenge na kumweramo? Panji, mukukhumba kuyuyura Mpingo wa Chiuta na kukhozga soni ŵakusoŵerwa? Kasi ndiyowoyechi kwa imwe? Kasi ndimurumbani pa ichi? Nadi kuti ndingamurumbani chara.

²³Pakuti icho nkhapokera kufuma kwa Fumu, ncheneicho ndicho nkhapereka kwa imwe chakuti, Fumu Yesu, mu usiku weneuwo ŵakamwendera mphiska, wakatora chingwa,

²⁴ndipo wakati wawonga, wakachimenya, na kuti, “Ili ndi thupi lane, ilo likuperekeka chifukwa cha imwe. Chitani ichi kuti mundikumbuke.”

²⁵Mwa ntheura pera, ŵakati ŵamara kurya, Yesu wakatora nkhombo. Ndipo wakati, “Nkhombo iyi ndi phangano liphya mu ndopa zane. Nyengo zose para mukumwa, chitani ichi kuti mundikumbukenge.”

²⁶Chifukwa nyengo zose para mukurya chingwa ichi, na kumwapo nkhombo iyi, mukuthuwuska nyifwa ya Fumu, yisuke yize.

²⁷Ntheura yose uyo wakurya chingwa ichi, na kumwapo nkhombo ya Fumu kwambula kwenerera, wali na mrandu, wakwanangira thupi na ndopa za Fumu.

²⁸Kweni munthu wakwenera kujiyezga danga, ndipo waryenge chingwa na kumwapo vya mu nkhombo.

²⁹Chifukwa yose uyo wakurya panji kumwa kwambula kumanyiska thupi la Fumu na ndopa zakhe, wakujiryera na kujimwera keruzgiro ka Fumu.

³⁰Ndicho chifukwa ŵanandi mwa imwe mbakutomboroka, mbarwari, ndipo ŵanandiso ŵali kufwa kale.

³¹Kweni usange tikujeruzga na unenesko, mphanyi tikweruzgika chara.

³²Kweni para tikweruzgika na Fumu tikulangika mwakuti tireke kususkika pamoza na ŵanthu ŵa charu cha pasi.

³³Ntheura mwa ŵabali, para mukuwungana pamoza kuti murye, lindizganani.

³⁴Usange yunji wali na njara, warye ku nyumba yakhe mwakuti wareke kweruzgika para mukuwungana pamoza. Kuyana na makani ghanyakhe ndizamkumurongozgani para ndiza kwenekuko.