Read new_tumbuka_bible 1 ŴaKorinte 12 Bible Online

1 ŴaKorinte 12 - new_tumbuka_bible bible

1 ŴaKorinte 12

¹Sono, mwa ŵabali, nga ndi vyawanangwa vya Mzimu kuti nkhukhumba chara kuti imwe muŵe ŵalemwa.

²Mukumanya kuti para mukaŵa ŵa kuwaro, mukapuruskika kukusopa vikozgo vyambula kuyowoya.

³Ntheura nkhukhumba kuti mupulikiske kuti palije na yumoza uyo wakuyowoyera mu Mzimu wa Chiuta mweneuyo wangamanya kuyowoya kuti, “Yesu watembeke,” ndipo na yumoza wangayowoya kuti, “Yesu ndi Fumu” kwambula kuti warongozgeka na Mzimu Mutuŵa.

⁴Pali vyawanangwa vyakupambanapambana, kweni Mzimu njumoza pera.

⁵Pali mauteŵeti ghakupambanapambana, kweni Fumu njimoza pera.

⁶Pali machitiro gha zinchito ghakupambanapambana, kweni Chiuta njumoza pera mweneuyo wakukhuŵirizga mu vinthu vyose mu wose.

⁷Ku munthu munyakhe Mzimu wakujirongora mu nthowa yakhe na yakhe chifukwa cha uweme wa wose.

⁸Pakuti ku munyakhe kukupika kwizira mu Mzimu chawanangwa chakuyowoya vya mahara, munyakhe chawanangwa chakuyowoya mazgu gha umanyi, kwakuyana na Mzimu mweneyuyu pera.

⁹Ku munyakhe kukupika chipulikano, na Mzimu mweneyuyu pera, ku munyakhe vyawanangwa vya kuchizga na Mzimu mweneyuyu pera.

¹⁰Ku munyakhe milimo ya minthondwe, ku munyakhe uchimi, ku munyakhe kamanyiro kakupambaniskira mizimu, ku munyakhe viyowoyero vyakupambanapambana, ku munyakhe kung'anamulira mazgu.

¹¹Kweni vyose vyeneivi vikukhuŵirizgika na Mzimu yumoza pera, mweneuyo wakugaŵira munthu yose payekhapayekha nga ndi umo wakukhumbira.

¹²Pakuti nga ndi umo thupi liriri limoza ndipo liri na viŵaro vinandi, ndipo viŵaro vyose vya thupi nangauli nvinandi ndi thupi limoza, ndimo kuliri na Khristu.

¹³Chifukwa na Mzimu yumoza, ise tose tikabapatizikira mu thupi limoza, manyi mbaYuda kwali mbaGriki, manyi mbazga kwali mbanangwa, tose tili kupokera Mzimu yumoza pera.

¹⁴Pakuti mu thupi muli chiŵaro chimoza pera chara, kweni vinandi.

¹⁵Usange lundi lingayowoya kuti, “Pakuti ine ndine woko chara, ipo ndili wa thupi chara.” Ichi chingaŵa chifukwa chakulitondeska kuŵa chiŵaro cha thupi chara.

¹⁶Usange khutu lingayowoya kuti, “Pakuti ndine jiso chara, ipo ndili wa thupi chara.” Ichi chingaŵa chifukwa chakulitondeska kuŵa chiŵaro cha thupi chara.

¹⁷Usange thupi lose liŵenge jiso, mphanyi likupulikira vichi? Usange thupi lose liŵenge khutu pera, mphanyi likunuskira vichi?

¹⁸Kweni nga ndi umo kuliri, Chiuta wali kuŵika makora viŵaro, ichi na ichi, mu thupi nga ndi umo wakakhumbira.

¹⁹Usange vyose viŵenge chiŵaro chimoza, mphanyi thupi liri nkhu?

²⁰Nga ndi umo kuliri, pali viŵaro vinandi, kweni thupi ndi limoza pera.

²¹Jiso lingayowoya ku woko chara, “Ndilije na nchito na iwe.” Nesi mutu, ku malundi, “Ndilije na nchito na imwe.”

²²Ndimo viliri chara. Viŵaro ivyo vikuwoneka nga nvyakutomboroka, nvyakukhumbikwa.

²³Ndipo viŵaro vya thupi ivyo tikuvipima kuti nvyakuzirwa pachoko ndivyo tikuvizirwiska kwakuruska. Ndipo viŵaro vya thupi ivyo vikutipa soni, ndivyo tikuvipwererera na nchindi yikuru,

²⁴icho nchambula kukhumbikwa ku vigaŵa ivyo vikuwoneka makora. Kweni Chiuta wali kuwumba thupi mwa ntheura, pakupereka nchindi zikuru ku vigaŵa vyambula kuzirwa,

²⁵mwakuti kuŵavye mphatukano mu thupi, kweni kuti viŵaro vyose vipwerererane mwakuyana waka.

²⁶Usange chiŵaro chimoza chakomwa, vyose vikukomwera nacho pamoza. Usange chiŵaro chimoza chikuchindikika, vyose vikusekerera nacho pamoza.

²⁷Sono imwe muli thupi la Khristu, ndipo waliyose wa imwe, nchiŵaro cha thupi ili.

²⁸Chiuta wali kusora ŵanthu aŵa mu mpingo wakhe: ŵakudanga ŵakutumika ŵa chiŵiri nchimi, ŵa chitatu ŵasambizgi, ŵakuchita vyaminthondwe, ŵakuchizga, ŵanji ŵakovwira, ŵanji ŵendeski ŵa nchito na ŵakuyowoya viyowoyero vya chilendo.

²⁹Kasi wose mbakutumika? Kasi wose nchimi? Kasi wose mbasambizgi? Kasi wose ŵakuchita minthondwe?

³⁰Kasi wose ŵali na vyawanangwa vyakuchizga? Kasi wose ŵakuyowoya viyowoyero vya chilendo? Kasi wose ŵakung'anamulira mazgu gha chilendo.

³¹Chara, kweni imwe ŵikani mitima yinu pa vyawanangwa ivyo nvyakuruska. Sono nditi ndimurongorani nthowa iyo yikuruska vyose.