Read new_tumbuka_bible 1 ŴaKorinte 13 Bible Online

1 ŴaKorinte 13 - new_tumbuka_bible bible

1 ŴaKorinte 13

¹Usange ndingayowoya viyowoyero vya ŵanthu na vya ŵangelo, kweni nkhuwura kutemwa, ndili mbata yakulira panji chibekete chakuchita chiwawa.

²Usange ndingaŵa nazo nkhongono za kuchimira na kupulikiska vyose vya muchindindi na umanyi wose, ndipo usange ndingaŵa na chipulikano chose chakuti ndisezgere mapiri, kweni nkhuwura kutemwa, ndili kanthu chara.

³Usange ndingapereka vyose ivyo ndili navyo ku ŵakavu, nanga nkhupereka thupi lane kuti locheke, kweni nkhuwura kutemwa, kuti nkhwandura kanthu chara.

⁴Kutemwa kukuzizipizga, ndipo nkhwa lusungu. Kutemwa kulije sanje panji kujirumba, nesi kujikuzga.

⁵Kutemwa kuti kukureka kususkika chara, nesi kukhumba vyakhe pera chara, kukuphya mtima luŵiro chara nesi kusungilira uheni.

⁶Kuti kukusekerera pa vyakubudika chara, kweni kukusekerera mu vyakuchitika makora.

⁷Kutemwa kukukunthirapo vyose, kukugomezga mu vyose, kukukhazga vyose ndipo kukuzizipizga mu vinthu vyose.

⁸Kutemwa kukumara chara. Mauchimi, ghizamkumara; viyowoyero, vizamkumara; umanyi, wizamkumara.

⁹Chifukwa umanyi withu ngwambula kufikapo ndiposo uchimi withu nawo ngwambula kufikapo.

¹⁰Kweni para icho nchakufikapo chiza, penepapo icho nchambula kufikapo chikumara.

¹¹Para nkhaŵa mwanichi, kayowoyero kane, kapimiro kane, na kaghanaghaniro kane kakaŵa ka wanichi. Para nkhati ndaŵa murara, nkhareka nthowa za wanichi.

¹²Sono tikuwona vinthu mukazimizimi nga ndi umo tikuviwonera pa galasi. Kweni pa nyengo yakhe tamkuwona vyose maso na maso. Sono tikumanya kurwande, kweni pa nyengo yakhe tamkumanya nkhanira nga ndi umo Chiuta wandimanyira ine.

¹³Ndipo sono vitatu ivi vikukhalirira: Chipulikano, chigomezgo na kutemwa. Pa vitatu ivi, chikuru cha kuruska vyose ndi kutemwa.