Read new_tumbuka_bible 1 ŴaKorinte 14 Bible Online

1 ŴaKorinte 14 - new_tumbuka_bible bible

1 ŴaKorinte 14

¹Penjeskani kutemwa, ndipo muŵikepo mtima pa vyawanangwa vya Mzimu Mutuŵa, chomenechomene chawanangwa cha kuchima.

²Para munthu wakuyowoya mu viyowoyero vya chilendo, kuti wakuyowoya ku ŵanthu chara, kweni kwa Chiuta. Chifukwa palije munthu uyo wakupulika ivyo wakuyowoya, kweni wakuyowoyera mu Mzimu ivyo vya muchindindi.

³Ku lwande linyakhe uyo wakuchima wakuyowoya ku ŵanthu kuti ŵazengeke kuchiska na kukhozgeka.

⁴Munthu uyo wakuyowoya mu viyowoyero vya chilendo, wakujizenga yekha, kweni uyo wakuchima, wakuzenga mpingo wa Chiuta.

⁵Sono ndakhumbanga kuti mose muyowoyenge viyowoyero vya chilendo, kweni kwakuruska nkhukhumba kuti mupharazgenge. Uyo wakuchima ndi mukuru kuruska uyo wakuyowoya viyowoyero vya chilendo. Uyo wakuyowoya viyowoyero vya chilendo, wangaŵa mukuru usange yumoza wangamanya kung'anamulira ivyo wakuyowoya, mwakuti mpingo wa Chiuta uzengeke.

⁶Sono mwa ŵabali, usange nkhwiza kwa imwe na kuyowoya mu viyowoyero vya chilendo, kasi pali chandulo uli kwa ine? Kuti pali chandulo chara usange icho nkhuyowoya chilije uvumbuzi, panji umanyi, panji uchimi panji usambizgi?

⁷Nanga ndi tunthu twambula umoyo uto tukufumya mazgu nga ndi fyoliro, panji viding'indi, usange walije kupambaniska maliriro ghakhe kasi munthu wangamanya uli icho chikulizgika?

⁸Ndiposo usange kaliriro ka mbata kakurongosoka makora chara, ndi njani wanganozgekera kuruta ku nkhondo?

⁹Ndimo kuliri na imwe wuwo. Usange mu viyowoyero vya chilendo mukuyowoya mazgu ghambula kupulikikwa, kasi munthu wangamanya uli icho mukuyowoya? Ndiko kuti ukuyowoya waka mu mphepo.

¹⁰Mu charu chose cha pasi muli viyowoyero vyakupambanapambana, ndipo palije na chimoza icho chilije ching'anamulo.

¹¹Kweni usange nkhureka kumanya ching'anamulo cha chiyowoyero, nditi ndiŵenge mulendo kwa uyo wakuyowoya. Ndipo nayo wati waŵenge mulendo kwa ine.

¹²Ndimo kuliri na imwe wuwo. Pakuwona kuti mitima yinu yikunweka kuŵa na vyawanangwa vya Mzimu, ntheura ŵikani mitima pa ivyo vikuzenga mpingo wa Chiuta.

¹³Ntheura uyo wakuyowoya mu viyowoyero vya chilendo wakwenera kuromba kuti ŵang'anamulire mazgu ghara.

¹⁴Ndipo usange nkhuromba mu viyowoyero vya chilendo, mzimu wane ukuromba nadi, kweni vinjeru vyane kuti vili na chandulo chara.

¹⁵Kasi sono ndichitengechi? Nditi ndirombe na mzimu wane, ndiposo nditi ndirombe na vinjeru vyane wuwo. Nditi ndimbe na mzimu ndiposo na vinjeru vyane wuwo.

¹⁶Kweni usange mukuwonga Chiuta na mzimu pera, kasi munthu waka uyo wali namwe pamoza, wangazomera uli kuti, “Ameni” pa lurombo lwinu para walije kumanya na icho mukuyowoya?

¹⁷Nangauli lurombo lwinu lwa kuwonga Chiuta lungaŵa luweme chomene, kweni munyako kuti lukumuzenga chara.

¹⁸Nkhumuwonga Chiuta chifukwa nkhuyowoya viyowoyero vya chilendo kuruska imwe mose.

¹⁹Kweni mu mpingo ndingatemwa kuyowoya mazgu ghankhonde gha kupulikikwa kuti ghasambizge ŵanthu kuruska kuyowoya viyowoyero vya chilendo 10,000.

²⁰Mwa ŵabali, rekani kughanaghana nga mbanichi. Pa uheni, muŵenge nga nthwabonda, kweni mu maghanoghano muŵenge ŵakukhwima.

²¹Mu marango muli kulembeka kuti, “Kwizira mu ŵanthu ŵa viyowoyero vya chilendo, na mu milomo ya ŵalendo, ndamkuyowoya ku ŵanthu aŵa. Kweni nanga kuŵe ntheura, ŵanthu ŵane kuti ŵamkundipulika chara. Ndimo yikuyowoyera Fumu.”

²²Ntheura kuyowoya mu viyowoyero vya chilendo nchimanyikwiro cha ŵanthu ŵambula kupulikana, kuti ncha ŵanthu ŵakupulikana chara. Kweni kupharazga mazgu, nchimanyikwiro cha ŵakupulikana, kuti ncha ŵambula kupulikana chara.

²³Ntheura usange mpingo wose wawungana pamoza, ndipo wose ŵakuyowoya mu viyowoyero vya chilendo, ndipo usange ŵakuwaro kwa mpingo panji ŵambula kupulikana ŵakunjira, asi ŵayowoyenge kuti mwafuntha?

²⁴Kweni usange wose ŵakupharazga mazgu ndipo uyo ngwambula kupulikana panji wakuwaro wakunjira, apo wose ŵakupharazga mazgu, wati wachonthekenge kuti ngwakwananga na kweruzgika na wose,

²⁵ndipo vyakubisika vya mtima wakhe vikuvumbukwa. Ntheura, pakuwa kavunama, wati wasopenge Chiuta na kuyowoya pakweru kuti nadi Chiuta wali mukati mwinu.

²⁶Mwa ŵabali, sono kwakharachi? Para mukuwungana pamoza, yunji wali na sumu, munyakhe chisambizgo, munyakhe uvumbuzi wakufuma kwa Chiuta, munyakhe viyowoyero vya chilendo, ndipo munyakheso wakung'anamula chiyowoyero chira. Rekani vyose vichitikire pakuzenga mpingo.

²⁷Usange ŵalipo awo ŵakuyowoya viyowoyero vya chilendo, ŵaŵenge ŵaŵiri, panji ŵatatu, kweni kujumpha apa chara. Ŵayowoye mwakurondezgana waka ndipo paŵe munthu wakung'anamulira mazgu ghara.

²⁸Kweni usange palije munthu wakung'anamula rekani waliyose wa iwo wakhare chete mu mpingo, na kuyowoya kwa iyomwene na kwa Chiuta.

²⁹Rekani ŵapharazgi ŵaŵiri panji ŵatatu ŵayowoye ndipo rekani ŵanyakhe ŵaghanaghane ivyo vikuyowoyeka.

³⁰Usange uvumbuzi wachitikira ku munyakhe uyo wakhara pafupi nayo, rekani wakudanga wachetame.

³¹Pakuti mose mungapharazga mazgu yumozayumoza mwakuti wose ŵasambire na kuchiskika.

³²Ndipo ŵapharazgi ŵakwenera kujikora mu kupharazga kwawo.

³³Pakuti Chiuta ngwa nthimbanizgo chara, kweni wa mutende. Nga ndi umo kuliri mu mipingo yose ya ŵatuŵa,

³⁴ŵanakazi ŵakhare waka chete mu maungano gha mpingo. Chifukwa ŵandazomerezgeke kuyowoya kweni wakwenera kujilambika, nga ndi umo dango likuyowoyera.

³⁵Usange kuli kanthu ako ŵakukhumba kuti ŵamanye, rekani ŵakafumbe ŵafumu ŵawo ku nyumba, chifukwa chikukhozga soni kuti mwanakazi wayowoye mu mpingo.

³⁶Kasi mazgu gha Chiuta ghakamba na imwe, panyakhe kasi ndimwe mwekha pera ghamufikani?

³⁷Usange waliyose wakujipima kuti ndi mupharazgi panji wali na vyawanangwa vya uzimu, wakwenera kumanya kuti ivyo nkhumulemberani ndi languro la Fumu.

³⁸Usange munthu waliyose wakumanyiska ichi chara, mbwenu ngwa waka.

³⁹Ntheura mwa ŵabali, nwekerani chomene pakupharazga mazgu, ndipo rekani kukanizga awo ŵakuyowoya viyowoyero vya chilendo.

⁴⁰Kweni vinthu vyose vichitike mu nthowa na mundondomeko yiweme.