Read new_tumbuka_bible 1 ŴaKorinte 15 Bible Online

1 ŴaKorinte 15 - new_tumbuka_bible bible

1 ŴaKorinte 15

¹Sono mwa ŵabali, nkhukhumba kumukumbuskani vifukwa ivyo ine nkhamupharazgirani Uthenga Uweme uwu weneuwo mukawupokerera ndiposo apo chipulikano chinu chikwimapo.

²Mu uthenga weneuwu mukuponoskekeramo ndipo mukuwukoreska. Usange ndi ntheura chara, ipo mukupulikana pa waka.

³Pakuti ine nkhapereka kwa imwe icho nkhapokera, icho nchakuzirwa chomene chakuti Khristu wakafwira zakwananga zithu kwakuyana na malembo.

⁴Iyo wakasungika mu dindi, ndipo wakawuskika ku ŵakufwa pa zuŵa la chitatu kwakuyana na malembo.

⁵Na kuti wakawonekera kwa Kefase ndiposo ku ŵakutumika ŵakhe 12.

⁶Ndipo Yesu wakawoneka ku ŵabali ŵakujumpha 500 pa nyengo yimoza, ŵanandi ŵa iwo ŵachali ŵamoyo, nangauli ŵanji ŵali kufwa.

⁷Ndipo wakawonekera kwa Yakhobe, ndipo pamanyuma ku ŵakutumika wose.

⁸Pa umaliro nkhanira na kwa ine wuwo nanga nkhaŵa nga ndi mwana uyo wababika muteta.

⁹Chifukwa ndili muchoko chomene ku ŵakutumika wose, kuti nkhwenerera chara kuti ndichemeke wakutumika pakuti nkhazikizga mpingo wa Chiuta.

¹⁰Kweni chifukwa cha uchizi wa Chiuta ndili nga ndi umo ndiliri, ndipo uchizi uwo wakandipa kuti ukaŵa wa waka chara. Nanga kuŵe ntheura, nkhachita mlimo kuruska yose wa iwo, nangauli nkhaŵa ine chara, kweni ndi uchizi wa Chiuta uwo ukaŵa mwa ine.

¹¹Pa nyengo yira, manyi nkhaŵa ine panji iwo, chilije kanthu, chikuru nchakuti tikupharazga ntheura ndipo ichi ndicho mukupulikana.

¹²Sono usange Khristu wakupharazgika nga ndi uyo wali kuwuskika ku ŵakufwa, kasi ŵanji ŵa imwe ŵangayowoya uli kuti chiwuka cha ŵakufwa kulije?

¹³Kweni usange kulije chiwuka cha ŵakufwa, ipo Khristu nayo kuti wali kuwuka ku ŵakufwa chara.

¹⁴Ndipo usange Khristu wandawuskike ku ŵakufwa, ipo upharazgi withu ngwa waka, ndipo chipulikano chinu nacho ncha waka.

¹⁵Kurutilira apo, ipo tili ŵakaboni ŵa utesi kwa Chiuta, chifukwa tikapanikizgira Chiuta kuti wakamuwuska Khristu ku ŵakufwa mweneuyo kuti wakamuwuska chara, usange ncha unenesko kuti ŵakufwa ŵamkuwuka chara.

¹⁶Chifukwa usange ŵakufwa ŵakuwuka ku ŵakufwa chara, ipo Khristu nayo kuti wali kuwuskika chara.

¹⁷Usange Khristu walije kuwuskikapo, ipo chipulikano chinu nacho ncha waka, ndipo imwe muchali mu zakwananga zinu.

¹⁸Ntheura awo ŵali kufwira mwa Khristu, nawo ŵali kutayika waka.

¹⁹Usange chigomezgo chithu mwa Khristu ncha umoyo uno pera, ipo pa ŵanthu wose tili ŵakulengereka lusungu chomene.

²⁰Kweni mu unenesko wose Khristu wali kuwuka ku ŵakufwa ndipo ndiyo chipambi chakudanga cha awo ŵali kugona tulo. Ichi chikupanikizga kuti awo ŵali kufwa, ŵizamkuwukaso.

²¹Pakuti nga ndi umo nyifwa yikizira mu charu cha pasi na munthu yumoza, ntheuraso kuwuka ku ŵakufwa nako kukiza na munthu yumoza.

²²Pakuti nga ndi umo ŵanthu wose wakufwira mwa Adamu, ntheuraso mwa Khristu, wose ŵati ŵawukenge.

²³Kweni yose ŵamkuwuka kwakuyana na ndondomeko yakhe. Khristu ndiyo wakudanga kuwuka, ndipo pa nyengo yakwiza kwakhe, wose awo mba Khristu.

²⁴Penepapo umaliro wa charu wamkwiza. Khristu wamkumarizga ŵakuwusa wose ŵa uzimu, mazaza ghose, na nkhongono, ndipo wamkupereka Ufumu kwa Chiuta Dada.

²⁵Chifukwa Khristu wakwenera kuwusa, mpaka Chiuta waŵatonde na kuŵathereska ŵarwani ŵakhe wose.

²⁶Murwani wa umaliro uyo wakwenera kusakazika ndi nyifwa.

²⁷Pakuti malembo ghakuti, “Chiuta wali kumuthereskera vinthu vyose.” Kweni para mazgu ghakuti, “Wali kumuthereskera vinthu vyose” nchapakweru kuti wakusazgako Chiuta chara uyo wali kuthereskera vinthu pa Khristu.

²⁸Para vinthu vyose vyathera kwa Khristu, sono Mwana wa Chiuta iyomwene nayo wamkujiŵika pasi pa Chiuta, mweneuyo wakaŵika vinthu vyose pasi pa Khristu mwakuti Chiuta waŵenge vyose ku waliyose.

²⁹Usange ndi ntheura chara, kasi ŵanthu awo ŵakubapatizika mu malo mwa ŵakufwa ŵakung'anamulachi? Usange ŵakufwa ŵakuwuka chara, chifukwa uli ŵanthu ŵakubapatizika mu malo gha ŵakufwa?

³⁰Chifukwa uli ise tili mu urwani mu ora lirilose?

³¹Mwa ŵabali, nkhufwa zuŵa na zuŵa, nga ndi umo nkhuthumbwira mwa imwe mwa Khristu Yesu Fumu yithu.

³²Mu kayowoyero ka unthu wose, kasi kukunandulira vichi para nkhuyowoya kuti nkharwa na vikoko mu Efeso? Usange ŵakufwa ŵakuwuka chara, “Ipo tiyeni tiryenge na kumwa, chifukwa na machero tifwenge.”

³³Mungapusikikanga, “Kwendezgana na ŵaheni kukwananga makhaliro ghaweme.”

³⁴Wererani ku maghanoghano gha unthu, ndipo mureke kwananga. Chifukwa ŵanji ŵa imwe ŵandamumanye Chiuta. Nkhuyowoya ichi kuti ndimukhozgani soni.

³⁵Kweni munyakhe wangafumba kuti, “Kasi ŵakufwa ŵakuwuskika uli? Kasi ŵakwiza na thupi uli?”

³⁶Chindere iwe! Icho mukupanda, kuti chikumera chara kwambula kuti chafwa.

³⁷Icho mukupanda kuti ndi thupi ilo liŵengeko chara, kweni lumphuzi, manyi ndwa tirigu panji ndwa mbuto yinyakhe yose.

³⁸Kweni Chiuta wakulipa thupi nga ndi umo wakukhumbira, ndipo ku mtundu wose wa mbuto yose wakupereka thupi lakhe na lakhe.

³⁹Pakuti mathupi ghose ghakuyana chara, kweni pali thupi la ŵanthu, linyakhe la vikoko, linyakhe la viyuni ndipo linyakhe la somba.

⁴⁰Ghalipo mathupi gha kuchanya, na mathupi gha mu charu. Kweni uchindami wa kuchanya ngunyakhe, ndiposo uchindami wa mu charu nawo ngunyakhe.

⁴¹Dazi liri na uchindami wakhe, mwezi nawo uli na uchindami wakhe na wakhe, nyenyezi nazo zili na uchindami wawo. Pakuti nyenyezi yimoza yikupambana na nyenyezi yinyakhe mu uchindami.

⁴²Ntheura ndimo kuliri na chiwuka cha ŵakufwa. Thupi ilo likuŵikika mu dindi likuvunda, ilo lizamkuwuka lamkuŵa lambula kuvunda.

⁴³Para likuŵikika mu dindi likuŵa lakuyuyuka, kweni likuwuskika mu uchindami. Likuŵikika mu kutomboroka, kweni likuwuskika mu nkhongono.

⁴⁴Para likuwundika mu dindi likuŵa thupi la kaŵiro, kweni lamkuwuskika la uzimu. Usange liriko thupi la kaŵiro, lirikoso thupi la Uzimu.

⁴⁵Ntheura kuli kulembeka kuti, “Munthu wakudanga Adamu, wakazgoka kuŵa munthu wamoyo.” Kweni Adamu, wa umaliro wakazgoka Mzimu wakupereka umoyo.

⁴⁶Kuti ndi thupi la uzimu ilo likudanga chara, kweni thupi la kaŵiro, ndipo pamanyuma thupi la uzimu.

⁴⁷Munthu wakudanga wakafumira ku dongo, wakaŵa wa charu cha pasi. Kweni Adamu wa chiŵiri wakafumira kuchanya.

⁴⁸Ŵanthu wose ŵa mu charu ŵakulingana waka na Adamu uyo wakawumbika kufuma ku dongo. Ndipo wose awo mba kuchanya, ŵakulingana waka na Khristu uyo ngwa kuchanya.

⁴⁹Nga ndi umo tiliri na chikozgo cha Adamu wakufuma ku dongo, ndimoso tamkuŵira na chikozgo cha Khristu munthu wa kuchanya.

⁵⁰Icho nkhuyowoya mwa ŵabali nchakuti, thupi na ndopa kuti vikumanya kunjira mu Ufumu wa Chiuta chara, nanga ndi icho nchakuvunda kuti chingamanya kuhara icho chikureka kuvunda chara.

⁵¹Tegherezgani, nkhumuphalirani cha muchindindi. Kuti tamkufwa tose chara, kweni tose tamkusinthika,

⁵²mu kanyengo kachoko waka, kakuyana na kuphayira kwa jiso, apo mbata ya umaliro yamkulira. Pakuti para mbata yamkulira, ŵakufwa ŵamkuwuka na mathupi ghawo ghambula kuvunda, ndipo ise tamkusinthika.

⁵³Chifukwa thupi ili la kuvunda, likwenera kuvwara kuwura kuvunda. Ndiposo thupi ili la nyifwa likwenera kuzgoka lambula kufwa.

⁵⁴Ntheura para thupi lakuvunda ili lavwara kuwura kuvunda, na thupi ili la nyifwa lazgoka lambula kufwa, ndipo ghizamkufiskika mazgu agho ghalikulembeka kuti, “Nyifwa yamiriminthizgika mu kuvivya.”

⁵⁵“Nyifwa we, kasi kuvivya kwako kuli nkhu? Nyifwa we, kasi luwozga lwako luri nkhu?”

⁵⁶Luwozga lwa nyifwa ndi kwananga, ndipo nkhongono za kwananga ndi marango.

⁵⁷Kweni tiwonge Chiuta mweneuyo wakutipa kuvivya mwa Fumu yithu Yesu Khristu.

⁵⁸Ntheura mwa ŵabali ŵakutemweka, yimilirani nganganga, muŵe ŵambula kusunkhunyika. Nyengo zose muŵenge ŵakufukafuka mu mlimo wa Fumu, pakumanya kuti kutokatoka kwinu mwa Fumu kuti nkhwa waka chara.