Read new_tumbuka_bible 1 ŴaKorinte 16 Bible Online

1 ŴaKorinte 16 - new_tumbuka_bible bible

1 ŴaKorinte 16

¹Sono kuyana na vyakupereka vyakovwira ŵakhristu ŵa ku Yudeya, namwe mukwenera kuchita ntheura, nga ndi umo nkhaphalirira mipingo ya ku Galatiya.

²Pa zuŵa lakudanga la Sabata waliyose wa imwe wajipatulire kanthu ako wangamanya kupereka, kwakuyana na umo wangasakatira na kusunga makora mwakuti para ine ndiza, kureke kuti ndipo kwiza kaŵa vyakusangura.

³Ntheura para ndafika ndizamkuŵapa makarata ŵanthu awo mukaŵazomerezga na kuŵatuma kuti ŵayeghere vyawanangwa vyinu ku Yerusalemu.

⁴Usange nchakwenerera kuti nane ndirute, ŵanthu awo ŵizamurongozgana nane.

⁵Ndizamkumuchezgerani para ndaporota mu Makedoniya, pakuti nkhukhumba kwendera ku kwenekura.

⁶Ndipo panyakhe ndizamkukharako namwe panji nyengo yose ya chiwuvi, mwakuti mwizakandovwira luŵiro pa ulendo wane kose uko ndizamkuruta.

⁷Chifukwa kuti nkhukhumba kwiza kamuwonani pa kanyengo kachoko waka chara para nkhujumpha mu nthowa. Nkhugomezga kwiza kakhara nyengo yitali usange Fumu yazomerezga.

⁸Kweni ndizamukhara mu Efeso kufikira pa zuŵa la Pentekosite.

⁹Chifukwa mwaŵi ukuru wandijurikira wakuchitira mlimo wakukwana, nangauli ŵarwani mbanandi.

¹⁰Para Timote wafika, muwone kuti mukukhara nayo mwa kufwasa, chifukwa nayo wakuteŵeta mlimo wa Fumu nga ndine.

¹¹Ntheura kuŵavye na yumoza wamuyuyure, kweni movwirani kuti wende mu mutende pakulutirizga ulendo wakhe na kuwereraso kwa ine. Chifukwa ine nkhukhazga kuti wizenge na ŵabali mu chipulikano.

¹²Sono nga ndi mubali withu Apolo, ndine nkhamukoserezga chomene kuti wizakamuchenjezgerani pamoza na ŵabali ŵanyakhe mu chipulikano, kweni kuti likaŵa khumbo lakhe chara kwiza pa nyengo iyi. Kweni wati wize para waŵa na nyengo yiweme.

¹³Muŵe maso, mwimilire nganganga mu chipulikano chinu. Muŵe ŵachikanga na ŵankhongono.

¹⁴Vyose ivyo mukuchita vichitikire mu kutemwa.

¹⁵Mwa ŵabali, mukumanya kuti Stefanasi na mbumba yakhe ndiwo ŵakaŵa ŵakhristu ŵakudanga kung'anamuka mu Akaya. Ndipo ŵali kujipereka ku mlimo wa kuteŵetera ŵakhristu. Ntheura nkhumuŵeyani,

¹⁶kuti namwe murondezge urongozgi wa ŵanthu nga ndi aŵa ndipo na munthu yose uyo wakuteŵeta pamoza nawo.

¹⁷Ndili wakukondwa kuwona kuti Stefanasi, Tirotunato na Akayiko ŵiza pakuti kwiza kwawo kwaŵa nga kuti imwe mulipo.

¹⁸Chifukwa ŵakandisanguruska ine nga ndi umo ŵakasanguruskiraso na imwe wuwo. Ŵanthu nga ndi aŵa mukwenera kuŵamanya.

¹⁹Mipingo ya mu Asiya yikumutauzgani. Akwila na Prisira pamoza na mpingo uwo ukuwungana mu nyumba yawo ŵakumutauzgani na kutemwa kose mwa Fumu.

²⁰Ŵabali ŵithu wose ŵakumutauzgani. Mutauzgane na kutemwa kwenecho pakufyofyonthana.

²¹Ine Paulosi ndalemba kutauzga uku na woko lane na lane.

²²Usange waliyose wakureka kutemwa Fumu, watembeke. Fumu yithu zani![1]

²³Uchizi wa Fumu Yesu uŵenge namwe.

²⁴Kutemwa kwane kuŵenge na imwe mose mwa Khristu Yesu. Ameni.