Read new_tumbuka_bible 1 ŴaKorinte 2 Bible Online

1 ŴaKorinte 2 - new_tumbuka_bible bible

1 ŴaKorinte 2

¹Mwa ŵabali, para nkhiza kwa imwe, kwiza kamupharazgirani cha muchindindi cha Chiuta, kuti nkhayowoya mazgu ghakumutindikani na gha mahara chara.

²Pakuti nkhadumula kuti ndimanye kanthu kanyakheso mukati mwinu chara kweni Yesu Khristu pera uyo wakapayikika pa mphinjika.

³Ndipo nkhaŵa namwe mu utechitechi, mu wofi ukuru na mu kutenthema.

⁴Ndipo kuyowoya kwane na kupharazga kwane, kuti vikaŵa mu kukopa ŵanthu na mazgu gha mahara gha charu chara, kweni mazgu ghane ghakaŵa mu chipanikizgo cha Mzimu na nkhongono,

⁵mwakuti chipulikano chinu chireke kujinthika mu mahara gha ŵanthu, kweni mu nkhongono za Chiuta.

⁶Ndipouli tikuyowoya mazgu gha mahara ku awo mba kukhwima mu chipulikano. Kuti ndi mahara gha ŵanthu ŵa mu muwiro uwu chara, panji nkhongono za ŵanthu ŵakuwusa mu muwiro uwu awo nkhongono zawo zikumara.

⁷Kweni tikuyowoya mahara gha Chiuta agho nga muchindindi na ghakubisika gheneagho Chiuta wakimika ku uchindami withu papo kale pambere charu chindalengeke.

⁸Pakaŵavye na yumoza wa ŵakuwusa ŵa muno mu charu cha pasi mweneuyo wakavimanya. Chifukwa ŵaŵenge ŵakuvimanya, mphanyi ŵakaŵavye kuyipayika pa mphinjika Fumu ya uchindami.

⁹Kweni kuli nga ndi umo kuli kulembekera kuti, “Icho jiso lindawone panji khutu kupulika, nesi mtima wa munthu kupulikiska, vyeneivyo ndivyo Chiuta wali kunozgera awo ŵakumutemwa.”

¹⁰Kweni Chiuta wali kutivumbulira ise vyeneivi kwizira mu Mzimu. Pakuti Mzimu ndiyo wakusanda vyose nanga ndi vya pasi pa mtima wa Chiuta.

¹¹Kasi ndi njani wakumanya ivyo vili mu mtima wa munthu? Asi ndi mzimu wa iyomwene? Ntheura pera palije munthu uyo wangamanya vinthu vya pasi pa mtima wa Chiuta, kweni Mzimu wa Chiuta pera.

¹²Ise kuti tili kupokera mzimu wa charu cha pasi chara, kweni Mzimu wakufuma kwa Chiuta, mwakuti tipulikiske ivyo Chiuta wali kutipa kwa wanangwa.

¹³Tikuyowoya ivi mu mazgu ghakusambizgika na mahara gha ŵanthu chara, kweni na mahara gha Mzimu pera, kurongora unenesko wa uzimu ku awo ŵali na Mzimu.

¹⁴Munthu uyo walije uzimu, kuti wakupokerera vinthu vya Mzimu wa Chiuta chara. Pakuti kwa iyo nvya uchindere, ndipo kuti wangamanya kuvipulikiska chara, chifukwa vikumanyikwira mu uzimu pera.

¹⁵Munthu wa uzimu wangeruzga kaŵiro ka vinthu vyose, kweni wangeruzgika na waliyose chara.

¹⁶“Pakuti ndi njani uyo wakumanya maghanoghano gha Fumu, kuti wamanye kunjirikizga Fumu?” Kweni ise tili nagho maghanoghano gha Khristu.