Read new_tumbuka_bible 1 ŴaKorinte 3 Bible Online

1 ŴaKorinte 3 - new_tumbuka_bible bible

1 ŴaKorinte 3

¹Mwa ŵabali, ine kuti nkhenera kumuyowoyerani imwe nga ndi ku ŵanthu awo ŵali mu uzimu chara kweni kwa imwe nkhenera kuyowoya nga ŵanthu ŵa thupi ndiposo nga nkhu ŵabonda mu umoyo winu wa chikhristu.

²Nkhamulerani na mkaka, kuti nkhamulerani na chakurya chinonono chara. Pakuti mukaŵa muchali mundakule. Nanga ndi sono kuti mungarya chara,

³chifukwa muchali ŵa thupi. Pakuti apo muli sanje na mphindano mukati mwinu, asi ndimwe ŵa thupi? Ndiposo asi mukukhara nga ŵanthu bweka?

⁴Chifukwa usange yumoza wakuti, “Ine ndili wa Paulosi,” ndipo munyakhe wakuti, “Ine ndili wa Apolo.” Ipo mukupambana uli na ŵanthu bweka?

⁵Kasi Apolo nkhachichi? Paulosi nkhachichi? Ŵanthu aŵa mbateŵeti waka awo imwe mukapokereramo chipulikano nga ndi umo Fumu yikaŵagaŵira mlimo uwu na uwu.

⁶Ine nkhapanda mbuto, ndipo Apolo wakathilira, kweni ndi Chiuta uyo wakamezga.

⁷Ntheura uyo wakupanda nanga ndi uyo wakuthilira, kuti nkhanthu chara, kweni Chiuta pera uyo wakumezga.

⁸Uyo wakupanda mbuto na uyo wakuthilira maji ŵakuyana waka, waliyose wamkupokera njombe yakuyana na mlimo wakhe?

⁹Pakuti ise tili ŵateŵeti ŵamoza ŵa Chiuta, imwe ndimwe munda wa Chiuta na uzengi wa Chiuta.

¹⁰Kwakuyana na uchizi uwo Chiuta wakandipa, ine nkhazenga lufura nga ndi msiri mukuru pa mlimo wa uzengi, ndiposo munyakhe ndiyo wakuzengapo nyumba pa lufura ulu. Kweni munthu yose wachenjere na umo wakuzengera.

¹¹Chifukwa kulije munthu uyo wakumanya kuzenga lufura lunyakhe kuruska ulo luri kuzengeka kale. Lufura ulu ndi Yesu Khristu.

¹²Usange munthu wakuzenga pa lufura ulu, na golide, siliva mawe ghakuzirwa, makuni, utheka, panji mapekesi,

¹³mlimo wakhe wamkuwoneka pakweru, para zuŵa la kweruzgira lamkuwurongora. Pakuti zuŵa lira lamkuvumbukwa na moto ndipo moto ndiwo wamkuyezga mlimo uwo munthu yose wachita.

¹⁴Usange mlimo wa munthu yunji uwo wakawuzenga pa lufura lura, ukukhalirira, munthu yura wamkupokera njombe.

¹⁵Usange mlimo wa munthu waliyose waphya na moto, wati wawutaye. Iyo mwenecho wamkuponoskeka, kweni nga ndi para wapona ku moto.

¹⁶Kasi mukumanya chara kuti ndimwe Nyumba ya Chiuta, ndipo Mzimu wa Chiuta wakukhara mwa imwe?

¹⁷Usange munthu wakunanga Nyumba ya Chiuta, Chiuta nayo wamkumumara petu. Chifukwa Nyumba ya Chiuta njakupatulika, ndipo Nyumba iyi ndimwe.

¹⁸Paŵavye munthu wajipusike. Usange yumoza wa imwe wakujipima kuti ngwa mahara mu muwiro uwu, wajizgore kuŵa chindere, mwakuti waŵe wa mahara.

¹⁹Pakuti mahara gha charu ichi, mbuchindere kwa Chiuta nga ndi umo kuli kulembekera kuti, “Chiuta wakuŵakora ŵamahara mu uryarya wawo.”

²⁰Na kutiso, “Fumu yikumanya kuti ivyo ŵamahara ŵakughanaghana nvya uchindere.”

²¹Ntheura munthu wareke kuthumbwira mu ŵanthu ŵanyakhe! Pakuti vinthu vyose nvyinu,

²²manyi ndi Paulosi panji Apolo, panji Kefase, panji charu, panji umoyo, panji nyifwa, panji vya nyengo yino, panji ivyo vikwiza, vyose nvyinu.

²³Imwe muli ŵa Khristu, ndipo Khristu nayo ngwa Chiuta.