Read new_tumbuka_bible 1 ŴaKorinte 4 Bible Online

1 ŴaKorinte 4 - new_tumbuka_bible bible

1 ŴaKorinte 4

¹Umo ndimo munthu wakwenera kutipimira ise, nga ŵateŵeti ŵa Khristu na ŵalinda ŵa vya muchindindi vya Chiuta.

²Icho chikukhumbikwa ku awo mbalinda nchakuti, ŵaŵe ŵanthu ŵakugomezgeka.

³Kwa ine nkhanthu kachoko chomene kuti nderuzgike na imwe, panji na mphara ya ŵanthu. Nanga ndine ndamwene, kuti nkhujeruzga ndekha chara.

⁴Njuŵi yane kuti yikundisuska chara, ndipouli ichi chikung'anamula kuti ndilije mrandu chara. Fumu yekha ndiyo yikunderuzga ine.

⁵Ntheura mureke kweruzga munthu pambere nyengo yindakwane mpaka Fumu yize, yeneiyo yamkuvumbula pakweru ivyo pa nyengo yino vili kubisika mu chisi ndiposo na ivyo mitima ya ŵanthu yikukhumba kuchita. Penepapo waliyose wamkupokera marumbo agho ghakumwenerera kufuma kwa Chiuta.

⁶Mwa ŵabali, mu vyose ivyo ndayowoya ndajizgora ine na Apolo nga nchiyerezgero chifukwa cha imwe, kuti musambizgike na ise kuti, “Mureke kusazgirapo ku ivyo vili kulembeka.” Paŵavye yumoza wa imwe uyo wajikuzge pakurumba yumoza na kuyuyura munyakhe.

⁷Kasi ndi njani wakukupambaniska iwe ku ŵanthu ŵanyakhe? Nchivichi icho uli nacho cheneicho ukawura kupokera? Usange ukachipokera, chifukwa uli ukuthumbwa nga ndi para icho uli nacho nchawanangwa chara?

⁸Mwakhuta kale? Mwasambazga kale? Mwazgoka kuŵa ŵakaronga kwambula ise! Ndakhumbanga kuti mphanyi mwawusanga nadi mwakuti ise nase tiwuse pamoza namwe.

⁹Nkhuwona kuti ise ŵakutumika, Chiuta wali kutipa malo gha umaliro nga mbanthu awo ŵamkukomeka. Ntheura tazgoka nga chinthu chakusekeka mu charu, ku ŵangelo na ku ŵanthu wuwo.

¹⁰Tili vindere chifukwa cha Khristu, kweni imwe muli ŵamahara mwa Khristu! Tili ŵakutomboroka, kweni imwe muli ŵankhongono! Imwe ŵanthu ŵakumuchindikani, kweni ise ŵakutiyuyura.

¹¹Mpaka sono tili ŵa njara na nyota. Tikuvwara vizwazwa, ŵanthu ŵakutitimba ndipo tilije na nyumba yakukharamo.

¹²Tikutokatoka pakugwira nchito na mawoko ghithu na ghithu. Para ŵanthu ŵakutitemba, tikuŵatumbika. Para tikuzikizgika, tikuzizipizga.

¹³Para tikuneneka, ise tikuyezga kuphemaniska. Mpaka sono, tikupimika nga ndi viswaswa, ndiposo nga ndi nkhukurwa za mu charu.

¹⁴Nkhumulemberani ichi kuti ndimukhozgani soni chara, kweni kuti ndimuchenjezgani nga mbana ŵane ŵakutemweka.

¹⁵Nanga muŵe nawo ŵarongozgi 10,000 mu umoyo winu wa chikhristu, kweni ŵawiskemwe kuti mbanandi chara. Pakuti ine nkhazgoka kuŵa wiskemwe mwa Khristu Yesu chifukwa cha kupharazga Uthenga Uweme kwa imwe.

¹⁶Ntheura nkhumuŵeyani kuti muyezge kurondezga ukhaliro wa umoyo wane.

¹⁷Pa chifukwa ichi nkhumutumirani Timote, mwana wane wakutemweka, ndipo wakugomezgeka mwa Fumu. Iyo wati wamukumbuskani za umoyo wane wa chikhristu, uwo ukuzomerezgana na ivyo nkhusambizga kosekose mu mipingo yiliyose.

¹⁸Ŵanthu ŵanji ŵakujikuzga, nga ndi para nditi ndizengeko kwa imwe chara.

¹⁹Kweni nditi ndizenge kwa imwe sonosono para Fumu yazomerezga. Ndipo kuti ndizamkusanga ivyo ŵanthu ŵakujikuzga aŵa, ŵakuyowoya chara, kweni na nkhongono izo ŵali nazo.

²⁰Pakuti Ufumu wa Chiuta kuti uli mu kuyowoya pera chara, kweni na mu nkhongono wuwo.

²¹Mukukhumbachi? Kasi ndize kwa imwe na chikoti panji na mtima wakutemwa na wakuzika?