Read new_tumbuka_bible 1 ŴaKorinte 5 Bible Online

1 ŴaKorinte 5 - new_tumbuka_bible bible

1 ŴaKorinte 5

¹Kukupulikikwa nkhanira kuti muli uzaghali mukati mwinu, weneuwo kuti ukusangikako nanga nkhu ŵanthu ŵakuwaro chara. Munthu yunji mukati mwinu wakwendezgana na muwoli ŵa ŵawiske.

²Ndipo imwe mukujikuzga! Asi imwe mukwenera kuŵa na chitima chara? Uyo wachita ichi rekani wawuskikemo mukati mwinu.

³Nangauli ndili namwe chara mu thupi, ndili pamoza namwe mu mzimu. Ndiposo ndapereka udumuliro wane nga ndi para ndili pamoza namwe.

⁴Para mwawungana pamoza mu zina la Fumu Yesu, ine ndili namwe pamoza mu mzimu, ndipo nkhongono za Fumu Yesu zili pamoza nase.

⁵Munthu wa ntheura mukwenera kumupereka kwa Satana kuti thupi lakhe la kwananga limare petu kweni mzimu wakhe uthaskike mu zuŵa la Fumu Yesu.

⁶Kujikuzga kwinu kuti nkhuweme chara. Kasi mukumanya chara mazgu agho ghakuti, “Chirungo chichoko waka chikutukumuska burunga lose la nthimphwa?”

⁷Uskanimo chirungo chikoroŵere, mwakuti muŵe burunga la nthimphwa yiphya nga ndi umo muliri nadi ŵambula chirungo. Pakuti Khristu Mwana-mberere withu wa sembe ya Paska wakomeka kale pa mphinjika.

⁸Ntheura tiyeni tichite chikondwerero cha Paska na chingwa cha chirungo chikoroŵere chara icho ndi kwananga na ubendezi, kweni na chingwa chambula chirungo, chakufikapo na cha unenesko.

⁹Mu karata uyo nkhamulemberani, nkhamuphalirani kuti mureke kwendezgana na ŵazaghali.

¹⁰Kuti nkhang'anamula kureka kwenderana na ŵanthu ŵa pano pasi chara awo mbazaghali, ŵakudokera, ŵakukwapura panji ŵakusopa vikozgo. Kureka kwenderana nawo, kukukhumbikwa kuti mufumemo mu charu.

¹¹Kweni nkhamulemberani kuti mureke kwenderana na munthu uyo wakuti ndi mukhristu kweni umo wakuŵira ndi muzaghali, wakudokera, wakusopa vikozgo, wakutuka, mloŵevu na wakukwapura. Ŵa ntheura mureke na kurya nawo wuwo.

¹²Kasi ndi nchito yane kweruzga ŵakuwaro kwa mpingo? Asi ndi awo ŵali mu mpingo ŵeneawo mukwenera kweruzga?

¹³Chiuta ndiyo wakweruzga ŵa kuwaro. Nga ndi umo kuli kulembekera kuti, “Wuskanimo mukati mwinu uyo wakuchita uheni.”