Read new_tumbuka_bible 1 ŴaKorinte 6 Bible Online

1 ŴaKorinte 6 - new_tumbuka_bible bible

1 ŴaKorinte 6

¹Usange yumoza mukati mwinu wali na mrandu na mukhristu munyakhe, kasi wangamutorera uli ku mphara ya ŵakuwaro na kureka kuruta nayo ku mphara ya ŵakhristu?

²Kasi mukumanya chara kuti ŵakhristu ndiwo ŵamkweruzga charu? Ndipo usange mwamkweruzga charu chose, mungatondeka kweruzga tumirandu tuchokotuchoko?

³Kasi mukumanya chara kuti tamkweruzga ŵangelo? Sono tingareka uli kweruzga mirandu ya zuŵa na zuŵa ya umoyo uno?

⁴Usange muli na mirandu ya ntheura, kasi chifukwa uli mukuruta nayo panthazi pa ŵanthu awo mbambula na kumanyikwa mu mpingo wa Chiuta?

⁵Nkhuyowoya ichi kuti mukhozgeke soni. Kasi palije na yumoza wa mahara mukati mwinu uyo wangeruzga mirandu ya ntheura pakati pa ŵakhristu?

⁶Kweni mu malo mwakhe, mukhristu wakumukaka mukhristu munyakhe na kumutorera panthazi pa ŵanthu ŵambula kupulikana!

⁷Kupalirana zimphara mukati mwinu yumoza na munyakhe chikurongora kuti mwatondeka kale. Chifukwa uli mukureka kuzizipizga para ŵanthu ŵanji ŵakumunangirani? Mukurekerachi kuzomeranga waka usange ŵamwibirani?

⁸Mu malo mwakhe, imwe ndimwe mukuŵanangira ŵanthu na kuŵabira, ndipo mukuchita ichi na ku ŵakhristu ŵanyinu.

⁹Kasi mukumanya chara kuti ŵanthu ŵakwananga ŵamkunjira chara mu Ufumu wa Chiuta? Mungajipusikanga, ŵanthu ŵazaghali, ŵakusopa vikozgo, panji ŵaleŵe, panji ŵakuchita uzaghali ŵanarume pera,

¹⁰ŵankhungu, ŵakudokera, ŵaloŵevu, ŵakutuka, na ŵakukwapura, ŵeneaŵa kuti ŵamkunjira chara mu Ufumu wa Chiuta.

¹¹Ŵanji ŵa imwe kale mukaŵa ntheura. Kweni mukasukika ku zakwananga zinu, mukapatuliskika ndipo mukarunjiskika mu zina la Fumu Yesu Khristu na mu Mzimu wa Chiuta withu.

¹²“Vinthu vyose nvyakuzomerezgeka kwa ine.” Kweni vyose nvya chandulo kwa ine chara. Vinthu vyose vikuzomerezgeka kwa ine, kweni kuti ndiŵenge muzga wa chimoza chara.

¹³“Chakurya chiliriko chifukwa cha nthumbo ndipo nthumbo yiliriko chifukwa cha chakurya.” Kweni Chiuta wamkumara vyose viŵiri. Thupi kuti liriko chifukwa cha uzaghali chara, kweni kuteŵetera Fumu, ndipo Fumu ndiyo yenecho ya thupi.

¹⁴Chiuta wakawuska Fumu ku ŵakufwa, ndipo wamkutiwuska na ise wuwo na nkhongono zakhe.

¹⁵Kasi mukumanya chara kuti mathupi ghinu ndi viŵaro vya Khristu? Kasi nditorenge viŵaro vya thupi la Khristu na kuvibatika ku thupi la muhule? Na pachoko pose!

¹⁶Pakunji kasi mukumanya chara kuti uyo wakubatikana na muhule wakuzgoka kuŵa thupi limoza na iyo. Nga ndi umo kuli kulembekera kuti, “Aŵa ŵaŵiri ŵati ŵaŵenge thupi limoza.”

¹⁷Kweni uyo wabatikana na Fumu, wakuzgoka kuŵa Mzimu umoza na iyo.

¹⁸Chimbirani uzaghali. Kwananga kunyakhe kose uko munthu wakuchita kuti kukukhwaska thupi lakhe chara, kweni muzaghali ndiyo wakwanangira thupi lakhe.

¹⁹Panji kasi mulije kumanya kuti thupi linu ndi Nyumba ya Mzimu Mutuŵa mukati mwinu mweneuyo muli kupokera kufuma kwa Chiuta? Ndicho chifukwa umoyo uwo muli nawo kuti ngwinu chara.

²⁰Chiuta wali kumugulani na mtengo ukuru. Ntheura mumuchindikenge na mathupi ghinu.