Read new_tumbuka_bible 1 ŴaKorinte 7 Bible Online

1 ŴaKorinte 7 - new_tumbuka_bible bible

1 ŴaKorinte 7

¹Sono kwakuyana na ivyo mukandilembera: “Nkhuweme kuti mwanarume wareke kukhwaska mwanakazi.”

²Kweni chifukwa chakuti uzaghali wandana chomene, nkhuweme kuti mwanarume waŵe na muwoli wakhe na wakhe, ndipo mwanakazi yose waŵe na mufumu wakhe na wakhe.

³Mufumu wakwenera kurongora chitemwa ku muwoli wakhe, ndipo muwoli nayo ntheura pera ku mufumu wakhe.

⁴Muwoli kuti wali na mazaza pa thupi lakhe chara, kweni mufumu wakhe ndiyo. Ntheura pera, mufumu nayo kuti wali na mazaza pa thupi lakhe chara, kweni muwoli wakhe ndiyo.

⁵Mureke kukanirana, kweni apo pera mwazomerezgana kujipatula kwa kanyengo kuti muŵe na nyengo ya kurombera. Sono ndipo mukharengeso pamoza, mzire Satana wamuyezgani chifukwa cha kureka kujikora.

⁶Nkhuyowoya ichi mwakumulangulani chara, kweni kuti tizomerezgane.

⁷Ndakhumbanga kuti ŵanthu wose ŵaŵe nga ndi umo ine ndiliri. Kweni waliyose wali nacho chawanangwa chakhe na chakhe kufuma kwa Chiuta. Yumoza wali na chawanangwa ichi, ndiposo munyakhe nayo ichi.

⁸Sono ku awo ŵandanjire mu nthengwa na vyokoro nkhuŵaphalira kuti, nchiweme kuti ŵakhare ntheura nga ndine.

⁹Kweni usange ŵakutondeka kujikora ŵakwenera kunjira mu nthengwa chifukwa nkhuweme kuŵa pa nthengwa kwakuruska kukweŵererakweŵerera na makhumbiro gha thupi.

¹⁰Kwa awo ŵali pa nthengwa, nkhuŵalangula kuti ndine chara, kweni ndi Fumu. Muwoli wareke kupatukana na mufumu wakhe.

¹¹Kweni usange wachita ntheura wakhare wambula kutengwaso, panji waphemane na mufumu wakhe. Ndipo mufumu wareke kusuzula muwoli wakhe.

¹²Ku ŵanyakhe ndine nkhuyowoya, kuti ndi Fumu chara. Usange mukhristu yunji wali na muwoli uyo ngwambula kupulikana, ndipo wakuzomera kukhara nayo, wareke kumusuzula.

¹³Usange mwanakazi wali na mwanarume uyo ndi mukhristu chara, ndipo wakukhumba kukhara nayo mwanarume yura, wareke kumusuzula.

¹⁴Chifukwa mufumu wambula kupulikana uyu, wakuzgoka kuŵa ŵakupulikana chifukwa cha muwoli wakhe. Ndipo muwoli wambula kupulikana nayo, wakupulikana chifukwa cha mufumu wakhe mukhristu. Kuŵavyenge kuŵa ntheura mphanyi ŵana ŵinu mbambula kuphotoka, kweni na umo kuliri, iwo mbakupatulika.

¹⁵Kweni usange wambula kupulikana wakukhumba kupatukako, wachite ntheura. Mufumu panji muwoli mukhristu kuti ngwa kukakika chara pa makani agha, pakuti Chiuta wali kutichema ise kukhara mu mutende.

¹⁶Kasi iwe wa muwoli, ungamanya uli, panji ungathaska mufumu wako? Panji iwe mufumu, ungamanya uli, panji ungathaska muwoli wako?

¹⁷Munthu yose wakwenera kukhara na umoyo uwo Fumu yili kumugaŵira, ndipo na weneuwo Chiuta wali kumuchemeramo. Ili ndilo dango lane mu mipingo yose.

¹⁸Kasi wakaŵapo yumoza apo wakachemekanga wakaŵa wakukotoreka kale? Wareke kuwuskapo chimanyikwiro cha ukotori wakhe. Kasi wakaŵapo yumoza apo wakachemekanga wakaŵa wambula kukotoreka? Wareke kughanaghana kuti wakotoreke.

¹⁹Kukotoreka panji kuwura kukotoreka kuti nkhanthu chara, kweni kusungilira marango gha Chiuta ndiko.

²⁰Munthu yose wakharenge mukaŵiro ako wakaŵamo apo wakachemekera.

²¹Kasi ukaŵa muzga para ukachemekanga? Ungapwererangako chara. Kweni usange ungatora wanangwa wako, sangirapo mwaŵi.

²²Chifukwa uyo wakaŵa muzga para Fumu yikamuchemanga, ndi mwanangwa wa Fumu. Ntheura pera uyo wakaŵa mwanangwa para wakachemekanga ndi muzga wa Khristu.

²³Mukagulika na mtengo wapatali. Ntheura mungaŵanga ŵazga ŵa ŵanthu chara.

²⁴Ntheura mwa ŵabali, munthu yose wakhare mwa Chiuta umo wakaŵira para wakachemekanga.

²⁵Sono pa makani gha awo ŵatengwe, ndilije languro la kufumira kwa Fumu. Kweni nkhupereka maghanoghano ghane nga ndi munthu uyo ngwa kugomezgeka chifukwa cha lusungu lwa Fumu.

²⁶Chifukwa cha visuzgo vya nyengo yino, nkhughanaghana kuti nchiweme kuti munthu wakhare nga ndi umo waliri.

²⁷Kasi uli kukakika ku muwoli wako? Ureke kujisutulako. Kasi ndiwe wambula kutora? Ureke na kutora mwanakazi.

²⁸Kweni usange watora, kuti wananga chara. Ndipo usange mwali watengwa, kuti wakwananga chara. Ndipouli awo ŵakunjira mu nthengwa, ŵati ŵaŵenge na visuzgo vya charu, ndipo ine ndakhumbanga kumuthaskani ku visuzgo ivi.

²⁹Mwa ŵabali, icho nkhung'anamula nchakuti nyengo yakhara yichoko. Kufuma sono na kunthazi rekani awo ŵali na ŵawoli, ŵakhare nga ndi para ŵalije kutora

³⁰Awo ŵakutengera, ŵakhare nga ndi para ŵakutengera chara. Ndipo awo ŵakukondwa, nga ndi para ŵakukondwa chara. Awo ŵakugula, nga ndi para ŵalije katundu.

³¹Ndipo awo ŵakutangwanika na vya charu, nga ndi para ŵalije icho ŵangatangwanika nacho. Chifukwa kaŵiro ka charu ichi, kakumara.

³²Nkhukhumba kuti mureke kwenjerwa. Mwanarume wambula kutora wakwenjerwa na mlimo wa Fumu umo wangayikondweskera.

³³Kweni mwanarume wakutora wakwenjerwa na vya mu charu, umo wangakondweskera muwoli wakhe,

³⁴ndipo maghanoghano ghakhe ngakugaŵikana. Mwanakazi wambula kutengwa panji mwali wakwenjerwa na vinthu vya Fumu, umo wangaŵira mutuŵa mu thupi na mu mzimu. Kweni mwanakazi wakutengwa wakwenjerwa na vya charu, umo wangakondweskera mufumu wakhe.

³⁵Nkhuyowoya ichi, kuti ndimovwirani, kuti nkhukhumba kumukanizgani chara. Nkhukhumba kuti imwe muchitenge icho nchiweme na chakwenerera na kujipereka ku mlimo wa Fumu kwambula kujandizgika.

³⁶Kweni usange yumoza wakughanaghana kuti wakumunangira mwali uyo wali kumujalira, ndipo chirakorako chakumukhumba munyakhe chajumphizga, rekani wachite nga ndi umo wakukhumbira. Rekani iwo ŵatorane ndipo kuti ŵakwananga chara.

³⁷Kweni usange mwanarume yunji kwambula kuchichizgika, wadumula mu mtima wakhe kureka kutora mwali uyo wali kumujalira, ndiposo usange na khumbo lakhe wakujikora ndipo wadumula mu mtima wakhe icho wachitenge, mbwenu wakuchita makora kureka kutora mwali uyo.

³⁸Ntheura mwanarume uyo wakutora wachita makora, kweni uyo wakukhumba kutora chara nayoso wakuchita makora chomene.

³⁹Muwoli ngwa kukakika nyengo yose apo mufumu wakhe wachali wamoyo, kweni usange mufumu wakhe wafwa, ndi mwanangwa kutorana na yose uyo wakhumba, usange nthengwa yawo nja chikhristu.

⁴⁰Umo nkhupimira ine, mwanakazi uyu wangaŵa wakukondwa kwakuruska usange wangakhara wambula kutengwa. Ndipo nkhughanaghana kuti na ine wuwo ndili na Mzimu wa Chiuta.