Read new_tumbuka_bible 1 ŴaKorinte 8 Bible Online

1 ŴaKorinte 8 - new_tumbuka_bible bible

1 ŴaKorinte 8

¹Sono kwakuyana na chakurya icho chikuperekeka ku vikozgo: tikumanya kuti, “Tose tili na umanyi.” Umanyi ukutukumura, kweni kutemwa kukuzenga.

²Usange munthu wakupima kuti wakumanya vinthu, kuti wakumanya umo wakwenera kumanyira chara.

³Kweni usange munthu wakutemwa Chiuta, ngwa kumanyikwa na Chiuta.

⁴Ntheura kuyana na kurya kwa vyakurya ivyo vikuperekeka ku vikozgo, “Tikumanya kuti chikozgo nchinthu chawakawaka mu chara,” ndipo kuti kulije Chiuta munyakhe kweni yumoza pera.

⁵Nangauli kungaŵa awo ŵakuti, “Ŵachiuta,” manyi ndi mu mlengalenga panji pasi pa charu, nga ndi umo nadi ŵaliko “ŵachiuta” ŵanandi na “mafumu” ghanandi,

⁶Ndipouli kwa ise kuli Chiuta yumoza pera, Dada, mweneuyo wakalenga vinthu vyose, ndipo tiliko chifukwa cha iyo, ndipo Fumu yimoza pera, Yesu Khristu, mwa mweneuyo vinthu vyose vikalengeka ndipo ise tili na umoyo chifukwa cha iyo.

⁷Ndipouli ndi wose awo ŵali na umanyi uwu chara. Kweni ŵanji pakuŵa ŵakuzgoŵera kusopa vikozgo, mpaka sono ŵakurya vyakurya nga vyaperekeka nadi ku chikozgo. Ndipo njuŵi zawo pakuŵa zitechitechi, nzakukazuzgika.

⁸Vyakurya kuti vingatenereska ise kwa Chiuta chara. Para tindarye chakurya, kuti tikutayapo chilichose chara, ndipo para tarya, kuti tikwandulapo chilichose chara.

⁹Kweni imwe chenjerani waka, mzire wanangwa winu uwu nyengo zinyakhe uzgoke chikhuŵazgo ku ŵakutomboroka.

¹⁰Pakuti usange munthu uyo njuŵi zakhe nzakutomboroka mu chipulikano, wakukuwona iwe munthu wa umanyi ukurya mu nyumba ya chiuta ngoza, asi iyo wangakwezgeka nkhumbi chara usange maŵyeŵye ghakhe ngatechitechi kuti warye chakurya icho chaperekeka ku ŵangoza?

¹¹Ndipo sono na umanyi wako munthu wakutomboroka uyu, mubali mweneuyo Khristu wakamufwira, watayikenge.

¹²Ntheura, kwanangira ŵabali ŵinu, na kupweteka njuŵi yawo apo njakutomboroka, mukwanangira Khristu.

¹³Ntheura, usange chakurya icho nkhurya chikukhuŵaliska mubali wane, ndamkuryaso nyama chara, mzire ndichitiske kuti mukhristu munyane wawe.