Read new_tumbuka_bible 1 ŴaKorinte 9 Bible Online

1 ŴaKorinte 9 - new_tumbuka_bible bible

1 ŴaKorinte 9

¹Kasi ndine mwanangwa chara? Kasi ndine wakutumika chara? Asi ndili kumuwona Yesu Fumu yithu? Asi imwe ndimwe vipambi vya mlimo wane mu kuteŵetera Fumu?

²Usange ku ŵanthu ŵanyakhe ndili wakutumika chara, kweni kwa imwe ndine wakutumika nadi, chifukwa imwe ndimwe chimanyikwiro cha kutumika kwane mwa Fumu.

³Kujivikirira kwane ku awo ŵakundifumba ndi uku.

⁴Kasi tilije wanangwa kuti tirye na kumwa?

⁵Kasi tilije wanangwa wakwenda na ŵanakazi ŵakhristu pa maulendo nga ndi umo ŵakuchitira ŵakutumika ŵanji na ŵabali ŵa Fumu, ndiposo na Kefase?

⁶Panji kasi ndi Baranaba pera na ine, awo ŵalije wanangwa kuchita mlimo mwakuti tijovwire?

⁷Ndi njani uyo wakuteŵeta nga ndi musilikari ndipo wakujiripira yekha? Ndi njani uyo wakupanda mpheska kwambula kuryako vipambi vyakhe? Ndi njani uyo wakuliska mskambo kwambula kumwako mkaka wakhe?

⁸Kasi nkhuyowoya ichi na mazaza gha unthu? Asi marango nagho ghakuyowoya ntheura?

⁹Chifukwa kuli kulembeka mu Dango la Mozesi kuti, “Ureke kukaka nkhaŵi ku mlomo para yikubula tirigu.” Kasi mukupima kuti Chiuta wakupwerererako vya nkhaŵi?

¹⁰Asi wakuyowoya ichi chifukwa cha ise? Inya, ichi chili kulembeka chifukwa cha ise, pakuti uyo wakulima na uyo wakubula, ŵakwenera kuchita ntheura mu chigomezgo chakuti ŵaŵe na phande mu vuna yira.

¹¹Usange tapanda mbuto ya uzimu mukati mwinu, kasi nchinonono usange tikupokera vyakovwira thupi kufuma kwa imwe?

¹²Usange ŵanji ŵakusangana pa pempho lakwenerera ili pa imwe, asi ise ndise tili ŵakwenera kuŵa nalo kwakuruska? Ndipouli kuti tikachita nagho nchito mazaza agha chara, kuruska apa tikuzizipizga pa kanthu kalikose, mwakuti tireke kujandizga Uthenga Uweme wa Khristu.

¹³Kasi mukumanya chara kuti ŵanthu awo ŵakuteŵeta mu Nyumba ya Chiuta ŵakurya kufuma mu Nyumba ya Chiuta? Ndipo awo ŵakuteŵeta pa jochero, asi nawo ŵakusangana vya sembe yira?

¹⁴Ntheura pera, Fumu nayo yikalangula kuti awo ŵakupharazga Uthenga Uweme ŵakwenera kupoka vyakuŵalera kufuma mu Uthenga Uweme.

¹⁵Kweni ine ndilije kugwiriska nchito wanangwa uwu, panji nesi kuti nkhulemba ichi mu chigomezgo chakuti mundichitire ine vinthu ivi chara. Mphanyi changuŵa chiweme kuti ndifwe, kuruska kuti munyane wandipoke icho ine nkhuthumbwira.

¹⁶Chifukwa usange nkhupharazga Uthenga Uweme, ichi kuti ndingathumbwirapo chara, chifukwa nchakwenerera kuti ndichite ntheura. Soka kwa ine usange nkhureka kupharazga Uthenga Uweme!

¹⁷Pakuti usange nkhuchita ichi na khumbo lane na lane, ndili nayo njombe. Kweni usange nkhuchita na khumbo lane na lane chara, ipo nkhuchita nchito iyo ndili kutumika.

¹⁸Kasi sono njombe yane nchichi? Njombe yane ndi iyi yakuti, para nkhupharazga Uthenga Uweme, ndipharazge kwambula njombe, ndipo kwambula kurongora mazaza ghane ghali ghose pakupharazga Uthenga Uweme uwu.

¹⁹Nangauli ndili mwanangwa ku ŵanthu wose, kweni ndajizgora kuŵa muzga wa wose mwakuti panji ndingakopa ŵanandi.

²⁰Ku ŵaYuda nkhaŵa nga ndi muYuda, mwakuti ndikope ŵaYuda. Kwa awo ŵakaŵa pasi pa Dango la Mozesi nane nkhaŵa pasi pa marango kuti ndiŵakope awo ŵali pasi pa marango nangauli ine kuti ndili pasi pa marango chara.

²¹Ku awo ŵakaŵa kuwaro kwa dango, nkhaŵa nga njumoza wakuwaro kwa dango mwakuti ndiŵakope awo ŵakaŵa kuwaro kwa dango nangauli kuti ine nkhareka kusunga marango gha Chiuta chara, kweni ndili pasi pa marango gha Khristu.

²²Ku awo mbakutomboroka nane nkhaŵa wakutomboroka, mwakuti ndiŵakope awo mbakutomboroka. Ndajizgora kuŵa chilichose ku ŵanthu wose mwakuti mu nthowa yiliyose ndiponoske ŵanji.

²³Nkhuchita chose ichi chifukwa cha Uthenga Uweme, mwakuti nane ndiŵe na phande mu vitumbiko vyakhe.

²⁴Kasi mukumanya chara kuti mu chipharizgano wose awo ŵakuchimbira ŵakulimbana, kweni yumoza pera ndiyo wakupoka njombe? Ntheura chimbirani kuti mupokere njombe.

²⁵Munthu yose uyo wakuchita masoŵero ghakuchimbira na kuduka, wakuyezga kujikora mu vinthu vyose. Wakuchita ichi, mwakuti wapoke mphumphu iyo yikumara. Kweni ise tikuchita ichi kuti tipokere mphumphu yambula kumara.

²⁶Ndipouli ine nkhuchimbira na kumanya makora apo pali chikhomo chane. Kuti ndili nga ndi uyo para wakutimbana na munyakhe kuti wakutimba khofi lakhe pa waka chara.

²⁷Nkhutimba thupi lane na kulithereska, mzire para ndaŵapharazgira ŵanyane, ine ndamwene ndiwure kwenerera njombe.