Read new_tumbuka_bible 2 ŴaKorinte 1 Bible Online

2 ŴaKorinte 1 - new_tumbuka_bible bible

2 ŴaKorinte 1

¹Kufuma kwa ine Paulosi, wakutumika wa Khristu Yesu, na khumbo la Chiuta, na Timote mubali withu. Ku mpingo wa Chiuta uwo uli mu Korinte, pamoza na ŵanthu wose ŵa Chiuta awo ŵali mu Akaya yose.

²Uchizi na mutende vyakufumira kwa Chiuta Ŵadada na kwa Fumu yithu Yesu Khristu viŵenge namwe.

³Timuwonge Chiuta, Wiske wa Fumu yithu Yesu Khristu, Dada wa lusungu na Chiuta wa chisangurusko chose,

⁴mweneuyo wakutisanguruska mu visuzgo vyithu vyose, mwakuti timanye kukhwimiska awo ŵali mu suzgo lirilose, na chisangurusko icho nase Chiuta wakutisanguruska nacho.

⁵Nga ndi umo tikusanganirana mwakuzara mu visuzgo vya Khristu, ntheuraso tikusangana mwa Khristu chikhwimisko chakuzara.

⁶Usange tikusuzgika, nchifukwa cha kusanguruskika na kuponoskeka kwinu. Usange ise tikusanguruskika, nchifukwa chakuti imwe namwe muŵe na chisangurusko cheneicho mukuŵa nacho para mukuzizipizga na mtima wakuzika pa visuzgo ivyo ise nase tikukomwa navyo.

⁷Chigomezgo chithu pa imwe nchakukhora. Tikumanya kuti nga ndi umo muliri ŵakusanganirana mu visuzgo vyithu, ntheuraso ndimo muliri ŵakusanganirana mu chisangurusko chithu.

⁸Mwa ŵabali, kuti tikukhumba chara kuti mureke kumanya suzgo yithu iyo yikatiwira ku Asiya. Pakuti tikanyekezgeka kwambula kutukuruka na kutaya chigomezgo cha umoyo.

⁹Chifukwa nchivichi? Tikaghanaghana kuti tikapokera chilango cha nyifwa. Kweni chikaŵa chakutipangiska kuti tireke kuŵika chigomezgo pa ise tekha, kweni pa Chiuta, uyo wakuwuska wakufwa.

¹⁰Iyo wakatithaska ku soka likuru la kukoma, ndipo watithaskengeso. Pa iyo taŵika chigomezgo chithu kuti wati warutilire kutithaska.

¹¹Imwe namwe mukwenera kutovwira na malurombo, mwakuti ŵanthu ŵanandi ŵawongenge Chiuta mu malo mwa ise, chifukwa cha vitumbiko ivyo Chiuta watipa ise pakuzgora malurombo ghanandi.

¹²Pakuti kuthumbwa kwithu ndi uku, njuŵi zithu zikutikhalira ukaboni kuti tarongora nkharo mu charu, chomenechomene kwa imwe, mu utuŵa na unenesko wenecho uwo kuti ukwiza na mahara gha charu chara, kweni ukwiza na uchizi wa Chiuta.

¹³Chifukwa tikumulemberani vinyakhe chara, kweni ivyo mungamanya kuŵazga na kupulikiska. Ndipo nkhugomezga muzamupulikiska nkhanira,

¹⁴nga ndi umo mwapulikiskira ku lwande kuti mungathumbwira mwa ise, umo nase tizamkuthumbwira mwa imwe pa zuŵa la Fumu Yesu.

¹⁵Chifukwa nkhaŵa na chigomezgo pa ichi, ntheura nkhakhumbanga kwiza danga kwa imwe, mwakuti muŵe na chisangurusko chakwandaniskika.

¹⁶Nkhanozgera kuchezga namwe pakuruta ku Makedoniya, na kuwereraso kwa imwe kufuma ku Makedoniya, mwakuti mundovwire kurutirizga ulendo wane ku Yudeya.

¹⁷Para nkhaghanaghana kuchita ichi, kasi nkharongoranga kusinthasintha? Kasi nkhupanga unozgero wane nga ndi munthu wa charu uyo ngwa kunozgeka kuyowoya kuti, “Inya,” panji “Chara,” pa nyengo yimoza pera?

¹⁸Kweni nadi nga ndi umo Chiuta waliri wakugomezgeka, mazgu ghithu kwa imwe ghalije, “Inya” panji, “Chara.”

¹⁹Chifukwa Mwana wa Chiuta, Yesu Khristu, uyo Silivano, Timote na ine tikapharazga mukati mwinu, kuti wakaŵa, “Inya” panji, “Chara” chara. Kweni mwa iyo zgoro likuŵa “Inya” nyengo zose.

²⁰Pakuti mapangano ghose gha Chiuta ghakufiskikira mwa iyo. Ndicho chifukwa tikuyowoya kuti, “Ameni” pakuchindika Chiuta mwa iyo.

²¹Kweni ndi Chiuta uyo wali kutikhazikiska ise na imwe mwa Khristu ndipo ndiyo wali kutisora ise kuŵa ŵakuphakazgika.

²²Iyo wali kuŵika chidindo chakhe pa ise kuŵa ŵakhe, na kutipa Mzimu wakhe mu mitima yithu nga nchikhole.

²³Kweni nkhuchema Chiuta kuti waŵe kaboni wane pakuti nkhareka kwiza ku Korinte chifukwa chakumupwerererani imwe.

²⁴Kuti tikukhumba kumulangulani icho mukwenera kugomezga chara. Tikumanya kuti muli ŵakukhwima mu chipulikano. Ndipouli tikuteŵeta pamoza na imwe kuti mukondwe.