Read new_tumbuka_bible 2 ŴaKorinte 10 Bible Online

2 ŴaKorinte 10 - new_tumbuka_bible bible

2 ŴaKorinte 10

¹Ine, Paulosi, nkhumuŵeyani mukujipepura na kuzika kwa Khristu ndamweneine ndili wakujiyuyura para ndili pa maso pinu, kweni wa chikanga para ndili kutali namwe.

²Nkhumuŵeyani, kuti para ndilipo, nkhwenera chara kurongora chikanga na chigomezgo cha ntheura nga ndi umo nkhurongorera ku ŵanji awo ŵakutighanaghanira kuti machitiro ghithu nga unthu.

³Chifukwa nangauli tikukhara mu charu, kweni tikurwa nkhondo ya charu chara.

⁴Pakuti mahomwa gha nkhondo yithu kuti nga charu chara, kweni ghali na nkhongono ya Chiuta kupankhura malinga. Tikupankhura maghanoghano gha utesi.

⁵Tikubwangandula kukwesana ndiposo na chiphizgo icho chikwimikana na umanyi wa Chiuta, na kutorera maghanoghano ghose ku uzga wakupulikira Khristu.

⁶Usange kupulikira kwinu nkhwakufikapo, tili ŵakunozgeka kulanga wose ŵambula kupulikira.

⁷Usange munthu yunji wakujigomezga kuti ngwa Khristu, rekani wajikumbuske iyomwene kuti umo waliri wa Khristu, ndimo tiliri na ise wuwo.

⁸Pakuti ndikhozgekenge soni chara nangauli ndingathumbwa kwakujumphizgirako na mazaza agho Fumu yikapereka ghakumuzengani imwe, ghakumubwangandulani chara.

⁹Kuti nkhukhumba kuwoneka nga nkhumofyani na makarata chara.

¹⁰Pakuti ŵanji ŵakuti, “Makarata gha Paulosi ngazitu na gha nkhongono, kweni para wali mukati mwinu, ngwa kutomboroka waka, ndipo mazgu ghakhe ghalije na kanthu.”

¹¹Ŵanthu ŵa ntheura ŵapulikiske kuti icho tikuyowoya mu makarata para tilipo chara, ndichoso tikuchita para tilipo.

¹²Kuti tikukhumba kuŵa ŵa pachanya chara nesi kujilinganizga na ŵanji ŵa iwo awo ŵakujenereska ŵekha. Kweni para ŵakujipima iwoŵene mu ŵanyawo ndipo para ŵakujiyerezgera na ŵanyawo, mbambula kupulikiska.

¹³Ndipo nkhwakuti tithumbwenge kujumpha mphaka chara, kweni titi tikhalirire mu mphaka iyo Chiuta wali kutipimira, kufikira na kwa imwe.

¹⁴Chifukwa kuti tikujumpha mphaka chara, nga ndi para ise tindafikeko kwa imwe. Ndise tikadanga kwiza na Uthenga Uweme wa Khristu, kwenda mtunda wose kufikira na kwa imwe.

¹⁵Pa milimo ya ŵanthu ŵanyakhe kuti tikuthumbwa kujumpha mphaka chara, kweni chigomezgo chithu nchakuti, apo chipulikano chinu chikukulirakulira milimo yithu mukati mwinu tikuyikhumbira kuti yikule chomene,

¹⁶mwakuti tipharazge Uthenga Uweme mu vyaru vinyakhe kutali na imwe kwambula kuthumbwira mu mlimo uwo uli kuchitika kale na ŵanthu ŵanji.

¹⁷“Uyo wakuthumbwa wathumbwire mwa Fumu.”

¹⁸Chifukwa munthu uyo wakujiyenereska yekha kuti ndiyo wakupokerereka chara, kweni mweneuyo Fumu yikumuyenereska.