Read new_tumbuka_bible 2 ŴaKorinte 11 Bible Online

2 ŴaKorinte 11 - new_tumbuka_bible bible

2 ŴaKorinte 11

¹Ndakhumbanga kuti mphanyi mwandizizipizgirapo pachoko pa uchindere wane. Nkhumuŵeyani mundizizipizgire nadi.

²Ndili namwe na sanje za uchiuta pakuti nkhamujalirani nga ndi mwali kwa Khristu, kumuperekani imwe nga ndi mlowokazi mwenemwene ku mufumu wakhe.

³Kweni ndili na wofi kuti, nga ndi umo njoka mu uchenjezi wakhe yikapusikira Eva, imwe namwe maghanoghano ghinu ghapuruskikenge na kupatukako kujipereka kwa Khristu uko kwambula upusikizgi na kwakufikapo.

⁴Chifukwa usange munthu munyakhe wakwiza na kupharazga Yesu munyakhe kuruska uyo tikamupharazgirani, panji usange mwapokera mzimu unyakhe wakupambana na uwo muli kupokera, panji para mukupokerera uthenga uweme unyakhe wakupambana na uwo muli kupokerera, mukujiperekako mwaluŵiro.

⁵Nkhughanaghana kuti ndili muchoko kuruska ŵakutumika ŵakuruŵakuru ŵara chara.

⁶Nangauli ndili mulemwa mu mayowoyero, kweni mu umanyi chara. Mu nthowa yiliyose ichi tarongora pakweru kwa imwe mu vinthu vyose.

⁷Kasi nkhachita uheni pakujiyuyura mwakuti imwe mukwezgeke apo nkhamupharazgirani Uthenga Uweme wa Chiuta kwambula kupoka njombe?

⁸Nkhaŵa nga nkhibiranga mipingo yinyakhe pakuzomera wovwiri kufuma kwa iwo mwakuti ndimuteŵeterani imwe.

⁹Ndipo para nkhaŵa na imwe, pa nyengo ya kusoŵerwa kwane kuti nkhazotofya waliyose chara. Chifukwa vyakusoŵerwa vyane vikaperekekanga na ŵabali awo ŵakafuma ku Makedoniya. Nkhajikora ndipo nditi ndirutilire kujikora mwakuti ndireke kumuzotofyani.

¹⁰Umo unenesko wa Khristu uliri mwa ine, kuthumbwa kwane uku, kuti kurekeskekenge chara mu vigaŵa vya Akaya.

¹¹Chifukwa uli? Kasi ndi chifukwa chakuti nkhumutemwani chara? Chiuta wakumanya kuti nkhumutemwani.

¹²Ndipo icho nkhuchita nditi ndirutilire kuchita, mwakuti ndidumulizge mwaŵi wa awo ŵakukhumba kuthumbwa na kutumika uko ŵakuyowoya kuti ŵakuteŵeta nga ndi umo tikuchitira ise.

¹³Chifukwa ŵanthu ŵa ntheura mbakutumika ŵapusikizgi, ŵateŵeti ŵa utesi ndipo ŵakujiwoneska nga mbakutumika nadi ŵa Khristu.

¹⁴Kuti ndi chinthu chakuzukumiska chara, pakuti nanga ndi Satana nayo, wakujizgora kuŵa nga ndi mungelo wa ungweru.

¹⁵Ntheura tingazizwa chara, usange ŵateŵeti ŵakhe nawo ŵakujibisa kuti ŵawoneke nga mbateŵeti ŵa urunji. Umaliro wawo uti uyanenge waka na milimo yawo.

¹⁶Nkhuwerezgaposo nkhuti, paŵavye na yumoza wandipime kuti ndili chindere. Kweni usange mukundipima ntheura, munditore nga chindere, mwakuti nane ndithumbwe pachoko waka.

¹⁷Nadi, icho nkhuyowoya sono kuti nkhuyowoyera mu mazaza gha Fumu chara, kweni nga nchindere mu chikanga ichi cha kuthumbwa.

¹⁸Pakuti ŵanthu ŵanandi ŵakuthumbwa na vinthu vya charu, naneso ndiŵenge wakuthumbwa.

¹⁹Imwe mwekha muli ŵamara, ntheura mwakukondwa, muvikuzizipizgira vindere.

²⁰Nadi, mukuzizipizga nanga munthu wangamuzgorani imwe kuŵa ŵazga, panji wamuryerani usambazi winu, panji wakusangirapo mwaŵi wakumwibirani, panji wakujiŵikamo, panji para wakumupamanthani ku maso.

²¹Ndili na soni kuzomera kuti tikaŵa ŵakutomboroka pakuchita vya ntheura. Sono nkhuyowoya nga nchindere, kweni chilichose icho munthu wangajikangarizga kuthumbwa nacho nane nkhujikangarizga kuthumbwa nacho.

²²Kasi iwo mbaHebere? Nane ndili muHebere. Kasi iwo mbaIsraele? Nane ndili muIsraele. Kasi iwo mba mphapu ya Abrahamu? Nane ndili wa mphapu ya Abrahamu.

²³Kasi iwo mbateŵeti ŵa Khristu? (Nkhuyowoya nga ngwa kufuntha.) Ine ndine muteŵeti kuruska iwo. Nkhatokatoka chomene kuruska iwo, nkhaŵa mu gadi kanandi kuruska iwo, ndili kuthyapulika chomene kuruska iwo, ndipo nyengo zinandi nkhaŵa pafupi na kufwa.

²⁴Kankhonde ŵaYuda ŵakandithyapula na maluswazu 37.

²⁵Nkhadupulika na ndodo katatu, kamoza nkhaponyeka na mawe. Katatu ngaraŵa yikandinangikira mu nyanja. Usiku umoza na zuŵa limoza nkhaŵa pa nyanja uko ngaraŵa yikuyegheka waka na mphepo.

²⁶Pa maulendo ghane ghanandi, nkhaŵa mu urwani wa mironga, mu urwani wa ŵankhungu, mu urwani wa kufuma ku ŵaYuda ŵanyane, mu urwani wa kufuma ku ŵamitundu, mu urwani wa mu msumba, mu urwani wa kufuma mu vinyama vya ku mapopa, mu urwani wa kufuma pa nyanja, na urwani wa kufuma ku ŵabali ŵakupusika,

²⁷Nkhateŵeta na mu maunonono, mazuŵa ghanandi nkhagonanga chara. Nkhaŵa na njara na nyota. Nyengo zinandi nkharyanga chara nesi kumwa maji ndipo nkhapulika mphepo na kusoŵerwa vyakuvwara.

²⁸Pa dera pa vinthu vinyakhe, pali kuzotofyeka kwa zuŵa na zuŵa kweneuko nkhwenjererwa mipingo yose ya Chiuta.

²⁹Ndi njani wangayowoya kuti ngwa kutomboroka, kuti ŵati ine ndili wakutomboroka chara? Ndi njani uyo wali kukhuŵaliskika ndipo ine ndilije kuphya mtima?

³⁰Usange nkhwenera kuthumbwa, nditi ndithumbwire mu kutomboroka kwane.

³¹Chiuta, Wiske wa Fumu yithu Yesu, mweneuyo ngwa kutumbikika kwa muyirayira, ndiyo wakumanya kuti ine nkhuteta chara.

³²Para nkhaŵa mu Damaseko, mukuru wa chigaŵa uyo wakaŵa pasi pa Karonga Areta wakaŵika ŵanthu ŵakundikhazga mu msumba mwakuti ŵandikore.

³³Kweni ŵanthu ŵakandiŵika mu chitete na kundikhizgira pa chidangazi, ntheura nkhathaskika.