Read new_tumbuka_bible 2 ŴaKorinte 12 Bible Online

2 ŴaKorinte 12 - new_tumbuka_bible bible

2 ŴaKorinte 12

¹Nkhwenera kuthumbwa nangauli palije icho ndingandurapo mu kuthumbwa, kweni nditi ndirutilire kuphara vya mboniwoni na mauvumbuzi gha Fumu.

²Nkhumanya mukhristu yumoza uyo mu virimika 14 ivyo vyarutapo, wakakorekera ku chigaŵa cha chitatu cha kuchanya. Manyi wakaŵa mu thupi, panji chara, ndilije kumanya, kweni Chiuta pera ndiyo wakumanya.

³Ndipo nkhumanya kuti munthu uyu wakakorekera mu paradiso[2] manyi mu thupi manyi chara, nkhumanya chara, kweni Chiuta ndiyo wakumanya.

⁴Ndipo iyo wakakapulika vinthu vyambula mayowoyeko, ivyo munthu kuti wangayowoya chara.

⁵Mu malo gha munthu uyu nditi ndithumbwenge, kweni kuti ndijithumbwirenge ndekha chara, kupatulako mu kutomboroka kwane.

⁶Kweni nanga ndingakhumba kuthumbwa, kuti ndiŵenge chindere chara, nditi ndiyowoyenge unenesko ndipera. Kweni ndareka, mwakuti kuŵavye yumoza wandipime wa pachanya kuruska umo wakundiwonera, panji kuruska umo wakupulikira kwa ine.

⁷Kweni kuti ndireke kudemwera mwakujumphizga chifukwa cha mauvumbuzi ghanandinandi, nkhapika munga mu thupi lane ndiyo nthumi ya Satana, kundisuzga ine kuti ndireke kudemwera mwakujumphizga.

⁸Nkharomba Fumu katatu pa ichi, kuti yichiwuskeko kwa ine.

⁹Kweni Fumu yikandiphalira yikati, “Uchizi wane ukukukwanira, chifukwa nkhongono zane zikuŵa zakufikapo mu kutomboroka.” Ntheura ine nditi ndikondwe na kuthumbwa chomene mu kutomboroka kwane, mwakuti nkhongono ya Khristu yikharenge mwa ine,

¹⁰Ntheura chifukwa cha Khristu ine nkhukondwa para ndili wakutomboroka, para ŵanthu ŵakundisunjizga, para ŵanthu ŵakundizikizga, para ndili mu maunonono, na para ndili mu vyakwenjezga. Pakuti para ndili wakutomboroka, ndipo nkhuŵa wankhongono.

¹¹Ndazgoka chindere, ndipo ndimwe mukandichichizgirako, pakuti nkhenera kurumbika na imwe. Chifukwa kuti ndili pasi pa ŵakutumika aŵa ŵapachanya chara nangauli ndili kanthu chara.

¹²Na mitima wakuzizipizga, nkhamurongorani vimanyikwiro, vyakuzizwiska, na milimo ya nkhongono kuti ndine wakutumika nadi.

¹³Kasi ndi kanthu uli ako ine ndindamuchitireni ndipo nkhachitira mipingo yinyakhe, pa dera pa ichi chakuti nkhamuzotofyani chara? Mundigowokere kwananga kwane uku.

¹⁴Aka nkha chitatu kuŵa wakunozgeka kwiza kwa imwe. Kuti nditi ndimuzotofyani chara, chifukwa kuti nkhupenja icho nchinu chara, kweni imwe. Pakuti ŵana ndiwo ŵakwenera kuŵikira usambazi ŵapapi ŵawo chara, kweni ŵapapi ŵawo ndiwo.

¹⁵Ine ndiŵenge wakukondwa chomene kutaya vyose ivyo ndili navyo nanga kungaŵa kujitaya ndamwene chifukwa cha mizimu yinu. Usange ine nkhumutemwani chomene, kasi ine nkhwenera kutemweka pachoko?

¹⁶Kweni pakupanikizga kuti ine nkhamuzotofyani chara, imwe mukuti nkhaŵa muchenjezi ndipo nkhamusangani mu upusikizgi.

¹⁷Kasi nkhasangirapo mwaŵi pa imwe kwizira mwa waliyose wa awo nkhamutumirani?

¹⁸Nkhamupempha Tito kuti wizakamuchezgerani imwe, na kutumaso munyithu yumoza pamoza nayo. Kasi Tito wakasangirapo mwaŵi kumupusikani? Asi iyo na ine tikateŵetanga na mtima umoza? Asi tose tikarondezga nthowa yimoza pera?

¹⁹Kasi mwaghanaghananga nyengo yose iyi kuti tajivikiriranga tekha kwa imwe? Ndi panthazi pa Chiuta apo ise tikayowoyeranga mwa Khristu ndipo vyose, vyakumuzengani imwe mwa ŵakutemweka.

²⁰Nkhopa kuti para nkhwiza ndireke kwiza kamusangani na kaŵiro ako nkhakupambana na umo nkhukhumbira. Nanga ndimwe kuti mwizakasanga mwa ine kaŵiro ako mukukhumba chara. Nkhopa kuti panji ndingiza kasangamo zawe, sanje, ukari, chigoro, kunenana, kusesa, kujikuzga na chitimbaheti.

²¹Nkhopa kuti para nkhwizaso Chiuta wane wangazakandipepura pa maso pinu, ndipo ndingazakachichizgika kulira chifukwa ŵanandi mwa iwo awo pakudanga wakananga ndipo ŵalije kuzgokako ku umoyo wa ukazuzi, wa uzaghali ndipo kureka kulorako ukhaliro wakulamphalampha ivyo ŵakachitanga.