Read new_tumbuka_bible 2 ŴaKorinte 2 Bible Online

2 ŴaKorinte 2 - new_tumbuka_bible bible

2 ŴaKorinte 2

¹Ntheura nkhadumula mu mtima wane kuti kwiza kwa imwe kuŵa kwakupweteka.

²Chifukwa usange ine nkhumukwenyerezgani, kasi ndi njani uyo wangamanya kundisanguruska? Asi ndi mweneuyo ine ndamukwenyerezga?

³Ndipo nkhalemba kwa imwe cheneichi kuti para ndiza ndireke kukwenyerera na ŵeneawo ŵakwenera kundisanguruska, pakuti nkhakhorwamo mwa imwe mose.

⁴Pakuti nkhamulemberani kufumira ku visuzgo vinandi na kuŵaŵa kwa mtima na masozi ghanandi. Kuti nkhakhumba kumulemberani kuti mupwetekeke chara, kweni kuti mumanye uzari wa chitemwa icho ndili nacho pa imwe.

⁵Ndipo usange munthu yunji wakwenyerezga munthu yunji, kuti wakwenyerezga ine chara, kweni imwe panji ŵanji ŵa imwe. Pakuyowoya ichi kuti nkhukhumba kuŵa munonono kwa iyo chara.

⁶Kwa munthu wa ntheura uyu, chilango chakuperekeka na ŵanthu ŵanandi, nchakwenerera.

⁷Ipo sono, mukwenera kumugowokera na kumusanguruska, mzire watimbanizgike na chitima chikuru.

⁸Ntheura nkhumuŵeyani kuti mukhozgeso chitemwa chinu kwa iyo.

⁹Ichi ndicho chifukwa nkhalembera kuti, ndimuyezgani na kuti ndimanye nadi usange muli ŵakupulikira mu vinthu vyose.

¹⁰Yose uyo mwamugowokera, naneso ndamugowokera. Usange ndili kugowokerapo munthu waliyose, ndamugowokera chifukwa cha imwe pa maso pa Khristu.

¹¹Urato wa vyose ivi nkhukanizga Satana kuti wareke kusangirepo mwaŵi pa ise, pakuti tikumanya nthowa zakhe za uryarya.

¹²Para nkhafika ku Turowa kuti ndipharazge Uthenga Uweme wa Khristu, Fumu yikandijulira muryango kuti nkhachite mlimo kwenekura.

¹³Kweni kuti mtima wane ukazika chara, chifukwa nkhamusanga chara mubali wane Tito. Ntheura nkhaŵareka ndipo nkharuta ku Makedoniya.

¹⁴Kweni tiwonge Chiuta uyo nyengo zose wakutirongozga ku kuvivya mwa Khristu. Ndipo mwa ise wakutandazga kuti iyomwene wamanyikwe kosekose nga ndi sungu liweme.

¹⁵Pakuti tili sungu liweme la Khristu kwa Chiuta pakati pa awo ŵakuponoskeka na awo ŵakutayika.

¹⁶Ku awo ŵakutayika, sungu nda nyifwa ilo likukoma. Kweni kwa awo ŵakuponoskeka, sungu ili nda umoyo. Ntheura ndi njani uyo wangachita mlimo uwu?

¹⁷Pakuti ise kuti tili nga ndi ŵanandi chara awo ŵakuguliska mazgu gha Chiuta. Kweni pakuti Chiuta wali kutituma, tikuyowoya na unenesko pa maso pakhe nga ŵateŵeti ŵa Khristu.