Read new_tumbuka_bible 2 ŴaKorinte 3 Bible Online

2 ŴaKorinte 3 - new_tumbuka_bible bible

2 ŴaKorinte 3

¹Kasi tikwamba kujirumbaso? Panji tikukhumba makarata gha marumbo kwa imwe panji ghakufumira kwa imwe, nga ndi umo ŵakuchitira ŵanthu ŵanyakhe?

²Imwe mwekha ndimwe karata withu wakuzomerezgeka, wakulembeka mu mitima yinu, wakumanyikwa na kuŵazgika na ŵanthu wose.

³Ndipo mukurongora kuti ndimwe karata wakufumira kwa Khristu, wakuperekeka na ise, ndipo kuti ngwa kulembeka na inki chara, kweni na Mzimu wa Chiuta wamoyo. Kuti wali kulembeka pa libwe lipapati chara kweni pa mitima yipapati ya ŵanthu.

⁴Ichi ndicho chigomezgo chithu kwa Chiuta mwa Khristu.

⁵Kuti nkhwakuti tili na usiri pa ise tekha chara kuti tiyowoye kalikose kakufumira kwa ise. Usiri withu ukufumira kwa Chiuta.

⁶Iyo ndiyo wakatipa ise usiri kuti tiŵe ŵateŵeti ŵa phangano liphya, kuti ndi mu dango lakulembeka chara, kweni mu Mzimu. Chifukwa dango lakulembeka likukoma, kweni Mzimu ukupereka umoyo.

⁷Sono usange kwiza kwa nyifwa kukalembeka pa mawe, na kuperekeka na uchindami ukuru, mwakuti ŵaIsraele ŵakatondeka kulaŵiska ku chisko cha Mozesi chifukwa cha kuŵala kwakhe, nangauli kuti kukakhalirira chara,

⁸asi mlimo wa Mzimu uti uŵenge na uchindami kwakuruska?

⁹Usange kachitiro ka Dango ilo likususka ŵanthu kakaŵa na uchindami, ipo kachitiro ako kakurunjiska ŵanthu kati kaŵe na uchindami kwakuruska.

¹⁰Inya nadi, mu chifukwa ichi, icho kale chikaŵa na uchindami, kuti sono chili na uchindami chara chifukwa cha uchindami uwo ukuwuruska.

¹¹Ndipo usange icho chikakhara nyengo yichoko waka chikiza na uchindami, ipo icho chikukhalirira chikwenera kuŵa na uchindami kwakuruska.

¹²Pakuti tili na chigomezgo cha ntheura, tili na chikanga chikuru chomene.

¹³Kuti tili nga ndi Mozesi chara, uyo wakabisa chisko chakhe na chidiko, kuti ŵaIsraele ŵareke kuwona kumara kwa uchindami uwo ukamarizgikanga.

¹⁴Kweni maghanoghano ghawo ghakanonofyeka. Chifukwa kufika mpaka sono, para ŵakuŵazga phangano la kale, chidiko chenechira chikuwuskikako chara chifukwa ndi mwa Khristu pera umo chikuwuskikirako.

¹⁵Inya, na sono wuwo, para Dango la Mozesi likuŵazgika chidiko chikubenekerera maghanoghano ghawo.

¹⁶Kweni para munthu wang'anamukira kwa Fumu, chidiko chira chikuwuskikako.

¹⁷Sono, Fumu ndi Mzimu, ndipo apo pali Mzimu wa Fumu pali wanangwa.

¹⁸Ndipo ise tose, na visko vyambula kubenekerereka, apo tikuwona uchindami wa Fumu, tikusinthikirasinthikira mu chikozgo chakhe mu kakuliro ka uchindami. Pakuti ichi chikufuma kwa Fumu, mweneuyo ndi Mzimu.