Read new_tumbuka_bible 2 ŴaKorinte 4 Bible Online

2 ŴaKorinte 4 - new_tumbuka_bible bible

2 ŴaKorinte 4

¹Chiuta mu lusungu lwakhe wali kutipa mlimo uwu, ntheura tikugongowa chara.

²Kweni tili kuvireka nkhanira vyose vyakubisika, na vyakukhozga soni. Kuti tikuchita mu upusikizgi chara, nanga nkhutimbanizga mazgu gha Chiuta. Kweni, tikupharazga unenesko pakweru ndiposo tikuyezga kujiyenereska ku njuŵi ya munthu waliyose panthazi pa Chiuta.

³Kweni usange Uthenga Uweme uwo tikupharazga ngwa kubisika, ngwa kubisika ku ŵakutayika pera.

⁴Kwakuyana na iwo chiuta wa charu ichi cha pasi, wali kuburumutizga maghanoghano ghawo, mwakuti ŵareke kuwona ungweru wa Uthenga Uweme wa uchindami wa Khristu, uyo nchikozgo cha Chiuta.

⁵Chifukwa kuti tikujipharazga tekha chara, kweni tikupharazga Yesu Khristu kuti ndiyo Fumu, ndipo ise tili ŵateŵeti ŵinu chifukwa cha Yesu.

⁶Pakuti Chiuta uyo wakayowoya kuti, “Rekani ungweru uŵale kufumira ku mdima,” ndiyo wakuŵala mu mitima yithu, kutipa ungweru wa kamanyiro ka uchindami wa Chiuta uwo ukuŵala mu chisko cha Khristu.

⁷Kweni ise tili nga viŵiya vya dongo vyakusungiramo usambazi wa uzimu uwu, kurongora kuti nkhongono zambula mapimiko za ntheura, ndi za Chiuta, kuti ndi zithu chara.

⁸Tikugundizgika na visuzgo vinandinandi, kweni kuti tikufinyirizgika chara, nyengo zinyakhe tikuzizikika, kweni tikuwa nkhumbi chara.

⁹Tikuzikizgika, kweni kuti tikusidika chara, nanga tikutitimizgikira pasi kweni kuti tikusakazika chara.

¹⁰Nyengo zose tikuyegha nyifwa ya Yesu mu mathupi ghithu mwakuti umoyo wa Yesu nawo uwonekere mu mathupi ghithu.

¹¹Chifukwa apo ise tili ŵamoyo, nyengo zose tikuŵa mu urwani wa nyifwa chifukwa cha Yesu, mwakuti umoyo wa Yesu uwonekere mu mathupi ghithu gha nyifwa.

¹²Ntheura rekani nyifwa yikulimbalimba mwa ise, kweni umoyo nawo ukuchita nchito mwa imwe.

¹³Pakuti tili na Mzimu umoza wa chipulikano, nga ndi umo malembo ghakuyowoyera kuti “Nkhapulikana, ndipo ntheura nkhayowoya.” Ise nase tikugomezga ndiposo ntheura tikuyowoya,

¹⁴chifukwa tikumanya kuti Chiuta, mweneuyo wakawuska Fumu Yesu, wamkutiwuskaso na ise wuwo pamoza na Yesu, ndipo wati watiperekenge ise pamoza na imwe panthazi pakhe.

¹⁵Vyose ivi viliko chifukwa cha imwe, mwakuti apo uchizi wa Chiuta ukuŵandanira ŵanthu ŵanandi, umanye kwandaniska viwongo ku uchindami wa Chiuta.

¹⁶Pa chifukwa cheneichi kuti tikuwa nkhumbi chara. Nangauli unthu withu wakuwaro ukuvukupara, unthu withu wa mukati ukuzgokaso uphya zuŵa na zuŵa.

¹⁷Chifukwa suzgo yithu yichoko iyi iyo nja kanyengo kachoko waka, ndiyo yikutinozgera ise uchindami ukuru wa muyirayira, wambula mayerezgeko.

¹⁸Pakuti tikulaŵiska ku vinthu vyakuwoneka chara, kweni ku vinthu vyambula kuwoneka. Chifukwa vinthu ivyo vikuwoneka, nvya nyengo yino pera, kweni vinthu vyambula kuwoneka nvyamuyirayira.