Read new_tumbuka_bible 2 ŴaKorinte 5 Bible Online

2 ŴaKorinte 5 - new_tumbuka_bible bible

2 ŴaKorinte 5

¹Chifukwa tikumanya kuti para mathupi ghithu, agho ghali nga ndi hema, gheneagho tikukharamo pano pasi ghapankhuka, tili nayo nyumba iyo Chiuta wali kutizengera kuchanya. Nyumba iyo kuti njakuzengeka na mawoko chara ndipo njamuyirayira.

²Nadi sono tikutampha mu thupi ili ndipo tikunweka kuti tivware nyumba yithu ya kuchanya.

³Mwakuti para tayivwara, tireke kusangika kuŵa nkhule.

⁴Chifukwa apo tichali mu msasa uwu, tikuzotofyeka na kutampha. Kuti nchifukwa chakuti tikukhumba kuvura mathupi ghithu chara, kweni kuti tivwarikike mathupi gha kuchanya mwakuti icho ncha nyifwa chimirike na umoyo.

⁵Ndi Chiuta mweneuyo wakatinozgera ise chinthu cheneichi ndipo wakatipa Mzimu nga ndi chikhole.

⁶Ntheura nyengo zose kuti tikuŵa na nkhumbi chara. Tikumanya kuti apo tichali kukhalirira mu thupi, tili kutali na Fumu,

⁷pakuti tikwenda chifukwa cha chipulikano, kuti nchifukwa cha kuwona chara.

⁸Nadi tikuŵa na nkhumbi ziweme, ndipo takhumbanga kuti mphanyi tareka kukhalirira mu thupi na kuŵa pamoza na Fumu.

⁹Pa chifukwa ichi, manyi apo tichali kukhalirira mu thupi ili manyi tawukamo, tikupukwa chomene kuti timukondweske iyo.

¹⁰Chifukwa tose tikwenera kukawoneka panthazi pa chitengo cha kweruzgirapo cha Khristu, mwakuti munthu yose wapokere chiweme panji chiheni kwakuyana na ivyo wachita mu thupi.

¹¹Ntheura uku tikumanya kuzirwa kwa kopa Fumu, tikuyezga kukhorweska ŵanthu. Kweni Chiuta wakumanya kaŵiro kithu kose, ntheura nkhugomezga kuti imwe namweso mukutimanya na mu njuŵi zinu wuwo.

¹²Kuti tikukhumba kujiyenereska tekha kwa imwe chara, kweni tikumupani mwaŵi kuti imwe muthumbwe chifukwa cha ise, mwakuti muŵe na kanthu ka kuŵazgora awo kujikuzga kwawo kuli mu kawonekero ka chisko cha munthu kweni kaŵiro ka mtima wakhe chara.

¹³Chifukwa usange tikuŵa nga ndi para tikuyaruka, tikuyarukira chifukwa cha Chiuta. Usange mahara ghithu ghakuwereramo ndi chifukwa cha imwe.

¹⁴Kutemwa kwa Khristu ndiko kukutipemberezga, pakuti tikupanikizga kuti usange munthu yumoza wakaŵafwira ŵanthu wose, ipo wose ŵali kufwa.

¹⁵Iyo wakaŵafwira wose, mwakuti awo mbamoyo, ŵareke kukharaso ŵamoyo chifukwa cha iwo ŵekha, kweni ŵakhalire ŵamoyo chifukwa cha iyomwene uyo wakaŵafwira ndipo wakawuskika.

¹⁶Ntheura kufuma sono kuti tikumupimaso munthu na kapimiro ka unthu chara. Nangauli kale tikaghanaghananga za Khristu pakurondezga umo ŵanthu ŵakughanaghanira kweni sono kuti tikumughanaghanira ntheura chara.

¹⁷Ntheura usange munthu wali mwa Khristu wakuŵa chilengiwa chiphya. Ukoroŵere wakhe wawukamo, ndipo ndi munthu muphya.

¹⁸Vyose ivi vyachitika na Chiuta, mweneuyo wali kutiphemaniska ise na iyomwene mwa Khristu, ndipo wali kutipa mlimo uwu wa chiphemanisko.

¹⁹Ndiko kuti mwa Khristu, Chiuta wakaphemaniskanga charu kwa iyomwene, kwambula kulorako na zakwananga izo ŵanthu ŵakachita. Ndipo wali kutikorezga Uthenga wa chiphemanisko.

²⁰Ntheura ise tili nkharamba za Khristu, ndipo mwa ise Chiuta wakuyowoya namwe mwakuŵeyerera. Tikumurombani mu malo gha Khristu kuti, muphemane na Chiuta.

²¹Chifukwa cha ise Chiuta wakamuzgora kuŵa uheni uyo wakawura kumanya uheni, mwakuti mwa iyo ise tizgoke urunji wa Chiuta.